Bügin «Qazaq val'siniñ koroli» atanğan, wltınıñ wlı twlğalarınıñ biri Şämşi Qaldayaqovtıñ tuğan küni. Wlt tarihında atı qalğan kompozitor 1930 jıldıñ däl osı küninde (15 tamız), Oñtüstik Qazaqstan oblısı Otırar audanında düniege kelgen.

Asa darındı sazger twmsa talantımen jäne izdenis eñbeginiñ negizinde osı zamanğı qazaq estradasınıñ negizin saluşılardıñ biri bolıp, esimi el tarihında mäñgilik qaldı. Şığarmaşılıq jolında 300-ge juıq tartımdı än qaldırğan talant iesine Robert Fayler sındı ağılşınnıñ öner qayratkeri tañday qağa tamsanıp, adamzat muzıka alıbımen tanısqanın aytıp maqtanıptı.

Büginde egemen eliniñ Änwranına aynalğan «Meniñ Qazaqstanım» attı tuındısı, Qazaq jeriniñ twtastığına selkeu tüsken, eñ bir tarihi kezde düniege kelgen. Keñes odağı kezinde Qazaqstannıñ soltüstik bes oblısın Reseyge qosu turalı Mäskeudiñ ızğarı esken twsta, Şämşi Qazaqstannıñ twtastığın tu etken, jalpı halıqqa taraytın ortaq wrannıñ kerek ekenin tereñ sanasımen sezingen. Jüreginiñ tübinde qaynap jatqan otanşıl wlı sezimin änge aynaldırıp, «Meniñ elim, meniñ jerim...» dep wltınıñ jan ayqayın sırlı sazına sıydırğan eken.

Qazaq topırağınıñ tükpir-tükpirinen şırqalğan bwl än, baba twlparınıñ dübirindey wlı dalanı dürkiregen ruhtay kernese kerek. Büginde ärbir qazaqstandıq oñ qolımen jürek twsın basıp twrıp, otanğa degen süyispenşiligin osı ekpindi ruh sazımen jetkizedi. 2005 jıldan bastap «Meniñ Qazaqstanım» äni memleket Änwran märtebesinde, kök bayraqpen birge jelbirep, Wlı dalamen bite qaynasıp keledi.

Öşpes öner tuındıların qaldırğan Şämşi Qaldayaqov 1992 jılı aqpan ayınıñ 29 jwldızında Almatıda dünie salğan. Dalasın sazben äldilegen wlınıñ esimi halqınıñ esinde mäñgilikke saqtaladı. Ruhına tağzım retinde Tilegen Ahmetovtıñ "Qayran Şämşi" attı derekti fil'min wsınamız!

“The Qazaq Times”