Foto: Capitalgains.ru

Soñğı on jılda Qazaqstannan 10  mlrd dollar wrlanğan jäne zañsız şığarılğan, dep habarlaydı Bas Prokuratura. 

Vedomstvonıñ mälimetinşe, osı fakti boyınşa 36 qılmıstıq is qozğalğan.

"Bizdiñ bwl istegi älsiz twsımız - bilikti tergeuşilerdiñ bolmauı. Olar şet memleketterge swranıstı dwrıs jibere almaydı, aktivterge bwğat qoyudı jäne olardı elge qalay qaytarudıñ jolın bilmeydi. Şeteldik äriptestermen tığız baylanıs jetispeydi", - dep atap ötti vedomstvodan.

Al bwl mäseleler boyınşa 2016 jıldıñ qazan ayında aktivterdi qaytaru jobasın jüzege asıru jwmısı bastalğan.

"Endi biz şeteldik qwqıq qorğau organdarımen  aqparatpen almasu jıldam bolu üşin Europa men Aziyadağı aqparat almasatın älemdik jelilerge qosıldıq. Qwzıretti organdarmen birge şeteldgi qılmıstıq jolmen bolğan kiristerdi qaytarudıñ metodikasın jasadıq", - dep tüsindirdi Bas Prokuratura.

Sonday-aq, vedomstvo birigip istelgen jwmıstar nätijesinde 60 mln dollarğa tosqauıl qoyılğanın atap ötti. Endi osı qarajattı qaytaru jwmıstarı jürgizilip jatır.

Ayta keteyik, bwl 10 mlrd dollar qılmıstıq jolmen şığarılğan qarjınıñ tek bir böligi boluı mümkin. Ofşorlı aymaqtarğa da biraz qarajattıñ jılıstap ketui ğajap emes.

“The Qazaq Times”