«Köp jıldıq minsiz qızmeti» jauapkerşilikten qwtqarğan Meyrambay Kemalov. Foto: OKQ

Jurnalisterdi itke teñep balağattağan, qızmettik etikanı öreskel bwzğan Bas prokuratura qızmetkeri tek eskertumen şekteldi. Jauapkerşilikten jaltaruğa «köp jıldıq minsiz qızmeti» kömektesken. Arada eki jarım ay ötse de Kemalov tilşiler men qoğamnan keşirim swramağan.

Bas prokurordıñ 5 qañtar küngi mäjilis otırısında Qañtar turalı bayandamasınan keyin de köp saualğa jauap almağan jurnalister kluarda özinen swramaq bolğan. Äjethana aldında Asılovtıñ şığuın küzetken Bas prokuraturanıñ Parlamenttegi resmi ökili Meyrambay Kemalov kütip twrğan köpşilikke qarata «Ketiñder, sender itsiñder» degen sözi jelige tarağan edi. Qoğam narazılığın tudırğan zañ qadağalauşı organ qızmetkeriniñ dörekiligine BAQ qauımdastığı atınan wjımdıq arız jazılğan.

Eki aptadan soñ bas prokurordıñ orınbasarı Äset Şındaliev arız negizinde tekseris jürip jatqanın aytqan. QT redakciyası da Bas prokuraturanıñ baspasöz ökili Darhan Düysembaymen aptalap habarlasıp, baylanısa almağan soñ Asılovtıñ atına qoldanılğan şara, tartılğan jauapkerşiligi jöninde resmi swrau joldağan.

Bas prokuraturanıñ arnayı prokurorlar qızmeti bastığı Rizabek Ojarovtan kelgen resmi jauap hatta zañda joq tarmaqşağa süyenip, eskertu bergeni jazılğan.

«Bas prokuraturanıñ qızmetkerlerine qatıstı tärtiptik şara qoldanu boyınşa, Meyrambay Kemalovtıñ is-äreketinde QR memlekettik qızmetşilerdiñ etikalıq kodeksiniñ 8-tarmağı 13-tarmaqşasında körsetilgen moral'dıq-psihologiyalıq tözimdi, wstamdı bolu, azamattarmen qarım-qatınasta sıpayılıq pen zeyindilik tanıtu talaptarın bwzu belgileri bayqaladı. Alayda, M.Kemalovtıñ köp jıldıq minsiz qızmetin eskerip, oğan qatıstı qızmettik tärtipti jäne etikalıq normalardı saqtau qajettigi jöninde qatañ eskertumen şektelu turalı şeşim qabıldandı», – delingen.

Ojarov körsetken 8-tarmaq kodekste böligi retinde oqıluı tiis jäne bwl bölikte özi barlığı 8 tarmaqşa bar, 13 emes. Ädep kodeksi bärine ortaq bireu ğana ekenin eskersek, Bas prokuratura siltegen normanıñ şınayılığı kümän tuğızadı. Redakciya tilşisi mälimetterdi zerdeley kele Ojarovtıñ jañılısqan twsın anıqtadı. 8-böliktiñ 13-tarmağı «Memlekettik qızmetşilerdiñ etika kodeksine» emes, «Qwqıq qorğau organdarı, azamattıq qorğau organdarı jäne memlekettik fel'd'egerlik qızmeti qızmetkerleriniñ ädep kodeksine» tiesili.

Qarapayım etika normasın elemey, jurnalisterge til tigize, adamnıñ ar-namısına tietin söz aytqan adam Bas prokuratura bedeline nwqsan keltirse de eskertumen qwtılğanı jeñil dep esepteydi media qauımdastıq. Qoğamdı tiksintken, prokuratura qwrılımındağı mamandardıñ käsibiligine kümän tudırğan prokuror döreki äreketine keşirim swramağan.

Bilik azamattıq belsendiler men oppoziciya ökilderin «jeke adamnıñ ar-namısı men qadir-qasietine til tigizdi» degen ayıppen jii jauapqa tartadı. Alayda Bas prokuratura qızmetkeriniñ qorlau mändi sözine wjımdıq arız tüsse de layıq jauapkerşilikke tartılmauı Aqorda uäde etken «Ädiletti jäne Jaña Qazaqstannıñ» juırda ornaytınına qoğamdıq senimdi tömendetedi deydi sarapşılar.

The Qazaq Times