Foto: dknews.kz

Qazaqstan Süriyağa äsker jiberuge baylanıstı eşkimmen, eşqanday kelissöz jürgizip jatqan joq.

«Qazaqstan Süriyağa äsker jiberuge baylanıstı eşkimmen, eşqanday kelissöz jürgizip jatqan joq. Bizdiñ el üşin älemniñ kez kelgen eline öz äskerilerin jiberu üşin BWW-nıñ tiisti qararı (rezolyuciyası) qajet. Qazaqstan Süriya dağdarısın şeşuge baylanıstı Astanada osı mäselege qatısı bar barlıq taraptarğa minber wsınıp otır. Bwl Qazaqstannıñ Süriya dağdarısın şeşuge qosqan ülesi. Al Süriyadağı qauipsiz aymaqtardıñ qauipsizdigin qamtamasız etuge baylanıstı mäseleler şildeniñ 4-5 aralığında Astanada ötetin kezekti Süriya kelissözinde talqılanatın boladı.» - dedi QR sırtqı ister ministri Qayrat Abdrahmanov jurnalister aldında söylegen sözinde.

Esteriñizge salayıq keşe Resey memlekettik dumasınıñ qauipsizdik komiteti basşısı Vladimir Şamanov «Resey Qazaqstan jäne Qırğızstanmen Süriyağa äsker jiberuge baylanıstı kelissöz jürgizip jatır» dep mälimdegen bolatın. Bwl qazaq qoğamında qızu talqığa tüsip, köpşiligi özderiniñ qarsılıqtarın bildirgen edi.

 “The Qazaq Times”