Qazaqstandıqtar bağanıñ qımbat bolatınına senimdi

Wlttıq bank säuir ayındağı inflyaciya deñgeyiniñ qanday bolğanın jariyaladı. Olardıñ mälimetinşe, säuirde körsetkiş tömendep, 7,5%-dı qwradı.

"Inflyaciyanıñ tömendeui köbine azıq-tülik tauarları men aqılı qızmetter bağasınıñ ösu qarqını neğwrlım bayau boluına baylanıstı azıq-tülikke jatpaytın inflyaciyanıñ jıldıq qarqınınıñ tömendeui esebinen boldı. Twtastay alğanda, inflyaciya jıldıñ basınan beri Wlttıq Banktiñ 6-8%-dıq nısanalı dälizi şeginde bekidi", - delingen Wlttıq banktiñ baspasöz habarlamasında.

Wlttıq banktiñ mälimdeuinşe, säuirde halıq arasında inflyaciyalıq jağdaydardı bağalau boyınşa jürgizilgen saualnama nätijesine säykes qabıldanatın jıldıq inflyaciya men ötken aydağı inflyaciya twraqtı deñgeyde saqtaladı.

Saualnamağa qatısuşılar inflyaciyanıñ negizgi közi retinde tamaq önimderi bağasınıñ ösuin aytqan. Sonday-aq, respondentterdiñ 53%-ı 2017 jılğı mamırda bağa tağı da ösedi dep pikir bildirgen.

Bank habarlamasında jazılğanday, tipti  bir jıldan keyin inflyaciyanıñ deñgeyin 10%-dan joğarı bağalaytındardıñ ülesi birşama ösken. Al bolaşaqtağı inflyaciyanı 6-10%-dıq aralıqta bağalaytındardıñ ülesi 23%-dan 28%-ğa deyin joğarılağan.

“The Qazaq Times”