قازاقستاندىقتار باعانىڭ قىمبات بولاتىنىنا سەنىمدى

ۇلتتىق بانك ءساۋىر ايىنداعى ينفلياتسيا دەڭگەيىنىڭ قانداي بولعانىن جاريالادى. ولاردىڭ مالىمەتىنشە، ساۋىردە كورسەتكىش تومەندەپ، 7,5%-دى قۇرادى.

"ينفلياتسيانىڭ تومەندەۋى كوبىنە ازىق-تۇلىك تاۋارلارى مەن اقىلى قىزمەتتەر باعاسىنىڭ ءوسۋ قارقىنى نەعۇرلىم باياۋ بولۋىنا بايلانىستى ازىق-تۇلىككە جاتپايتىن ينفلياتسيانىڭ جىلدىق قارقىنىنىڭ تومەندەۋى ەسەبىنەن بولدى. تۇتاستاي العاندا، ينفلياتسيا جىلدىڭ باسىنان بەرى ۇلتتىق بانكتىڭ 6-8%-دىق نىسانالى ءدالىزى شەگىندە بەكىدى", - دەلىنگەن ۇلتتىق بانكتىڭ ءباسپاسوز حابارلاماسىندا.

ۇلتتىق بانكتىڭ مالىمدەۋىنشە، ساۋىردە حالىق اراسىندا ينفلياتسيالىق جاعدايداردى باعالاۋ بويىنشا جۇرگىزىلگەن ساۋالناما ناتيجەسىنە سايكەس قابىلداناتىن جىلدىق ينفلياتسيا مەن وتكەن ايداعى ينفلياتسيا تۇراقتى دەڭگەيدە ساقتالادى.

ساۋالناماعا قاتىسۋشىلار ينفلياتسيانىڭ نەگىزگى كوزى رەتىندە تاماق ونىمدەرى باعاسىنىڭ ءوسۋىن ايتقان. سونداي-اق، رەسپوندەنتتەردىڭ 53%-ى 2017 جىلعى مامىردا باعا تاعى دا وسەدى دەپ پىكىر بىلدىرگەن.

بانك حابارلاماسىندا جازىلعانداي، ءتىپتى  بىر جىلدان كەيىن ينفلياتسيانىڭ دەڭگەيىن 10%-دان جوعارى باعالايتىنداردىڭ ۇلەسى ءبىرشاما وسكەن. ال بولاشاقتاعى ينفلياتسيانى 6-10%-دىق ارالىقتا باعالايتىنداردىڭ ۇلەسى 23%-دان 28%-عا دەيىن جوعارىلاعان.

“The Qazaq Times”