Almatı qalasındağı koronavirusqa şaldıqqan nauqastardı emdeuge mamandanğan birden-bir medmekeme – Ortalıq klinikalıq auruhanası. 15 qaraşa 2021 jıl. Foto: QT / Kültegin Aspanwlı

Qazaqstanda koronavirus pen oğan wqsas pnevmoniyağa şaldıqqandar sanı tağı bir mıñğa artıp, jalpı esebi 1 mln 38 mıñğa jetken. Bwl salıstırmalı türde bıltırğıdan aytarlıqtay joğarı. Qaraşa ayınıñ birinşi jartısında 18,5 mıñ adam auırıp, 356 adam qaytıs boldı.

Densaulıq saqtau ministrliginiñ resmi mälimetinşe, elde 14 qaraşa koronavirus (KVI+) jwqqan 1038 adam, al 13-i koronavirus pnevmoniyasına (KVI-) şaldıqqan 43 adam tirkeldi. Sonday-aq, senbide 19 qazaqstandıq aurudan qaytıs boldı. Bıltır däl osı uaqıtta resmi statistikada täuligine köp degende 900-ge deyin nauqas jäne 7-8 ölim jağdayı tirkeletin, stacionar men ambulatoriyadağı sırqattar sanı 9 mıñğa tarta edi. Qazir bwl körsetkiş eselep ösip otır, büginde elde 34,5 mıñ adam (KVI+ boyınşa 29 mıñ, KVI- boyınşa 5 mıñday) auırıp jatır.

#COVID Ötken küni PTR testi arqılı koronavirus jwqqanı rastalğan nauqastar sanı tağı köbeydi. Olardıñ negizgi böligi nemese 14%-ı ädettegidey Almatı (143) qalasına 13,5%-ı  SQO (141) jäne 12%-ı Pavlodar (125) oblısına tiesili. Auruşañdıq Qostanay (113), astana (112), Qarağandı (112), Aqmola (79), ŞQO (55), Almatı oblısı (52), Qızılorda (18), BQO (17), Atırau (16), Aqtöbe (15), Türkistan (14), Mañğıstau (13), Jambıl (9), Şımkent (4) öñirlerinde  birşama kemigen. Jeksenbide aurudan ayıqqan 1271 adam üyine şığarılğan. 13 qaraşada jiını 15 adam qaytıs bolğan.

#COVID_pnevmoniyası mehanikalıq ädispen esepke alınatındıqtan, demalıs künderi medstatistika jüyesi tolıq qamtılmaydı. Saldarınan keyster qatarı senbi jäne jeksenbi, mereke künderi ädettegiden aytarlıqtay az tirkeledi. Qaraşanıñ 13-i aqparatı bir täulikke keşigip beriletin koronavirus pnevmoniyasına şaldıqqan 27 nauqas esepke alındı. Vedomstvo dereginşe, bwl küni ŞQO (8), Şımkent (7),  Almatı oblısı (7), Qarağandı (6), Jambıl (4), Türkistan (3), Qostanayda (3) anıqtalğan. Sonımen qosa, 88 adam ayığıp şıqqan, tağı 4 adam köz jwmğan.

#Jalpı  DenMin deregine qarağanda, emdelip jatqan 34 mıñ nauqastıñ 7 mıñı auruhanada, 27 mıñı ambulatorlıq baqılauda. 520 nauqastıñ jağdayı naşar, ondağı 120 adamnıñ häli öte auır. Bwdan özge 104 sırqat ökpeni jasandı jeldetu apparatımen tınıstap jatır.

Epidkartada «jasıl aymaqtağı» Atırau, Türkistan, Mañğıstau, Almatı qalası, Şımkent, BQO, ŞQO, Almatı oblısı, Jambıl, Aqtöbe, Qızılorda oblıstarınan basqa astana, Qostanay, Qarağandı jäne Aqmola oblısı «sarı aymaqqa» ötken. Basqa eki aymaq (Pavlodar, SQO) äli de «qızıl aymaqta» twr.

DenMinniñ QT redakciyasına bergen mälimetinşe, indet tarağan 2020-2021 jıldarı PTR testi oñ körsetken 1407 sınama sekvenirlengen (ştamm türin anıqtaytın taldau). Säykesinşe, biıl köktem-jazda genomdıq zertteu nätijesinde eldiñ basım böliginen virustıñ braziliyalıq, britandıq, oñtüstikafrikalıq, ündistandıq jäne nigeriyalıq ştamdarı anıqtalğan.

Biılğı jaz mezgili qazaqstandıqtar üşin qaralı habarğa tolı boldı. Pandemiya bastalğalı 1,5 jıldıñ işinde anıqtalğan barlıq auruşañdıq pen ölim jağdayınıñ jartısı tek ötken jazda, törtinşi tolqında tirkeldi. Jazğı üş ayda bas-ayağı 420 mıñ adam auırsa, 6,6 mıñnan asa adam köz jwmdı. Qırküyek ayınıñ özinde 99 mıñday nauqas esepke alınğan jäne 2117 adam qaytıs bolğan. Al qazan ayında 57 mıñ auru jäne 1078 ölim jağdayı tirkelgen. Qaraşa ayı bastalğalı 18,5 mıñ sırqat tirkeldi, dert meñdegen 356 adam ömirden ötken.

Bıltır 13 naurızdan beri COVID-19 infekciyasın jwqtırğandar qatarı 957 mıñnan, 1 tamızdan bergi koronavirus pnevmoniyası 81 mıñnan asqan. DDSW derekqorı men Wlttıq statistikada Qazaqstanda auırğandar sanı 1 mln 38 mıñğa jetken. Degenmen Ükimet koronavirus pen onıñ pnevmoniyasın eki bölek esepteydi.

Pandemiyanıñ bas-ayağı 21 ayda jalpı virus jwqqandardan 21,2 mıñ adam (KVI+ / U07.1 – 12 434, KVI- / U07.2 – 5097, ilespe aurulardan – 3685) qaytıs bolğan. Alayda Qazaqstan biligi boyınan koronavirus tabılsa da, basqa aurulardıñ sebebinen qaytıs boldı delingenderdi jalpı statistikağa engizbeydi. Bwğan qarsı sarapşılardıñ sözine qarağanda, koronavirustıñ janama äserinen qaytqandardıñ jartısınan astamınıñ sebebi qan aynalımı jüyesiniñ auruları bolğandıqtan, oğan infekciya dert qozdıruşı faktor retinde ölimge äkep soqtırğan.

Qazaqstan virus taraluı boyınşa älemde Djons Hopkins universiteti jäne DDSW tizimindegi 221 el men aymaqtıñ arasında 37-orınğa ornıqtı.

Ükimettiñ soñğı deregine qarağanda, Qazaqstanda 7,8 mln adam koronavirusqa qarsı vakcinanı tolıq alğan, al keminde birinşi dozası egilgen jwrttıñ sanı 8,5 mln-nan asadı. Densaulıq saqtau ministri Aleksey Coy 22 qaraşadan bastap vakcina alğanına jartı jıl ötkender üşin revakciyanaciya nauqanı jürgiziletinin mälimdegen.

The Qazaq Times