قازاقستاندا دەمالىس كۇنگى كوروناۆيرۋس ستاتسيتيكاسى تاعى دا كەمىدى

قازاقستاندا كوروناۆيرۋس پەن وعان ۇقساس پنەۆمونياعا شالدىققاندار سانى تاعى ءبىر مىڭعا ارتىپ، جالپى ەسەبى 1 ملن 38 مىڭعا جەتكەن. بۇل سالىستىرمالى تۇردە بىلتىرعىدان ايتارلىقتاي جوعارى. قاراشا ايىنىڭ ءبىرىنشى جارتىسىندا 18,5 مىڭ ادام اۋىرىپ، 356 ادام قايتىس بولدى.

دەنساۋلىق ساقتاۋ مينيسترلىگىنىڭ رەسمي مالىمەتىنشە، ەلدە 14 قاراشا كوروناۆيرۋس (كۆي+) جۇققان 1038 ادام، ال 13-ءى كوروناۆيرۋس پنەۆمونياسىنا (كۆي-) شالدىققان 43 ادام تىركەلدى. سونداي-اق، سەنبىدە 19 قازاقستاندىق اۋرۋدان قايتىس بولدى. بىلتىر ءدال وسى ۋاقىتتا رەسمي ستاتيستيكادا تاۋلىگىنە كوپ دەگەندە 900-گە دەيىن ناۋقاس جانە 7-8 ءولىم جاعدايى تىركەلەتىن، ستاتسيونار مەن امبۋلاتورياداعى سىرقاتتار سانى 9 مىڭعا تارتا ەدى. قازىر بۇل كورسەتكىش ەسەلەپ ءوسىپ وتىر، بۇگىندە ەلدە 34,5 مىڭ ادام (كۆي+ بويىنشا 29 مىڭ، كۆي- بويىنشا 5 مىڭداي) اۋىرىپ جاتىر.

#COVID وتكەن كۇنى پتر تەستى ارقىلى كوروناۆيرۋس جۇققانى راستالعان ناۋقاستار سانى تاعى كوبەيدى. ولاردىڭ نەگىزگى بولىگى نەمەسە 14%-ى ادەتتەگىدەي الماتى (143) قالاسىنا 13,5%-ى  سقو (141) جانە 12%-ى پاۆلودار (125) وبلىسىنا تيەسىلى. اۋرۋشاڭدىق قوستاناي (113), استانا (112), قاراعاندى (112), اقمولا (79), شقو (55), الماتى وبلىسى (52), قىزىلوردا (18), بقو (17), اتىراۋ (16), اقتوبە (15), تۇركىستان (14), ماڭعىستاۋ (13), جامبىل (9), شىمكەنت (4) وڭىرلەرىندە  بىرشاما كەمىگەن. جەكسەنبىدە اۋرۋدان ايىققان 1271 ادام ۇيىنە شىعارىلعان. 13 قاراشادا جيىنى 15 ادام قايتىس بولعان.

#COVID_پنەۆمونياسى مەحانيكالىق ادىسپەن ەسەپكە الىناتىندىقتان، دەمالىس كۇندەرى مەدستاتيستيكا جۇيەسى تولىق قامتىلمايدى. سالدارىنان كەيستەر قاتارى سەنبى جانە جەكسەنبى، مەرەكە كۇندەرى ادەتتەگىدەن ايتارلىقتاي از تىركەلەدى. قاراشانىڭ 13-ءى اقپاراتى ءبىر تاۋلىككە كەشىگىپ بەرىلەتىن كوروناۆيرۋس پنەۆمونياسىنا شالدىققان 27 ناۋقاس ەسەپكە الىندى. ۆەدومستۆو دەرەگىنشە, بۇل كۇنى شقو (8), شىمكەنت (7),  الماتى وبلىسى (7), قاراعاندى (6), جامبىل (4), تۇركىستان (3), قوستانايدا (3) انىقتالعان. سونىمەن قوسا، 88 ادام ايىعىپ شىققان، تاعى 4 ادام كوز جۇمعان.

#جالپى  دەنمين دەرەگىنە قاراعاندا، ەمدەلىپ جاتقان 34 مىڭ ناۋقاستىڭ 7 مىڭى اۋرۋحانادا، 27 مىڭى امبۋلاتورلىق باقىلاۋدا. 520 ناۋقاستىڭ جاعدايى ناشار، ونداعى 120 ادامنىڭ ءحالى وتە اۋىر. بۇدان وزگە 104 سىرقات وكپەنى جاساندى جەلدەتۋ اپپاراتىمەن تىنىستاپ جاتىر.

ەپيدكارتادا «جاسىل ايماقتاعى» اتىراۋ، تۇركىستان، ماڭعىستاۋ، الماتى قالاسى، شىمكەنت، بقو، شقو، الماتى وبلىسى، جامبىل، اقتوبە، قىزىلوردا وبلىستارىنان باسقا استانا، قوستاناي، قاراعاندى جانە اقمولا وبلىسى «سارى ايماققا» وتكەن. باسقا ەكى ايماق (پاۆلودار، سقو) ءالى دە «قىزىل ايماقتا» تۇر.

دەنميننىڭ QT رەداكتسياسىنا بەرگەن مالىمەتىنشە، ىندەت تاراعان 2020-2021 جىلدارى پتر تەستى وڭ كورسەتكەن 1407 سىناما سەكۆەنيرلەنگەن (شتامم ءتۇرىن انىقتايتىن تالداۋ). سايكەسىنشە، بيىل كوكتەم-جازدا گەنومدىق زەرتتەۋ ناتيجەسىندە ەلدىڭ باسىم بولىگىنەن ۆيرۋستىڭ برازيليالىق، بريتاندىق، وڭتۇستىكافريكالىق، ۇندىستاندىق جانە نيگەريالىق شتامدارى انىقتالعان.

بيىلعى جاز مەزگىلى قازاقستاندىقتار ءۇشىن قارالى حابارعا تولى بولدى. پاندەميا باستالعالى 1,5 جىلدىڭ ىشىندە انىقتالعان بارلىق اۋرۋشاڭدىق پەن ءولىم جاعدايىنىڭ جارتىسى تەك وتكەن جازدا، ءتورتىنشى تولقىندا تىركەلدى. جازعى ءۇش ايدا باس-اياعى 420 مىڭ ادام اۋىرسا، 6,6 مىڭنان اسا ادام كوز جۇمدى. قىركۇيەك ايىنىڭ وزىندە 99 مىڭداي ناۋقاس ەسەپكە الىنعان جانە 2117 ادام قايتىس بولعان. ال قازان ايىندا 57 مىڭ اۋرۋ جانە 1078 ءولىم جاعدايى تىركەلگەن. قاراشا ايى باستالعالى 18,5 مىڭ سىرقات تىركەلدى، دەرت مەڭدەگەن 356 ادام ومىردەن وتكەن.

بىلتىر 13 ناۋرىزدان بەرى COVID-19 ينفەكتسياسىن جۇقتىرعاندار قاتارى 957 مىڭنان، 1 تامىزدان بەرگى كوروناۆيرۋس پنەۆمونياسى 81 مىڭنان اسقان. ددسۇ دەرەكقورى مەن ۇلتتىق ستاتيستيكادا قازاقستاندا اۋىرعاندار سانى 1 ملن 38 مىڭعا جەتكەن. دەگەنمەن ۇكىمەت كوروناۆيرۋس پەن ونىڭ پنەۆمونياسىن ەكى بولەك ەسەپتەيدى.

پاندەميانىڭ باس-اياعى 21 ايدا جالپى ۆيرۋس جۇققانداردان 21,2 مىڭ ادام (كۆي+ / U07.1 – 12 434, كۆي- / U07.2 – 5097, ىلەسپە اۋرۋلاردان – 3685) قايتىس بولعان. الايدا قازاقستان بيلىگى بويىنان كوروناۆيرۋس تابىلسا دا، باسقا اۋرۋلاردىڭ سەبەبىنەن قايتىس بولدى دەلىنگەندەردى جالپى ستاتيستيكاعا ەنگىزبەيدى. بۇعان قارسى ساراپشىلاردىڭ سوزىنە قاراعاندا، كوروناۆيرۋستىڭ جاناما اسەرىنەن قايتقانداردىڭ جارتىسىنان استامىنىڭ سەبەبى قان اينالىمى جۇيەسىنىڭ اۋرۋلارى بولعاندىقتان، وعان ينفەكتسيا دەرت قوزدىرۋشى فاكتور رەتىندە ولىمگە اكەپ سوقتىرعان.

قازاقستان ۆيرۋس تارالۋى بويىنشا الەمدە دجونس حوپكينس ۋنيۆەرسيتەتى جانە ددسۇ تىزىمىندەگى 221 ەل مەن ايماقتىڭ اراسىندا 37-ورىنعا ورنىقتى.

ۇكىمەتتىڭ سوڭعى دەرەگىنە قاراعاندا، قازاقستاندا 7,8 ملن ادام كوروناۆيرۋسقا قارسى ۆاكتسينانى تولىق العان، ال كەمىندە ءبىرىنشى دوزاسى ەگىلگەن جۇرتتىڭ سانى 8,5 ملن-نان اسادى. دەنساۋلىق ساقتاۋ ءمينيسترى الەكسەي تسوي 22 قاراشادان باستاپ ۆاكتسينا العانىنا جارتى جىل وتكەندەر ءۇشىن رەۆاكتسياناتسيا ناۋقانى جۇرگىزىلەتىنىن مالىمدەگەن.

The Qazaq Times