Köşede ketip bara jatqan jedel järdem köligi. Almatı qalası. 29 qazan 2021 jıl. Foto: QT / Kültegin Aspanwlı

Qazaqstanda koronavirus pen oğan wqsas pnevmoniyağa şaldıqqandar sanı tağı 1,9 mıñğa artıp, jalpı esebi 1 mln 15 mıñnan astı. Qazan ayında 52,5 mıñ nauqas anıqtalıp, 980-nen asa adam köz jwmğan. Bwl salıstırmalı türde bıltırğıdan aytarlıqtay joğarı. Särsenbide kovid pnevmoniyasımen tirkelgender kürt köbeydi.

Densaulıq saqtau ministrliginiñ resmi mälimetinşe, elde 28 qazanda koronavirus (KVI+) jwqqan 1697 adam, al 27-si küni  koronavirus pnevmoniyasına (KVI-) şaldıqqan 239 adam tirkeldi. Sonday-aq, särsenbide 28 qazaqstandıq aurudan qaytıs boldı. Bıltır däl osı uaqıtta resmi statistikada täuligine köp degende 450-ge deyin nauqas jäne 5-6 ölim jağdayı tirkeletin, stacionarlarda jatqan sırqattar sanı 3 mıñ şamasında edi. Qazir bwl körsetkiş eselep ösip otır, büginde elde 48,7 mıñ adam (KVI+ boyınşa 43 mıñday, KVI- boyınşa 5,8 mıñ) auırıp jatır.

#COVID Ötken küni PTR testi arqılı koronavirus jwqqanı rastalğan nauqastar qatarı tağı arttı. Olardıñ basım böligi nemese 13%-ı ädettegidey joğarı dinamikada twrğan bir ğana Almatı (222) qalasına, 14%-ı Pavlodar (236) oblısına tiesili. Bir künde tirkelgen nauqastardıñ üşten biri astana jäne Almatı qalası men oblısına jatadı. Astana (136), Qarağandı (136), SQO (163), Aqmola (142), Qostanay (131), ŞQO (120), Almatı oblısı (134), BQO (48), Aqtöbe (54), Şımkent (34),  Qızılorda (46), Türkistan (30), Atırau (24), Jambıl (30), Mañğıstau (11) oblıstarınıñ basım böliginde auruşañdıq birşama artqanı bayqaldı. Beysenbide aurudan ayıqqan 2141 adam üyine şığarılğan. 27 qazanda jiını 25 adam qaytıs bolğan.

#COVID_pnevmoniyası Qazannıñ 27-si aqparatı bir täulikke keşigip beriletin koronavirus pnevmoniyasına şaldıqqan 239 nauqas esepke alındı. Bwl aldıñğı kün, seysenbige qarağanda 91 nauqasqa köp. Vedomstvo dereginşe, bwl küni Almatı oblısı (54), ŞQO (36), Şımkent (25), Jambılda (20), Qarağandı (16), Qostanay (15), Aqtöbe (13), Aqmola (12), Pavlodarda (10) anıqtalğan. Sonımen qosa, 295 adam ayığıp şıqqan, tağı 3 adam köz jwmğan.

#Jalpı  DenMin deregine qarağanda, emdelip jatqan 48 mıñ nauqastıñ 8 mıñı auruhanada, 40 mıñı ambulatorlıq baqılauda. 587 nauqastıñ jağdayı naşar, ondağı 154 adamnıñ häli öte auır. Bwdan özge 107 sırqat ökpeni jasandı jeldetu apparatımen tınıstap jatır.

Epidkartada «jasıl aymaqtağı» Şımkent, Atırau, Türkistan, Mañğıstau, BQO, Jambıl oblıstarınan basqa astana, Qarağandı, ŞQO, Qızılorda, Aqtöbe oblıstarı, Almatı qalası men oblısı «sarı aymaqqa» ötken. Basqa 5 aymaq (ŞQO, Qostanay, Pavlodar, Aqmola, SQO) twtastay «qızıl aymaqta» twr.

DenMinniñ QT redakciyasına bergen mälimetinşe, indet tarağan 2020-2021 jıldarı PTR testi oñ körsetken 1407 sınama sekvenirlengen (ştamm türin anıqtaytın taldau). Säykesinşe, biıl köktem-jazda genomdıq zertteu nätijesinde eldiñ basım böliginen virustıñ braziliyalıq, britandıq, oñtüstikafrikalıq, ündistandıq jäne nigeriyalıq ştamdarı anıqtalğan.

Biılğı jaz mezgili qazaqstandıqtar üşin qaralı habarğa tolı boldı. Pandemiya bastalğalı 1,5 jıldıñ işinde anıqtalğan barlıq auruşañdıq pen ölim jağdayınıñ jartısı tek ötken jazda, törtinşi tolqında tirkeldi. Jazğı üş ayda bas-ayağı 420 mıñ adam auırsa, 6,6 mıñnan asa adam köz jwmdı. Qırküyek ayınıñ özinde 99 mıñday nauqas esepke alınğan jäne 2117 adam qaytıs bolğan. Al qazan ayında 52,5 mıñ auru jäne 981 ölim jağdayı tirkelgen.

Bıltır 13 naurızdan beri COVID-19 infekciyasın jwqtırğandar qatarı 936 mıñnan, 1 tamızdan bergi koronavirus pnevmoniyası 79 mıñnan asqan. DDSW derekqorı men Wlttıq statistikada Qazaqstanda auırğandar sanı 1 mln 15 mıñğa jetti. Degenmen Ükimet koronavirus pen onıñ pnevmoniyasın eki bölek esepteydi.

Pandemiyanıñ bas-ayağı 20 ayında jalpı virus jwqqandardan 20,5 mıñ adam (KVI+ / U07.1 – 12 053, KVI- / U07.2 – 5025, ilespe aurulardan – 3415) qaytıs bolğan. Alayda Qazaqstan biligi boyınan koronavirus tabılsa da, basqa aurulardıñ sebebinen qaytıs boldı delingenderdi jalpı statistikağa engizbeydi. Bwğan qarsı sarapşılardıñ sözine qarağanda, koronavirustıñ janama äserinen qaytqandardıñ jartısınan astamınıñ sebebi qan aynalımı jüyesiniñ auruları bolğandıqtan, oğan infekciya dert qozdıruşı faktor retinde ölimge äkep soqtırğan.

Qazaqstan virus taraluı boyınşa älemde Djons Hopkins universiteti jäne DDSW tizimindegi 221 el men aymaqtıñ arasında 37-orınğa ornıqtı.

Ükimettiñ soñğı deregine qarağanda, Qazaqstanda 7,4 mln adam koronavirusqa qarsı vakcinanı tolıq alğan, al keminde birinşi dozası egilgen jwrttıñ sanı 8,2 mln-nan asadı. Densaulıq saqtau ministri Aleksey Coy qaraşa ayınıñ üşinşi onkündiginen bastap vakcina alğanına jartı jıl ötkender üşin revakciyanaciya nauqanı jürgiziletinin mälimdegen.

The Qazaq Times