Qazaqstan amerikalıq Pfizer kompaniyasınıñ koronavirusqa qarsı vakcinasın köktemde aluı kerek edi. Ükimet jwmısınıñ naşarlığınan der uaqıtında jetkizilmedi. Osı uaqıt aralığında reseylik ekpe meyilinşe köptep satıp alındı. Körneki suret. Foto: Facebook / Pfizer

Qazaqstan azamattarın mamır ayında jetkizilui tiis bolğan Pfizer vakcinasımen  uaqıtında qamtamasız ete almay, jospardıñ bwzıluına jauaptı şeneunik tärtiptik jazağa tartıldı. Biraq jazanıñ jeñil türine jalğız kişi qızmetkerge tağayındaluı Toqaev sınınıñ zilin añğartqanday.

Qazaqstan Ükimeti QT redakciyasınıñ prezident Toqaevtıñ jazdağı sını men tapsırması boyınşaekpeni jetkizuge kedergi keltirip, merzimin keşeuildetken şeneunikterge qanday şara qoldanılğanı turalı swrau hatqa jauap berdi.

 «Prezident qatısuımen ötken 2021 jılğı 10 şildedegi Ükimettiñ keñeytilgen otırısınıñ № 21-01-7.13 hattamasınıñ 3.23-tarmağın orındau boyınşa Ükimet pen Prezident äkimşiligi birlesip, Pfizer vakcinasın jetkizu merzimderiniñ bwzıluına jol bergen lauazımdı twlğalardı jauapqa tartu şaraların qabıldauı qajet boldı», – deydi densaulıq saqtau vice-ministri Jandos Bürkitbaev jauap hatında.

Şilde ayında Toqaev Pfizer ekpesine berilgen mümkindikti qoldan jiberip alğan şeneunikterdi sınağan. Osığan baylanıstı eki ogran tekseris jürgizgen.

«Vakcinanı jetkizu merzimderiniñ bwzıluı sebepti tärtiptik teris qılıq jasau faktisi boyınşa «Qazaqstan Respublikasınıñ memlekettik qızmeti turalı» zañınıñ 44-babı 3-tarmağınıñ 1-tarmaqşasına säykes, Densaulıq saqtau ministrliginiñ Däri-därmek sayasatı departamenti direktorınıñ orınbasarına eskertu türinde tärtiptik jaza qoldanıldı», – delingen resmi aqparatta.

Wlt saulığı men prezident sınına qatıstı kürdeli mäsele bes deñgeyli jazanıñ eñ jeñil türin bir ğana lauazım iesine şara qoldanumen «şeşilgen». Şın mäninde, Toqaev aldın ala uağdalastıqqa qol jetkizilip qoyğan auqımdı şaruanıñ orta joldan qwrdımğa wşırauına keminde birneşe adam jauaptı ekenin meñzep, «ekpeniñ jetkiziluine kedergi keltirgen lauazım ielerine şara qolanudı tapsırğan». Alayda is jüzinde bir ğana adam jauapqa tartıldı jäne onıñ atı-jönin naqtı körsetpedi. Ol – ministrlik qaramağındağı Däri-därmekpen qamtamasız etu jäne standarttau departamenti basşısınıñ orınbasarı. Mausım ayınıñ basında departament direktorı auısqan. Aşıq derekközdegi aqparatqa qarağanda, köktemde Botagöz Sızdıqova men Ruslan Ädilhanov direktor orınbasarları qızmetinde bolğan.

Şildeniñ ortasında Toqaev Ükimet pen Prezident äkimşiligin wlttıq qauipsizdik mäselesine jatatın vakcinamen qamtamasız etuge kedergi keltirgen nemese salğıttıq tanıtqan şeneunikterdi jazalauğa mindettegen. Kompaniya qoyğan talaptar barlıq elderge ortaq bola twra Qazaqstan Ükimeti tapsırmanı orınday almağan. Saldarınan jazdıgüni indettiñ törtinşi tolqınında köp adam auırıp, köz jwmdı.

Toqaev «azamattardıñ qalağan ekpeni saldıruına mümkindik beruimiz qajet» jäne «Pfizer vakcinasına qoljetimdilik mäselesin qısqa merzim işinde şeşu kerek» degenine tört ay ötse de qazaqstandıqtarğa batıs ekpesin salğızu mümkindik tua qoymadı.

Öndiruşi men Ükimet arasındağı kelissöz jürip jatqalı bir jılğa juıqtadı. Ekinşi talpınıstan keyin tek qazan ayında Pfizer ekpesiniñ 4 million dozasın elge jetkizu boyınşa kelisim jasalğan. Qazaqstan Pfizer ekpesi aldımen 12 jastan asqan balalar, jükti jäne bala emizetin äyelderge saludı josparlap otır.

Resmi esepke säykes, 7 million 300 mıñnan asa adam tolıq vakcinalanğan Qazaqstanda 2022 jıldan bastap şeteldik ekpeler aqılı bolmaq. Bwğan deyin ministrlik tegin PTR testiniñ ayasın tarıltqan. Qaraşa ayında Pfizer ekpesi keluimen qatar biıldıñ özinde jüzmıñdağan adamğa arnalğan  revakcinaciya nauqanı bastaladı.

Qoğamda qazir salınıp jatqan ekpe türlerine kümänmen qaraytındar äli künge deyin Pfizer önimin kütip jür. Elde AQŞ-Geremaniya ğalımdarı birlesip dayındağan ekpeni qalaytın azamattar az emes.

Pfizer/BionTech — DDSW pen Europa paydalanuğa rwqsat etken jäne alğaş moyındalğan vakcinalardıñ biri. AQŞ-tan şığatın bwl ekpeniñ tiimdiligi 95 payızdan asadı.

The Qazaq Times