قازاقستان ازاماتتارىن مامىر ايىندا جەتكىزىلۋى ءتيىس بولعان Pfizer ۆاكتسيناسىمەن ۋاقىتىندا قامتاماسىز ەتە الماي، جوسپاردىڭ بۇزىلۋىنا جاۋاپتى شەنەۋنىك تارتىپتىك جازاعا تارتىلدى. بىراق جازانىڭ جەڭىل تۇرىنە جالعىز كىشى قىزمەتكەرگە تاعايىندالۋى توقاەۆ سىنىنىڭ ءزىلىن اڭعارتقانداي.
قازاقستان ۇكىمەتى QT رەداكتسياسىنىڭ پرەزيدەنت توقاەۆتىڭ جازداعى سىنى مەن تاپسىرماسى بويىنشاەكپەنى جەتكىزۋگە كەدەرگى كەلتىرىپ، مەرزىمىن كەشەۋىلدەتكەن شەنەۋنىكتەرگە قانداي شارا قولدانىلعانى تۋرالى سۇراۋ حاتقا جاۋاپ بەردى.
«پرەزيدەنت قاتىسۋىمەن وتكەن 2021 جىلعى 10 شىلدەدەگى ۇكىمەتتىڭ كەڭەيتىلگەن وتىرىسىنىڭ № 21-01-7.13 حاتتاماسىنىڭ 3.23-تارماعىن ورىنداۋ بويىنشا ۇكىمەت پەن پرەزيدەنت اكىمشىلىگى بىرلەسىپ، Pfizer ۆاكتسيناسىن جەتكىزۋ مەرزىمدەرىنىڭ بۇزىلۋىنا جول بەرگەن لاۋازىمدى تۇلعالاردى جاۋاپقا تارتۋ شارالارىن قابىلداۋى قاجەت بولدى»، – دەيدى دەنساۋلىق ساقتاۋ ۆيتسە-ءمينيسترى جاندوس بۇركىتباەۆ جاۋاپ حاتىندا.
شىلدە ايىندا توقاەۆ Pfizer ەكپەسىنە بەرىلگەن مۇمكىندىكتى قولدان جىبەرىپ العان شەنەۋنىكتەردى سىناعان. وسىعان بايلانىستى ەكى وگران تەكسەرىس جۇرگىزگەن.
«ۆاكتسينانى جەتكىزۋ مەرزىمدەرىنىڭ بۇزىلۋى سەبەپتى تارتىپتىك تەرىس قىلىق جاساۋ فاكتىسى بويىنشا «قازاقستان رەسپۋبليكاسىنىڭ مەملەكەتتىك قىزمەتى تۋرالى» زاڭىنىڭ 44-بابى 3-تارماعىنىڭ 1-تارماقشاسىنا سايكەس، دەنساۋلىق ساقتاۋ مينيسترلىگىنىڭ ءدارى-دارمەك ساياساتى دەپارتامەنتى ديرەكتورىنىڭ ورىنباسارىنا ەسكەرتۋ تۇرىندە تارتىپتىك جازا قولدانىلدى»، – دەلىنگەن رەسمي اقپاراتتا.
ۇلت ساۋلىعى مەن پرەزيدەنت سىنىنا قاتىستى كۇردەلى ماسەلە بەس دەڭگەيلى جازانىڭ ەڭ جەڭىل ءتۇرىن ءبىر عانا لاۋازىم يەسىنە شارا قولدانۋمەن «شەشىلگەن». شىن مانىندە، توقاەۆ الدىن الا ۋاعدالاستىققا قول جەتكىزىلىپ قويعان اۋقىمدى شارۋانىڭ ورتا جولدان قۇردىمعا ۇشىراۋىنا كەمىندە بىرنەشە ادام جاۋاپتى ەكەنىن مەڭزەپ، «ەكپەنىڭ جەتكىزىلۋىنە كەدەرگى كەلتىرگەن لاۋازىم يەلەرىنە شارا قولانۋدى تاپسىرعان». الايدا ءىس جۇزىندە ءبىر عانا ادام جاۋاپقا تارتىلدى جانە ونىڭ اتى-ءجونىن ناقتى كورسەتپەدى. ول – مينيسترلىك قاراماعىنداعى ءدارى-دارمەكپەن قامتاماسىز ەتۋ جانە ستاندارتتاۋ دەپارتامەنتى باسشىسىنىڭ ورىنباسارى. ماۋسىم ايىنىڭ باسىندا دەپارتامەنت ديرەكتورى اۋىسقان. اشىق دەرەككوزدەگى اقپاراتقا قاراعاندا, كوكتەمدە بوتاگوز سىزدىقوۆا مەن رۋسلان ءادىلحانوۆ ديرەكتور ورىنباسارلارى قىزمەتىندە بولعان.
شىلدەنىڭ ورتاسىندا توقاەۆ ۇكىمەت پەن پرەزيدەنت اكىمشىلىگىن ۇلتتىق قاۋىپسىزدىك ماسەلەسىنە جاتاتىن ۆاكتسينامەن قامتاماسىز ەتۋگە كەدەرگى كەلتىرگەن نەمەسە سالعىتتىق تانىتقان شەنەۋنىكتەردى جازالاۋعا مىندەتتەگەن. كومپانيا قويعان تالاپتار بارلىق ەلدەرگە ورتاق بولا تۇرا قازاقستان ۇكىمەتى تاپسىرمانى ورىنداي الماعان. سالدارىنان جازدىگۇنى ىندەتتىڭ ءتورتىنشى تولقىنىندا كوپ ادام اۋىرىپ، كوز جۇمدى.
توقاەۆ «ازاماتتاردىڭ قالاعان ەكپەنى سالدىرۋىنا مۇمكىندىك بەرۋىمىز قاجەت» جانە «Pfizer ۆاكتسيناسىنا قولجەتىمدىلىك ماسەلەسىن قىسقا مەرزىم ىشىندە شەشۋ كەرەك» دەگەنىنە ءتورت اي وتسە دە قازاقستاندىقتارعا باتىس ەكپەسىن سالعىزۋ مۇمكىندىك تۋا قويمادى.
ءوندىرۋشى مەن ۇكىمەت اراسىنداعى كەلىسسوز ءجۇرىپ جاتقالى ءبىر جىلعا جۋىقتادى. ەكىنشى تالپىنىستان كەيىن تەك قازان ايىندا Pfizer ەكپەسىنىڭ 4 ميلليون دوزاسىن ەلگە جەتكىزۋ بويىنشا كەلىسىم جاسالعان. قازاقستان Pfizer ەكپەسى الدىمەن 12 جاستان اسقان بالالار، جۇكتى جانە بالا ەمىزەتىن ايەلدەرگە سالۋدى جوسپارلاپ وتىر.
رەسمي ەسەپكە سايكەس، 7 ميلليون 300 مىڭنان اسا ادام تولىق ۆاكتسينالانعان قازاقستاندا 2022 جىلدان باستاپ شەتەلدىك ەكپەلەر اقىلى بولماق. بۇعان دەيىن مينيسترلىك تەگىن پتر تەستىنىڭ اياسىن تارىلتقان. قاراشا ايىندا Pfizer ەكپەسى كەلۋىمەن قاتار بيىلدىڭ وزىندە جۇزمىڭداعان ادامعا ارنالعان رەۆاكتسيناتسيا ناۋقانى باستالادى.
قوعامدا قازىر سالىنىپ جاتقان ەكپە تۇرلەرىنە كۇمانمەن قارايتىندار ءالى كۇنگە دەيىن Pfizer ءونىمىن كۇتىپ ءجۇر. ەلدە اقش-گەرەمانيا عالىمدارى بىرلەسىپ دايىنداعان ەكپەنى قالايتىن ازاماتتار از ەمەس.
Pfizer/BionTech — ددسۇ پەن ەۋروپا پايدالانۋعا رۇقسات ەتكەن جانە العاش مويىندالعان ۆاكتسينالاردىڭ ءبىرى. اقش-تان شىعاتىن بۇل ەكپەنىڭ تيىمدىلىگى 95 پايىزدان اسادى.
كيبەرشابۋىلعا ۇشىراعان باق وكىلدەرى قۇقىق قورعاۋ ورگاندارىنا ارىز ءتۇسىردى
Oyan, Qazaqstan قوزعالىسىنىڭ تاعى ءبىر بەلسەندىسىن پوليتسيا بولىمىنە شاقىردى
ورتالىق ازيا: تاريحي، ساياسي جانە ەكونوميكالىق مۇددەلەر اياسىندا
قىرعىزستاندا تاۋەلسىز Kloop باسىلىمىنىڭ قىرعىز تىلىندەگى سايتى بۇعاتتالدى
ەكس-مينيستر ايەلىن ساباپ ءولتىردى دەگەن كۇدىكپەن ۇستالدى