Foto: 365info.kz

Qazaqstannıñ eks-prezidenti Nwrswltan Nazarbaevtıñ kişi qızı Äliya Nazarbaevanıñ Facebook pen Instagram jelisindegi paraqşaları 13 qañtar keşkisin joğalıp ketti dep jazdı Ortalıq Aziya jañalıqtar qızmeti.

Ol osı küni tüske taman jelidegi paraqtarında elde narazılıq pen odan keyin bolğan dürbeleñ jaylı post jariyalağan edi. Nazarbaevanıñ jazbasınıñ astında jwrt negativ pikirler jaza bastağan.

Nazarbaeva postında bolğan jayttı "qayğılı oqiğa" dep, qaza tapqandardıñ otbasına köñil aytqan. Ol türli aymaqtan twrğındardıñ äkesin qoldap, habarlama jiberip jatqanın atap ötip, "moral'dıq qoldau üşin" alğıs bildirdi.

Keyin Qumash telegram-kanalı Äliya Nazarbaevanıñ paraqşasınıñ qazirgi jeri Birikken Arab ämirlikteri ekenin jazğan.

Qazaqstanda qañtardıñ basında swyıtılğan gaz bağası qımbattağan soñ bastalğan narazılıqtar şamamen bir aptağa sozıldı. Narazılıq kezinde jwrt prezidenttikten ketse de bilikke ıqpalın saqtap qalğan 81 jastağı Nazarbaevtan ornın bosatudı talap etip, "Şal, ket!" dep te ayğayladı.

Nazarbaev 28 jeltoqsannan beri jwrt aldına şıqpadı jäne eldegi jağdayğa qatıstı eşqanday pikir bildirmedi. Onıñ baspasöz hatşısı Nazarbaevtıñ Nwr-Swltanda ekenin, Qauipsizdik keñesi törağalığın qazirgi prezident Toqaevqa öz erkimen bergenin jazdı.

5 qañtarda Toqaev Qauipsizdik keñesi törağalığın öz qolına alğan edi.Ol eldegi narazılıq bastalğalı Nazarbaev jaylı bir ret ğana aytıp, "birinşi prezident twsındı tabıstı kompaniyalar men bay adamdar tobı payda boldı" dedi.

Qazaqstannıñ qazirgi prezidenti utilizaciya alımın jinaytın "Operator ROP" kompaniyasınıñ jwmısın toqtatudı bwyırdı. Bwl kompaniyanıñ Äliya Nazarbaevağa qatısı barı aytıladı.

Äliya Nazarbaeva Toqaevtıñ kompaniyanı jabu turalı sözine eşqanday pikir bildirmedi.

Nazarbaevtıñ ülken qızı Dariğa Nazarbaeva 12 qañtardağı mäjilis ornına qatıspadı. Kömekşisi jergilikti basılımdarğa onıñ "koronavirus jwqtırğanın" ayttı.

Elde jağday uşıqqan twsta Toqaev WQŞW-dan äskeri kömek swradı. Resey bastağan wyım Qazaqstanğa mıñdağan sarbaz jiberdi. WQŞW äskerileri 13 qañtardan bastap elden şığarıla bastadı.

Sarapşılar Toqaev şetelden äsker kirgizu arqılı elitaaralıq küreste biligin saqtap qaldı dep sanaydı.