Balalar qalalıq klinikalıq jwqpalı aurular auruhanasınıñ modul'di filialındağı 30 orınğa şaqtalğan reanimaciya bölimi törtinşi tolqınnan keyin 90%-ğa bosadı. 21 qırküyek 2021 jıl. Almatı qalası. Foto: QT / Kültegin Aspanwlı

Qazaqstanda koronavirus pen oğan wqsas pnevmoniyağa şaldıqqandar sanı tağı 2,2 mıñğa artıp, jalpı esebi 975 mıñğa jaqındağan. Qazan ayınıñ alğaşqı birneşe küninde 12 mıñday nauqas anıqtalıp, 200-den asa adam köz jwmğan. Bwl salıstırmalı türde bıltırğıdan aytarlıqtay joğarı.

Densaulıq saqtau ministrliginiñ resmi mälimetinşe, elde 6 qazanda koronavirus (KVI+) jwqqan 2063 adam, al 5-i küni  koronavirus pnevmoniyasına (KVI-) şaldıqqan 202 adam tirkeldi. Sonday-aq, ötken seysenbide 39 qazaqstandıq aurudan qaytıs boldı. Osılayşa osı aptadağı jağday mausım ayınıñ soñındağı deñgeyge şamalas körinedi. Degenmen bıltır däl osı uaqıtta resmi statistikada täuligine köp degende 300-ge deyin nauqas jäne 10-ğa jeter-jetpes ölim jağdayı tirkeletin, stacionarlarda jatqan sırqattar sanı 3,5 mıñnan aspağan edi. Qazir bwl körsetkiş eselep ösip otır, büginde elde 56 mıñnan asa adam (KVI+ boyınşa 48 mıñ, KVI- boyınşa 7,5 mıñ) auırıp jatır.

#COVID Ötken küni PTR testi arqılı koronavirus jwqqanı rastalğan nauqastar qatarı tağı arttı. Olardıñ basım böligi nemese 20%-ı ädettegidey joğarı dinamikada twrğan bir ğana Almatı (423) qalasına tiesili. Al astana (281), Almatı (197), Qarağandı (172), Pavlodar (140), ŞQO (140), Aqtöbe (111), SQO (108), Qostanay (97), BQO (70), Şımkent (68), Aqmola (67), Atırau (51), Jambıl (46), Türkistan (43), Qızılorda (39), Mañğıstau (10) öñirlerinde birşama twraqtı. Särsenbide aurudan ayıqqan 2646 adam üyine şığarılğan. 5 qazanda jiını 33 adam qaytıs bolğan.

#COVID_pnevmoniyası Qazannıñ 5-i aqparatı bir täulikke keşigip beriletin koronavirus pnevmoniyasına şaldıqqan 202 nauqas esepke alındı. Vedomstvo dereginşe, bwl küni Almatı oblısı (37), ŞQO (33), Aqmola (30), Jambıl (19), Şımkent (16), Almatı qalası (14), Qostanayda (12) sırqattar köptep anıqtalğan. Sonımen qosa, 332 adam ayığıp şıqqan, tağı 6 adam köz jwmğan.

#Jalpı  DenMin deregine qarağanda, emdelip jatqan 56 mıñ nauqastıñ 9,5 mıñı auruhanada, 46 mıñı ambulatorlıq baqılauda. 747 nauqastıñ jağdayı naşar, ondağı 206 adamnıñ häli öte auır. Bwdan özge 124 sırqat ökpeni jasandı jeldetu apparatımen tınıstap jatır.

Epidkartada «jasıl aymaqtağı» Türkistan, Mañğıstau, Qızılorda jäne Jambıl oblıstarınan basqa Şımkent, Atırau, Aqtöbe, SQO, BQO, ŞQO, Aqmola, Almatı oblıstarı «sarı aymaqqa» ötken. Basqa 4 aymaq twtastay «qızıl aymaqta» twr.

DenMinniñ QT redakciyasına bergen mälimetinşe, 11 naurız ben 12 şilde aralığında PTR testi oñ körsetken 1311 sınama sekvenirlengen (ştamm türin anıqtaytın taldau). Säykesinşe, biıl köktem-jazda genomdıq zertteu nätijesinde eldiñ basım böliginen virustıñ braziliyalıq, britandıq, oñtüstikafrikalıq, ündistandıq jäne nigeriyalıq ştamdarı anıqtalğan.

Biılğı jaz mezgili qazaqstandıqtar üşin qaralı habarğa tolı boldı. Pandemiya bastalğalı 1,5 jıldıñ işinde anıqtalğan barlıq auruşañdıq pen ölim jağdayınıñ jartısı tek ötken jazda, törtinşi tolqında tirkeldi. Jazğı üş ayda bas-ayağı 420 mıñ adam auırsa, 6,6 mıñnan asa adam köz jwmdı. Qırküyek ayınıñ özinde 99 mıñday nauqas esepke alınğan jäne 2117 adam qaytıs bolğan.

Bıltır 13 naurızdan beri COVID-19 infekciyasın jwqtırğandar qatarı 898 mıñnan, 1 tamızdan bergi koronavirus pnevmoniyası 76 mıñnan asqan. DDSW derekqorı men Wlttıq statistikada Qazaqstanda auırğandar sanı 975 mıñğa juıqtağan. Degenmen Ükimet koronavirus pen onıñ pnevmoniyasın eki bölek esepteydi.

Pandemiya bastalğalı jalpı virus jwqqandardan 19,4 mıñ adam (KVI+ / U07.1 – 11 422, KVI- / U07.2 – 4881, ilespe aurulardan – 3123) qaytıs bolğan. Alayda Qazaqstan biligi boyınan koronavirus tabılsa da, basqa aurulardıñ sebebinen qaytıs boldı delingenderdi jalpı statistikağa engizbeydi. Bwğan qarsı sarapşılardıñ sözine qarağanda, koronavirustıñ janama äserinen qaytqandardıñ jartısınan astamınıñ sebebi qan aynalımı jüyesiniñ auruları bolğandıqtan, oğan infekciya dert qozdıruşı faktor retinde ölimge äkep soqtırğan.

Qazaqstan virus taraluı boyınşa älemde Djons Hopkins universiteti jäne DDSW tizimindegi 221 el men aymaqtıñ arasında 37-orınğa ornıqtı.

Ükimettiñ soñğı deregine qarağanda, Qazaqstanda 6,7 mln adam koronavirusqa qarsı vakcinanı tolıq alğan, al keminde birinşi dozası egilgen jwrttıñ sanı 7,7 mln-nan asadı.

The Qazaq Times