Referendum uçaskesinen körinis. Almatı qalası. Foto: QT / Kültegin Aspanwlı

6 qazanda Almatı qalasında 624 uçaskede referendum ötip jatır. QT Naurızbay audanındağı birneşe uçaskege bardı. Key uçaskede baqılauşılar men komissiya törayımdarınıñ esebinde eleuli ayırmaşılıq bayqalsa, keybirinde bilikten qarjılandırılatın wyımdardıñ baqılauşıları men täuelsiz baqılauşılardıñ sanağı qayşı örbip jatqanı körindi.

№200 mektepte ornalasqan №562 uçaskeniñ komissiya törayımı Roza Zakir'yanova uçaske tizimindegi 2778 adamnıñ neşeui kelip qatısqanın ayta almaymız deydi.

–  Onı naqtı ayta almaymız. Uçaske sağat 20:0-de jabılğasın, sanaqtan keyin baqılauşılarğa jariya etemiz. İşinara däl qazir bere almaymız, – deydi komissiya törayımı.

Toğız adamnan twratın komissiya qwramınan özge baqılauşılarmen tildestik. «Dauıs» wyımınan qatısıp otırğan baqılauşı jürgizip otırğan esebin «qwpiya» ekenin aytadı. «Sanaq jürgizip otırmın, biraq bere almaymın, men tek baqılaymın» deydi ol.

№562 uçaskeniñ baqılauşıları. Almatı qalası, Naurızbay audanı. Foto: QT / Kültegin Aspanwlı

№562 uçaskeniñ baqılauşıları. Almatı qalası, Naurızbay audanı. Foto: QT / Kültegin Aspanwlı

«Täuelsiz baqılauşılar» birlestiginiñ baqılauşısı Noyan Ömirzaqwlı «bwl qwpiya emes, qazirge deyin 45 adam keldi» dep mälimdedi.

Alğaşında «sanap otırmın, biraq belsendilik esebin bölise almaymın» degen «Er Azamat» wyımınıñ Tilegen Nwrjaubaev keyinnen 50 şaqtı adam qatısqanın ayttı.

Bwl esepti «Adam jäne qoğam» wyımınıñ Arujan Tölegenova da rastadı. «Azamattıq al'yans» ökili Äsiya Tilepova,  «El dauısı» wyımınıñ baqılauşısı jäne AMANAT partiyasınıñ müşesi uçaskege kelgen 60 şaqtı adamdı bayqağan.

Osılayşa, törayım men «Dauıs» ökili «işinara esepti» jasırğanımen, «Täuelsiz baqılauşılar» ökili qas qaqpay küzetkenniñ özinde 45 adam qatısqanın jetkizdi.

№592 uçaskedegi refrendumnıñ barısı. Almatı qalası, Naurızbay audanı. Foto: QT / Kültegin Aspanwlı

№592 uçaskedegi refrendumnıñ barısı. Almatı qalası, Naurızbay audanı. Foto: QT / Kültegin Aspanwlı

№592 uçaskeniñ törayımı Aziza Ötegenova tizimde 2710 azamat barın, swqbat alarğa deyingi uaqıtta 60 adamnıñ kelgenin bayandadı. Biraq baqılauşılardıñ esebi aytarlıqtay köbirek.

«Dauıs» wyımınan Däuletqazı «barlığı talapqa say ötude, qazir 78 adam keldi» deydi. Däl osığan wqsas esepti «bäri ädil ötip jatır, tamaşa» degen «Adam jäne qoğam» wyımınıñ baqılauşısı Aqerke Seyilhan da atadı. Mwnı qaytalağan «Er Azamat» wyımınıñ ökili Nazgül Swluqaşovanıñ aytuınşa, «eşqanday qwqıq bwzuşılıq tirkelmedi, ädil ötude». AMANAT partiyasınıñ Äsel Qwrmanaeva da 77-78 adam kelgenin ayttı. «Azamattıq al'yans» wyımınan otırğan Laura Tölepovanıñ esebi de osı şamada.

№627 uçaske. Almatı qalası. Foto: QT / Kültegin Aspanwlı

№627 uçaske. Almatı qalası. Foto: QT / Kültegin Aspanwlı

Aumağında 2801 azamatı bar №627 uçaske törayımı Farida Satuğanova «jüzge juıq adam keldi» dedi. Biraq özin Kamila dep tanıstırğan «Azamattıq al'yans» wyımınıñ baqılauşısı «sağat 9:00-degi qatısqandar mälimeti 47 adam» deydi.

AMANAT partiyasınıñ ökili Saya Älimbaydıñ deregi törayımnıñ aqparatınan eki ese az.

«Saylau oydağıday ötip jatır. Barlığın baqılauda wstap otırmız. Qwqıq bwzuşılıq bolıp jatqan joq. Bäri jaqsı. ...Meniñ sanauım boyınşa, şamamen 50-den joğarı, 50-ge juıq bolıp twr», – dedi bilik partiyasınıñ bayqauşısı.

«Dauıs» wyımın partiya dep şatasqan baqılauşı Gülbarşın Aldabergenova eluge tarta twrğın kelgenin jetkizdi.

«Adam jäne qoğam» ökili Aqtolqın Qwdaybergen tañğı 6:00-den beri «-45 adam kelip dauısın berdi» deydi. Osı wyımnıñ ekinşi baqılauşısı Darın Asqarov «47 adam byulleten' alğanın» ayttı.

The Qazaq Times