Metro beketin infekciyadan zalalsızdandırıp jürgen sanepid mamandar. Foto: paryz.kz

Almatıda koronavirus pandemiyasınıñ törtinşi tolqını aqırındap bäseñdep keledi. Tap qazir qalanıñ 10 mıñ twrğını emdelip jatır. Qazir rezervtegi tösek-orındardı qosa eseptegende stacionarlarda şamamen 64% orın tolğan. 

Qoğamdıq densaulıq saqtau basqarmasınıñ mälimetinşe, ötken täulikte, 12 qırküyekte tirkelgen 719 adamnıñ 690-ı simptom belgilerimen, tağı 29 adam simptomsız tirkelgen. Jeksenbi küni 211 adam auruhanağa jatqızılğan.

Jalpı qalada sıyımdılığı 5230 orın bolatın infekciyalıq stacionarlarda 3383 adam emdelip jatır. Olardıñ arasında 107 bala tösekke tañılğan. Al reanimaciya jäne qarqındı terapiya bölimderinde 316 nauqas jatır. 52 adam ÖJJ, 120 nauqas invazivti emes ÖJJ-ımen jäne 107 sırqat High flow apparatımen tınıstap jatır. Sonday-aq, BMSK men Telemedicina ortalığınıñ mobil'di toptarımen birge üy jağdayında 6934 nauqas ambulatorlıq deñgeyde baqılauğa alınğan.

Ötken senbide jiını 18 adam koronavirus pen oğan wqsas pnevmoniyadan qaytıs bolğan.

Resmi derekke qarağanda, Almatı qalasında biıl aqpannan beri 910 mıñ adam ekpeniñ alğaşqı, onıñ işinde 795 mıñı tolıq dozasın alğan. Äkimdik mälimetinşe, äzirge 160 egu punkti men 237 egu brigadasında 1028 medqızmetker jwmıs isteydi.

Epidkartada birneşe aydan beri «qızıl aymaqta» twrğan Almatı qalasında pandemiya bastalğalı 165 mıñnan asa adam auırğan, onıñ 50 mıñğa juığı tamızda anıqtalğan. Qazir respublikada anıqtalğan kündelikti eseptiñ şirek böligi Almatı qalasına tiesili bolıp otır.

Epidahualdıñ naşarlauına baylanıstı qalıptı jağdayda qoldanılıp jürgen 5-7 mıñ arasındağı tösek-orın 8910-ğa deyin köbeytilgen. Stacionarlardağı orın sanı artıp, tipti jaña rezervtik filialdar uaqıtşa iske qosılğan edi. Düysenbi bwl 5230 orınğa deyin qısqartıldı.

The Qazaq Times