Körneki suret. Foto: aşıq derekköz

Qazaqstanda koronavirus pen oğan wqsas pnevmoniyağa şaldıqqandar sanı tağı 4 mıñ şamasında artıp, jalpı esebi 895 mıñnan astı.

Törtinşi tolqın ekpindey bastağan şilde ayınıñ ortasına qaray täuliktik sırqattar sanı 5 mıñnıñ, tamızğa qaray 7 mıñnıñ üstine şıqqan indet qarqını bir aptadan beri 4-5 mıñ keyske mañayladı. 7 qırküyekte eki aydan beri üşinşi kün qatarınan 4 mıñnan kem jağday tirkeldi. Densaulıq saqtau ministrliginiñ resmi mälimetinşe, elde 7 qırküyekte koronavirus (KVI+) jwqqan 3639 adam, al 6-sı küni  koronavirus pnevmoniyasına (KVI-) şaldıqqan 342 adam tirkeldi jäne düysenbide 82 qazaqstandıq aurudan qaytıs boldı. Qazir elde 87 mıñ adam (KVI+ boyınşa 79 mıñ, KVI- boyınşa 7,7 mıñ) auırıp jatır.

#COVID Ötken küni PTR testi arqılı koronavirus jwqqanı rastalğan nauqastar qatarı tağı arttı. Olardıñ basım böligi nemese 27%-ı ädettegidey joğarı dinamikada twrğan bir ğana Almatı (911) qalasına tiesili. Bwdan özge Qarağandı (350), astana (326), Almatı (265) jäne Pavlodar (218), Aqmola (217), Qostanay (187), Mañğıstau (188), Aqtöbe (207) oblıstarında epidahual äli de naşar küyde. ŞQO (154), Atırau (80), Jambıl (75), BQO (83), Qızılorda (98), Şımkent (145), SQO (79), Türkistan (56) öñirlerinde dert qarqını bäseñdemey twr. Keşe, seysenbide aurudan ayıqqan 6894 adam üyine şığarılğan. 6 qırküyekte jiını 72 adam qaytıs bolğan.

#COVID_pnevmoniyası Qırküyektiñ 6-sı aqparatı bir täulikke keşigip beriletin koronavirus pnevmoniyasına şaldıqqan 342 nauqas esepke alındı. Vedomstvo dereginşe, bwl küni sırqattar Almatı (48), Jambıl (47), Şımkent (44), Atırau (36) oblıstarı men Almatı (24) qalasında köptep anıqtalğan. Sonımen qosa, 150 adam ayığıp şıqqan, tağı 10 adam köz jwmğan.

#Jalpı  DenMin deregine qarağanda, emdelip jatqan 87 mıñ nauqastıñ 18 mıñı auruhanada, 68 mıñı ambulatorlıq baqılauda. 1377 nauqastıñ jağdayı naşar, ondağı 378 adamnıñ häli öte auır. Bwdan özge 197 sırqat ökpeni jasandı jeldetu apparatımen tınıstap jatır.

Epidkartada «jasıl aymaqtağı» Türkistan oblısınan basqa ŞQO, SQO, Jambıl, Qızılorda öñirleri «sarı aymaqqa» ötken. Basqa 12 aymaq twtastay «qızıl aymaqta» twr.

DenMinniñ QT redakciyasına bergen mälimetinşe, 11 naurız ben 12 şilde aralığında PTR testi oñ körsetken 1311 sınama sekvenirlengen (ştamm türin anıqtaytın taldau). Säykesinşe, biıl köktem-jazda genomdıq zertteu nätijesinde eldiñ basım böliginen virustıñ braziliyalıq, britandıq, oñtüstikafrikalıq jäne ündistandıq ştamdarı anıqtalğan.

Biılğı jaz mezgili qazaqstandıqtar üşin qaralı habarğa tolı boldı. Pandemiya bastalğalı 1,5 jıldıñ işinde anıqtalğan barlıq auruşañdıq pen ölim jağdayınıñ jartısı tek ötken jazda, törtinşi tolqında tirkeldi. Üş ayda bas-ayağı 420 mıñ adam auırsa, 6,6 mıñnan asa adam köz jwmdı.

Bıltır 13 naurızdan beri COVID-19 infekciyasın jwqtırğandar qatarı 824 mıñnan, 1 tamızdan bılayğı koronavirus pnevmoniyası 71 mıñnan asqan. DDSW derekqorı men Wlttıq statistikada Qazaqstanda auırğandar sanı 895 mıñğa jetti. Degenmen Ükimet koronavirus pen onıñ pnevmoniyasın eki bölek esepteydi.

Pandemiya bastalğalı jalpı virus jwqqandardan 17,1 mıñnan asa adam (KVI+ / U07.1 – 9987, KVI- / U07.2 – 4597, ilespe aurulardan – 2633) qaytıs bolğan. Alayda Qazaqstan biligi boyınan koronavirus tabılsa da, basqa aurulardıñ sebebinen qaytıs boldı delingenderdi jalpı statistikağa engizbeydi. Bwğan qarsı sarapşılardıñ sözine qarağanda, koronavirustıñ janama äserinen qaytqandardıñ jartısınan astamınıñ sebebi qan aynalımı jüyesiniñ auruları bolğandıqtan, oğan infekciya dert qozdıruşı faktor retinde ölimge äkep soqtırğan.

Qazaqstan virus taraluı boyınşa älemde Djons Hopkins universiteti jäne DDSW tizimindegi 221 el men aymaqtıñ arasında 36-orınğa ornıqtı.

Ükimettiñ soñğı deregine qarağanda, Qazaqstanda 5,7 mln adam koronavirusqa qarsı vakcinanı tolıq alğan, al keminde birinşi dozası egilgen jwrttıñ sanı 6,9 mln-nan asadı.

The Qazaq Times