Almatı qalasındağı Ortalıq klinikalıq auruhanasınıñ jansaqtau böliminde koronavirustıñ asqınğan türimen auırıp jatqan nauqastar. 15 şilde 2021 jıl. Foto: QT / Kültegin Aspanwlı

Qazaqstanda koronavirus pen oğan wqsas pnevmoniyağa şaldıqqandar sanı tağı 5,3 mıñğa artıp, jalpı esebi 869 mıñğa juıqtadı.

Biılğı jaz mezgili qazaqstandıqtar üşin qaralı habarğa tolı boldı. Pandemiya bastalğalı 1,5 jıldıñ işinde anıqtalğan barlıq auruşañdıq pen ölim jağdayınıñ jartısı tek ötken jazda, törtinşi tolqında tirkeldi. Bwl – öte auır körsetkiş. Mausım ayında 38 mıñğa juıq adam auırsa, bwl şilde ayında 4 esege asqınıp 159 mıñ adam sırqattandı. Al tamız ayında tipti örşelenip dert jwqqandar qatarı 222 mıñnan astı.

Säykesinşe osı aralıqta ölim jağdayı da jiiledi. 487 adam qaytıs bolğan mausım ayına qarağanda şildede ölim 4 esege kürt ösip, 1932 adam köz jwmdı. Tamızda mausım ayımen salıstırğanda, marqwmdar qatarı 8,6 esege köbeyip, 4197 azamat tösek üstinde ömirden ozdı.

Şildege qaray ekpin alğan indettiñ törtinşi tolqını Qazaqstan üşin qımbatqa tüsu sebebin Densaulıq saqtau ministrligi koronavirustıñ ündistandıq del'ta ştamınıñ taraluımen, azamattardıñ uaqtılı vakcinalanbauımen jäne medqızmetke jüginbeuimen tüsindiredi.

Şilde ayınıñ ortasına qaray täuliktik sırqattar sanı 5 mıñnıñ, tamızğa qaray 7 mıñnıñ üstine şıqqan indet qarqını üş künnen beri 5 mıñ keyske mañayladı. Densaulıq saqtau ministrliginiñ resmi mälimetinşe, elde 31 tamızda koronavirus (KVI+) jwqqan 4880 adam, al 31-i küni  koronavirus pnevmoniyasına (KVI-) şaldıqqan 460 adam tirkeldi jäne seysenbide 114 qazaqstandıq aurudan qaytıs boldı. Qazir elde 105 mıñ adam (KVI+ boyınşa 97 mıñ, KVI- boyınşa 7 mıñ) auırıp jatır.

#COVID Ötken küni PTR testi arqılı koronavirus jwqqanı rastalğan nauqastar qatarı tağı arttı. Olardıñ basım böligi ädettegidey joğarı dinamikada twrğan Almatı (1264) qalası jäne Qarağandı (648) oblısınan. Bwdan özge Almatı (282), astana (315) jäne Aqtöbe (302), Pavlodar (265), Aqmola (246), Mañğıstau (239), Qostanay (237) oblıstarında epidahual äli de naşar küyde. ŞQO (201), Atırau (198) Şımkent (180), Jambıl (99), SQO (75), Qızılorda (133), BQO (140), Türkistan (56) öñirlerinde dert qarqını bäseñder emes. Keşe, särsenbide aurudan ayıqqan 10 644 adam üyine şığarılğan. 31 tamızda jiını 93 adam qaytıs bolğan.

#COVID_pnevmoniyası Tamızdıñ 31-i aqparatı bir täulikke keşigip beriletin koronavirus pnevmoniyasına şaldıqqan 460 nauqas esepke alındı. Vedomstvo dereginşe, seysenbi küni sırqattar Almatı oblısı (91), Şımkent (57), Jambıl (53), Mañğıstau (45), Atırau (39), Aqtöbe (35) oblıstarında köptep anıqtalğan. Sonımen qosa, 167 adam ayığıp şıqqan, tağı 21 adam köz jwmğan.

#Jalpı  DenMin deregine qarağanda, emdelip jatqan 105 mıñday nauqastıñ 22 mıñnan astamı auruhanada, 82 mıñı ambulatorlıq baqılauda. 1590 nauqastıñ jağdayı naşar, ondağı 479 adamnıñ häli öte auır. Bwdan özge 226 sırqat ökpeni jasandı jeldetu apparatımen tınıstap jatır.

Epidkartada «jasıl aymaqtağı» Türkistan oblısınan basqa ŞQO, Jambıl öñirleri «sarı aymaqqa» ötken. Basqa 14 aymaq twtastay «qızıl aymaqta» twr.

DenMinniñ QT redakciyasına bergen mälimetinşe, 11 naurız ben 12 şilde aralığında PTR testi oñ körsetken 1311 sınama sekvenirlengen (ştamm türin anıqtaytın taldau). Säykesinşe, biıl köktem-jazda genomdıq zertteu nätijesinde eldiñ basım böliginen virustıñ braziliyalıq, britandıq, oñtüstikafrikalıq jäne ündistandıq ştamdarı anıqtalğan.

Bıltır 13 naurızdan beri COVID-19 infekciyasın jwqtırğandar qatarı 798 mıñnan, 1 tamızdan bılayğı koronavirus pnevmoniyası 70 mıñnan asqan. DDSW derekqorı men Wlttıq statistikada Qazaqstanda auırğandar sanı 869 mıñğa jaqındadı. Degenmen Ükimet koronavirus pen onıñ pnevmoniyasın eki bölek esepteydi.

Pandemiya bastalğalı jalpı virus jwqqandardan 16,6 mıñ adam (KVI+ / U07.1 – 9495, KVI- / U07.2 – 4485, ilespe aurulardan – 2633) qaytıs bolğan. Alayda Qazaqstan biligi boyınan koronavirus tabılsa da, basqa aurulardıñ sebebinen qaytıs boldı delingenderdi jalpı statistikağa engizbeydi. Bwğan qarsı sarapşılardıñ sözine qarağanda, koronavirustıñ janama äserinen qaytqandardıñ jartısınan astamınıñ sebebi qan aynalımı jüyesiniñ auruları bolğandıqtan, oğan infekciya dert qozdıruşı faktor retinde ölimge äkep soqtırğan.

Qazaqstan virus taraluı boyınşa älemde Djons Hopkins universiteti jäne DDSW tizimindegi 221 el men aymaqtıñ arasında 36-orınğa ornıqtı.

Ükimettiñ soñğı deregine qarağanda, Qazaqstanda 5,5 mln adam koronavirusqa qarsı vakcinanı tolıq alğan, al keminde birinşi dozası egilgen jwrttıñ sanı 6,7 mln-nan asadı.

The Qazaq Times