الماتى قالاسىنداعى ورتالىق كلينيكالىق اۋرۋحاناسىنىڭ جانساقتاۋ بولىمىندە كوروناۆيرۋستىڭ اسقىنعان تۇرىمەن اۋىرىپ جاتقان ناۋقاستار. 15 شىلدە 2021 جىل. فوتو: QT / كۇلتەگىن اسپانۇلى

قازاقستاندا كوروناۆيرۋس پەن وعان ۇقساس پنەۆمونياعا شالدىققاندار سانى تاعى 5,3 مىڭعا ارتىپ، جالپى ەسەبى 869 مىڭعا جۋىقتادى.

بيىلعى جاز مەزگىلى قازاقستاندىقتار ءۇشىن قارالى حابارعا تولى بولدى. پاندەميا باستالعالى 1,5 جىلدىڭ ىشىندە انىقتالعان بارلىق اۋرۋشاڭدىق پەن ءولىم جاعدايىنىڭ جارتىسى تەك وتكەن جازدا، ءتورتىنشى تولقىندا تىركەلدى. بۇل – وتە اۋىر كورسەتكىش. ماۋسىم ايىندا 38 مىڭعا جۋىق ادام اۋىرسا، بۇل شىلدە ايىندا 4 ەسەگە اسقىنىپ 159 مىڭ ادام سىرقاتتاندى. ال تامىز ايىندا ءتىپتى ورشەلەنىپ دەرت جۇققاندار قاتارى 222 مىڭنان استى.

سايكەسىنشە وسى ارالىقتا ءولىم جاعدايى دا جيىلەدى. 487 ادام قايتىس بولعان ماۋسىم ايىنا قاراعاندا شىلدەدە ءولىم 4 ەسەگە كۇرت ءوسىپ، 1932 ادام كوز جۇمدى. تامىزدا ماۋسىم ايىمەن سالىستىرعاندا، مارقۇمدار قاتارى 8,6 ەسەگە كوبەيىپ، 4197 ازامات توسەك ۇستىندە ومىردەن وزدى.

شىلدەگە قاراي ەكپىن العان ىندەتتىڭ ءتورتىنشى تولقىنى قازاقستان ءۇشىن قىمباتقا ءتۇسۋ سەبەبىن دەنساۋلىق ساقتاۋ مينيسترلىگى كوروناۆيرۋستىڭ ۇندىستاندىق دەلتا شتامىنىڭ تارالۋىمەن، ازاماتتاردىڭ ۋاقتىلى ۆاكتسينالانباۋىمەن جانە مەدقىزمەتكە جۇگىنبەۋىمەن تۇسىندىرەدى.

شىلدە ايىنىڭ ورتاسىنا قاراي تاۋلىكتىك سىرقاتتار سانى 5 مىڭنىڭ، تامىزعا قاراي 7 مىڭنىڭ ۇستىنە شىققان ىندەت قارقىنى ءۇش كۇننەن بەرى 5 مىڭ كەيسكە ماڭايلادى. دەنساۋلىق ساقتاۋ مينيسترلىگىنىڭ رەسمي مالىمەتىنشە، ەلدە 31 تامىزدا كوروناۆيرۋس (كۆي+) جۇققان 4880 ادام، ال 31-ءى كۇنى  كوروناۆيرۋس پنەۆمونياسىنا (كۆي-) شالدىققان 460 ادام تىركەلدى جانە سەيسەنبىدە 114 قازاقستاندىق اۋرۋدان قايتىس بولدى. قازىر ەلدە 105 مىڭ ادام (كۆي+ بويىنشا 97 مىڭ، كۆي- بويىنشا 7 مىڭ) اۋىرىپ جاتىر.

#COVID وتكەن كۇنى پتر تەستى ارقىلى كوروناۆيرۋس جۇققانى راستالعان ناۋقاستار قاتارى تاعى ارتتى. ولاردىڭ باسىم بولىگى ادەتتەگىدەي جوعارى ديناميكادا تۇرعان الماتى (1264) قالاسى جانە قاراعاندى (648) وبلىسىنان. بۇدان وزگە الماتى (282), استانا (315) جانە اقتوبە (302), پاۆلودار (265), اقمولا (246), ماڭعىستاۋ (239), قوستاناي (237) وبلىستارىندا ەپيداحۋال ءالى دە ناشار كۇيدە. شقو (201), اتىراۋ (198) شىمكەنت (180), جامبىل (99), سقو (75), قىزىلوردا (133), بقو (140), تۇركىستان (56) وڭىرلەرىندە دەرت قارقىنى باسەڭدەر ەمەس. كەشە، سارسەنبىدە اۋرۋدان ايىققان 10 644 ادام ۇيىنە شىعارىلعان. 31 تامىزدا جيىنى 93 ادام قايتىس بولعان.

#COVID_پنەۆمونياسى تامىزدىڭ 31-ءى اقپاراتى ءبىر تاۋلىككە كەشىگىپ بەرىلەتىن كوروناۆيرۋس پنەۆمونياسىنا شالدىققان 460 ناۋقاس ەسەپكە الىندى. ۆەدومستۆو دەرەگىنشە، سەيسەنبى كۇنى سىرقاتتار الماتى وبلىسى (91), شىمكەنت (57), جامبىل (53), ماڭعىستاۋ (45), اتىراۋ (39), اقتوبە (35) وبلىستارىندا كوپتەپ انىقتالعان. سونىمەن قوسا، 167 ادام ايىعىپ شىققان، تاعى 21 ادام كوز جۇمعان.

#جالپى  دەنمين دەرەگىنە قاراعاندا، ەمدەلىپ جاتقان 105 مىڭداي ناۋقاستىڭ 22 مىڭنان استامى اۋرۋحانادا، 82 مىڭى امبۋلاتورلىق باقىلاۋدا. 1590 ناۋقاستىڭ جاعدايى ناشار، ونداعى 479 ادامنىڭ ءحالى وتە اۋىر. بۇدان وزگە 226 سىرقات وكپەنى جاساندى جەلدەتۋ اپپاراتىمەن تىنىستاپ جاتىر.

ەپيدكارتادا «جاسىل ايماقتاعى» تۇركىستان وبلىسىنان باسقا شقو، جامبىل وڭىرلەرى «سارى ايماققا» وتكەن. باسقا 14 ايماق تۇتاستاي «قىزىل ايماقتا» تۇر.

دەنميننىڭ QT رەداكتسياسىنا بەرگەن مالىمەتىنشە، 11 ناۋرىز بەن 12 شىلدە ارالىعىندا پتر تەستى وڭ كورسەتكەن 1311 سىناما سەكۆەنيرلەنگەن (شتامم ءتۇرىن انىقتايتىن تالداۋ). سايكەسىنشە، بيىل كوكتەم-جازدا گەنومدىق زەرتتەۋ ناتيجەسىندە ەلدىڭ باسىم بولىگىنەن ۆيرۋستىڭ برازيليالىق، بريتاندىق، وڭتۇستىكافريكالىق جانە ۇندىستاندىق شتامدارى انىقتالعان.

بىلتىر 13 ناۋرىزدان بەرى COVID-19 ينفەكتسياسىن جۇقتىرعاندار قاتارى 798 مىڭنان، 1 تامىزدان بىلايعى كوروناۆيرۋس پنەۆمونياسى 70 مىڭنان اسقان. ددسۇ دەرەكقورى مەن ۇلتتىق ستاتيستيكادا قازاقستاندا اۋىرعاندار سانى 869 مىڭعا جاقىندادى. دەگەنمەن ۇكىمەت كوروناۆيرۋس پەن ونىڭ پنەۆمونياسىن ەكى بولەك ەسەپتەيدى.

پاندەميا باستالعالى جالپى ۆيرۋس جۇققانداردان 16,6 مىڭ ادام (كۆي+ / U07.1 – 9495, كۆي- / U07.2 – 4485, ىلەسپە اۋرۋلاردان – 2633) قايتىس بولعان. الايدا قازاقستان بيلىگى بويىنان كوروناۆيرۋس تابىلسا دا، باسقا اۋرۋلاردىڭ سەبەبىنەن قايتىس بولدى دەلىنگەندەردى جالپى ستاتيستيكاعا ەنگىزبەيدى. بۇعان قارسى ساراپشىلاردىڭ سوزىنە قاراعاندا، كوروناۆيرۋستىڭ جاناما اسەرىنەن قايتقانداردىڭ جارتىسىنان استامىنىڭ سەبەبى قان اينالىمى جۇيەسىنىڭ اۋرۋلارى بولعاندىقتان، وعان ينفەكتسيا دەرت قوزدىرۋشى فاكتور رەتىندە ولىمگە اكەپ سوقتىرعان.

قازاقستان ۆيرۋس تارالۋى بويىنشا الەمدە دجونس حوپكينس ۋنيۆەرسيتەتى جانە ددسۇ تىزىمىندەگى 221 ەل مەن ايماقتىڭ اراسىندا 36-ورىنعا ورنىقتى.

ۇكىمەتتىڭ سوڭعى دەرەگىنە قاراعاندا، قازاقستاندا 5,5 ملن ادام كوروناۆيرۋسقا قارسى ۆاكتسينانى تولىق العان، ال كەمىندە ءبىرىنشى دوزاسى ەگىلگەن جۇرتتىڭ سانى 6,7 ملن-نان اسادى.

The Qazaq Times