Jambıl oblısındağı jarılıstan köp nısan bülingen. Qazir şığın mölşeri eseptelip jatır. Foto: aşıq derekköz

Qazaqstannıñ TJM taratqan soñğı resmi mälimetke qarağanda, Jambıldağı joyqın jarılıstan qaza tapqandıñ sanı 12-ge jetken.

Ört şığıp, alapat jarılıs bolğan äskeri bölim aumağınan tağı 3 adamnıñ mäyiti tabılğan.

«Jambıl oblısında bolğan tötenşe jağdaydan köz jwmğandar qatarı 12 adamğa jetti. Oqiğa ornında jarılıs saldarın joyuğa jantalasıp jürip jan tapsırğan 3 adamnıñ denesi tabıldı. Marqwmdardıñ jeke deregi anıqtalıp jatır», – delingen vedomstvo habarlamasında.

Ministrliktiñ 50-ge tarta qızmetkeri jaralanğan, iz-tüssiz joğalğanı izdestirilip jatır. Apattıñ kesirinen 98 adam jaralanğan, onıñ 28-i auruhanağa jatqızılğan.

İİM mälimetinşe, äskeri bölim ornalasqan Bayzaq audanında ört-jarılıs saldarın joyu-tazalau jwmısı jalğasuda. Onda saperler men it jetektegen kinolog mamandar da jwmıldırılğan. Öndiristik jäne sauda orındarı, twrğın üyler küzetilip jatqan körinedi. Audanğa barar jol jabılğan, tek arnayı qızmetterdiñ kölikterine ğana kirip-şığuğa rwqsat etilgen.

26 tamızda keşkisin sağat 19.10 şamasında Jambıl oblısı Bayzaq audanındağı äskeri bölimniñ qoymasınan ört şığıp, artı birneşe dürkin alapat jarılısqa wlasqan. Birinşi jarılıstan keyin qoymadağı jalındı söndiruge barğan qauipsizdik qızmetkerleri ekinşi dümpude qaza taptı. Infroqwrılımdar zaqımdalıp, twrğındar zardap şekti. Jüzdegen twrğın üy-jayın tastap, evakuaciya punktterine jayğastırıldı.

The Qazaq Times