قازاقستاننىڭ تجم تاراتقان سوڭعى رەسمي مالىمەتكە قاراعاندا، جامبىلداعى جويقىن جارىلىستان قازا تاپقاندىڭ سانى 12-گە جەتكەن.

ءورت شىعىپ، الاپات جارىلىس بولعان اسكەري ءبولىم اۋماعىنان تاعى 3 ادامنىڭ ءمايىتى تابىلعان.

«جامبىل وبلىسىندا بولعان توتەنشە جاعدايدان كوز جۇمعاندار قاتارى 12 ادامعا جەتتى. وقيعا ورنىندا جارىلىس سالدارىن جويۋعا جانتالاسىپ ءجۇرىپ جان تاپسىرعان 3 ادامنىڭ دەنەسى تابىلدى. مارقۇمداردىڭ جەكە دەرەگى انىقتالىپ جاتىر»، – دەلىنگەن ۆەدومستۆو حابارلاماسىندا.

مينيسترلىكتىڭ 50-گە تارتا قىزمەتكەرى جارالانعان، ءىز-ءتۇسسىز جوعالعانى ىزدەستىرىلىپ جاتىر. اپاتتىڭ كەسىرىنەن 98 ادام جارالانعان، ونىڭ 28-ءى اۋرۋحاناعا جاتقىزىلعان.

ءىىم مالىمەتىنشە، اسكەري ءبولىم ورنالاسقان بايزاق اۋدانىندا ءورت-جارىلىس سالدارىن جويۋ-تازالاۋ جۇمىسى جالعاسۋدا. وندا ساپەرلەر مەن يت جەتەكتەگەن كينولوگ ماماندار دا جۇمىلدىرىلعان. وندىرىستىك جانە ساۋدا ورىندارى، تۇرعىن ۇيلەر كۇزەتىلىپ جاتقان كورىنەدى. اۋدانعا بارار جول جابىلعان، تەك ارنايى قىزمەتتەردىڭ كولىكتەرىنە عانا كىرىپ-شىعۋعا رۇقسات ەتىلگەن.

26 تامىزدا كەشكىسىن ساعات 19.10 شاماسىندا جامبىل وبلىسى بايزاق اۋدانىنداعى اسكەري ءبولىمنىڭ قويماسىنان ءورت شىعىپ، ارتى بىرنەشە دۇركىن الاپات جارىلىسقا ۇلاسقان. ءبىرىنشى جارىلىستان كەيىن قويماداعى جالىندى سوندىرۋگە بارعان قاۋىپسىزدىك قىزمەتكەرلەرى ەكىنشى دۇمپۋدە قازا تاپتى. ينفروقۇرىلىمدار زاقىمدالىپ، تۇرعىندار زارداپ شەكتى. جۇزدەگەن تۇرعىن ءۇي-جايىن تاستاپ، ەۆاكۋاتسيا پۋنكتتەرىنە جايعاستىرىلدى.

The Qazaq Times