17 tamızda ötken sot otırısında Jambıl oblıstıq apellyaciyalıq sotı Tarazda Qandı Qañtarda «WQK podpolkovnigi Dastan Ädilbaydı öltirdi», «qaru-jaraq wrladı jäne saqtadı» dep ayıptalıp, 16 jılğa sottalğan Erbol Jwmanovtıñ apellyaciyalıq şağımı boyınşa qaulı oqıdı. Sot alqasınıñ törağası Nwrmwhammat Abidov birinşi satılı sottıñ ükimin özgerissiz qaldırdı. 

Erbol Jwmanov pen onıñ qorğau tarapı sot qaulısına narazılıq bildirip, aldağı uaqıtta Joğarı sotqa kassaciyalıq şağım tüsiretinderin mälimdedi. Qaulı oqılğanda aydauıl Erbol Jwmanovtı qorğauşılarınan alşaq, zaldıñ esikke jaqın böliginde ornalasqan torğa otırğızdı. Bwğan deyingi sot procesteriniñ barlığında ol jurnalisterge jaqın jerde otırğızılıp kelgen. Aydauıl sot qaulısı oqılıp bitken twsta, onı soñına deyin söyletpey, zaldan alıp ketti.

Sot alqası Nwrahan Mahatov, Aybol Sağıntay, Jaqsılıq Abdullaevtıñ birinşi satılı sot şığarğan ükimderin bwzıp, ärqaysısın 4 jılğa bas bostandığınan ayırdı (birinşi satıdağı sot 5 jılğa sottağan). Process ayaqtalğannan keyin advokattar zaldan şığıp bara jatıp, sottaluşılardıñ tuıstarına basu aytıp, üş aydan keyin merziminen bwrın bosap şığuğa mümkindikteri bar ekenin aytıp jattı.

Tüske deyingi sot otırısında Erbol Jwmanovtıñ qorğau tarapı sot alqasına senimsizdik bildirgen. Erbol Jwmanovtıñ qoğamdıq qorğauşısı Erjan Jwmanov osı uaqıtqa deyin 16 ötinişhat tüsirgenderin, onıñ 12-i qanağattandırılmağanın ayttı. Biraq onı özge sottaluşılar men olardıñ qorğauşıları qoldamadı. Sot alqası osını alğa tartıp, ötinişhattı qanağattandırmadı.

Procesti basınan ayağına deyin zaldıñ artqı böliginde arnayı jasaq baqılap otırdı. Ğimarat sırtında jedel järdem, ört söndiru qızmetiniñ kölikteri twrdı.

Prokuror Sayahat Bağdatwlı qorıtındı sözinde Erbol Jwmanovtıñ raqımşılıq zañın paydalanıp, jazasın öteu merzimin qatañ rejimnen qauipsizdigi ortaşa mekemege auıstırudı swradı.

Ol bwğan deyingi ayıptau aktisinde Jwmanovtıñ 16 jıl jazasın özgerissiz qaldırudı swrağan.

Qandı Qañtar kezinde birinşi satılı sot Erbol Jwmanovtı QR QK 291-babınıñ 3-böligi 4-tarmağı, 24-babınıñ 3-böligi, 287-babınıñ 4-böligi, 380-1-babınıñ 2-böligi 2,10-tarmaqtarımen kinäli dep tanılıp, 16 jılğa bas bostandığınan ayırğan.

Erbol Jwmanovtan bölek, bwl is boyınşa tağı 8 adamğa ükim şıqqan. 28 säuirde sud'ya Qadirbek Nwrjan Nwrahan Mahatov 6 jılğa, Aybol Sağıntay men Jaqsılıq Abdullaevtı 5 jılğa bas bostandığınan ayıru jazasına kesip, Qanat Nwrahanwlı, Ermahan Saylauov, Däuren Nwräliev, Dosmwhammet Sadıqov jäne Salamat Qosanovtı raqımşılıq zañın paydalanıp, sot zalınan bosatqan.

The Qazaq Times