Tarazda «Äruaqtar sottaldı»

Tarazdağı qañtarşılarğa qatıstı el arasında «Äruaqtar sotı» atalıp ketken procestiñ 60-otırısında sud'ya 9 adamnıñ barlığın ayıptı dep tanıdı. Onıñ beseui marqwm bolğan, tağı törteuiniñ üşeui bwltartpau şarasımen izolyatorda qamauda, al bireui qolhatpen qatısıp kelgen. Sottıñ soñı dauğa aynaldı.

Bärin jazıqtı dep tanığan ükim

Jariyalanğan ükimge säykes, zalda otırğan Marat Bekbauov Qılmıstıq kodekstiñ 272-babınıñ 2-böligimen ayıptalıp, eki jılğa bas bostandığınan ayırıldı. Bwltartpau şarasın esepke alğanda, jazanıñ jartısı ötelgen bolıp tanıldı. Sot Ashat Taşekeevti QK 272-babınıñ 3-böligimen kinäli dep tanıdı, raqımşılıq şeñberinde jauapkerşilikten bosadı. Ğani Kerimbaev osı baptıñ 2-böligi negizinde ayıptı dep tanılıp, raqımşılıq pen qamaudağı merzimin eskere otırıp, üş jıl merzimge tağayındalğan jaza tolıq öteldi dep şeşildi. Däl osığan wqsas ayıppen Nwrbol Erejepov jappay tärtipsizdikke qatıstı degen ayıp dälelin taptı degen qorıtındığa keldi. Raqımşılıq zañımen jäne ülgili tärtibi üşin äuelde közdelgen üş jılğa bas bostandığın ayıru jazası toğız ayğa qısqarıp, şarttı türge auıstırıldı.

Odan özge bes marqwmğa da ükim oqıldı. Sud'ya alañda atılğan Erjan Bayjanov, Rays Rısbekov, Nwrswltan Quatbaev, Toqtar Oşaqbaev, Isatay Donbaevtardı Qılmıstıq kodekstiñ 272-babınıñ 2-böligimen ayıptı dep tanıdı. Qaytıs boluına baylanıstı qılmıstıq jauaptılıqtan bosatılatının ayttı.

Marqwmdardıñ tuıstarı sottıñ ädiletsiz ekenin, kelispeytinin mälimdedi.

Bıltır 23 qaraşada bastalğan sot procesinde büginge deyin alpıs otırıs ötkizdi. Aşıq sot procesinde ondağan kuä, marqwm jäne közi tiri sottaluşılardıñ zañdı ökilderi mälimdeme jasağan. Qañtar oqiğası kezinde ortalıq alañda jüzdegen oq atqan İİM qızmetkerleri qaru qoldanğanın aşıq moyındağan. Sottaluşılardıñ qorğau tarabı "tergeuşimen baylanısı bar kümändi kuägerlerden" jauap ala almağan.

27 qañtarda jarıssöz kezeñi ayaqtalarda marqwmdardıñ tuıstarı prokurorlar – Ädilet Üsembaev jäne Ğani Qwrmanov ayıptau aktisimen kelispeytinin jäne tergeudiñ ädiletsiz jürgenin mälimdegen. Sottaluşılar da soñğı sözinde jazıqsız isti bolğanın aytqan.

Sud'ya Bağdat Törekbekwlı. Foto: QT / Kültegin Aspanwlı

Qañtar ayınıñ ayağında memlekettik ayıptauşılar marqwmdar – Rays Rısbekov, Nwrswltan Quatbaev, Erjan Bayjanov, Toqtar Oşaqbaev, Isatay Donbaevtardı ayıptı dep tanudı jäne qılmıstıq jazadan bosatudı swrağan. Sonımen qosa, Marat Bekbauov pen Ashat Täşekeevke – 4 jıl bas bostandığınan ayırudı; Nwrbol Erejepov pen Ğani Kerimbaevqa – közdelgen 3 jıl jazanı raqımşılıqpen 9 ayğa qısqartıp, sot zalınan bosatudı swrağan.

İsti qarağan Taraz qalalıq N2 sotınıñ sud'yası Bağdat Törebekwlı birneşe ret jurnalisterdiñ qızmetin şektep, sot zalınan quıp şıqqan.

Taraz qalasındağı qañtarşılardı ayıptap otırğan prokurorlar - Ädilet Üsembaev jäne Ğani Qwrmanov. Foto: QT / Kültegin Aspanwlı

Advokattar men qwqıq qorğauşılar procesti «sayasi astarı» bar is dep bağalağan. Qañtarşılardıñ qorğau tarabı sottan barlıq isti qısqartıp, aqtaudı swrağan.

Osığan deyin is aşarda sottaluşılarğa terrorizm ayıbı tağılıp, keyin dälel tappay, negizsiz dep tanılıp, alıp tastalğan edi. Bıltır marqwmdardıñ jaqındarı Astanağa birneşe märte barıp, isti toqtatıp, aqtaudı talap etken. Atıp öltirilgen bes marqwmnıñ tuıstarı WQK men prokuratura organdarınıñ jergilikti qızmetkerleri elordağa attanuına türli jolmen köp kedergi jasağanın aytqan.

The Qazaq Times