Qıtaydağı qazaq qalamgeri, audarmaşı Käkeş Qayırjanwlı. Foto: kazakh.people.com.cn

Qazaq ädebieti qarımdı qalamger, darındı audarmaşıdan ayırıldı. Qıtay qazaqtarı arasındağı tanımal audarmaşı, belgili qalamger, Qazaqstandağı ädebiet süyer qauımğa eñbekterimen jaqsı tanıs Käkeş Qayırjanwlı bügin tañğa juıq 76 jasında ömirden ötti.

Käkeş Qayırjanwlı 1941 jılı Şıñjañ ölkesi, İle qazaq avtonomiyalı oblısı, Tarbağatay aymağı, Tolı audanında düniege kelgen. Şıñjañ ölkelik partkom keñse ister meñgermesiniñ audarmaşılar basqarması, Şıñjañ halıq radiosınıñ qazaq redakciyası, Şıñjañ televiziyası qazaq bölimi sekildi orındarda qızmet  istedi. Şıñjañ televiziyası qazaq redakciyasınıñ alğaşqı meñgeruşisi boldı. Audarmaşı «Kalila men Demina»,  «Osızamanğı şetel jazuşılarınıñ äñgimelerinen»,  «Sak'ya Muni»,  «Qwran hikayaları» (Qazaqstan «Jalın» baspası köşirip basqan) jäne «Çiñ äuleti saray jılnamalarındağı qazaqqa qatıstı derekter» (Qaharman Mwqanwlımen birge audarğan),  «Qıtay tarihındağı qazaqqa qatıstı derekter» (Äbdildabek Aqıştay, Şadıman Aqımet qatarlılarmen birlesip audarğan) sındı audarmaları jarıq körgen. «Qwran hikayaları» ölkelik qoğamdıq ğılım salası boyınşa 3 retki tañdaulı kitaptardı saraptauda 1 därejeli sıylıq alğan. «Söz sandıq» attı qımbattı qazına 2010 jılı «Wlttar» baspasınan qaytalay basılumen qatar, 2014-jılı Qazaqstannıñ öner baspasınan memlekettik bağdarlama ayasında basılğan.

Käkeş Qayırjanwlı terminologiya, audarma, ädebi til, ädep jüyesi sekildi taqırıptarda qıruar qwndı maqalalar jazdı. «Aqparattıq ädebi til –  wlttıq til mädenietimizdiñ aynası»,  «Sözdik qwrılısımızğa üñilsek» qatarlı maqalaları memlekettik jäne ölkelik 1 därejeli sıylıqtı enşiledi. Qalamgerge Memlekettik Keñes ükimettik erekşe stipendiat iegeri atağın bergen.

Marqwmnıñ jatqan jeri jaylı, topırağı torqa bolsın!

“The Qazaq Times”