بەلگىلى قالامگەر، اۋدارماشى كاكەش قايىرجانۇلى ومىردەن ءوتتى

قازاق ادەبيەتى قارىمدى قالامگەر، دارىندى اۋدارماشىدان ايىرىلدى. قىتاي قازاقتارى اراسىنداعى تانىمال اۋدارماشى، بەلگىلى قالامگەر، قازاقستانداعى ادەبيەت سۇيەر قاۋىمعا ەڭبەكتەرىمەن جاقسى تانىس كاكەش قايىرجانۇلى بۇگىن تاڭعا جۋىق 76 جاسىندا ومىردەن ءوتتى.

كاكەش قايىرجانۇلى 1941 جىلى شىڭجاڭ ولكەسى، ىلە قازاق اۆتونوميالى وبلىسى، تارباعاتاي ايماعى، تولى اۋدانىندا دۇنيەگە كەلگەن. شىڭجاڭ ولكەلىك پارتكوم كەڭسە ىستەر مەڭگەرمەسىنىڭ اۋدارماشىلار باسقارماسى، شىڭجاڭ حالىق راديوسىنىڭ قازاق رەداكتسياسى، شىڭجاڭ تەلەۆيزياسى قازاق ءبولىمى سەكىلدى ورىنداردا قىزمەت  ىستەدى. شىڭجاڭ تەلەۆيزياسى قازاق رەداكتسياسىنىڭ العاشقى مەڭگەرۋشىسى بولدى. اۋدارماشى «كاليلا مەن دەمينا»،  «وسىزامانعى شەتەل جازۋشىلارىنىڭ اڭگىمەلەرىنەن»،  «ساكيا مۋني»،  «قۇران حيكايالارى» (قازاقستان «جالىن» باسپاسى كوشىرىپ باسقان) جانە «چيڭ اۋلەتى ساراي جىلنامالارىنداعى قازاققا قاتىستى دەرەكتەر» (قاھارمان مۇقانۇلىمەن بىرگە اۋدارعان),  «قىتاي تاريحىنداعى قازاققا قاتىستى دەرەكتەر» (ابدىلدابەك اقىشتاي، شادىمان اقىمەت قاتارلىلارمەن بىرلەسىپ اۋدارعان) سىندى اۋدارمالارى جارىق كورگەن. «قۇران حيكايالارى» ولكەلىك قوعامدىق عىلىم سالاسى بويىنشا 3 رەتكى تاڭداۋلى كىتاپتاردى ساراپتاۋدا 1 دارەجەلى سىيلىق العان. «ءسوز ساندىق» اتتى قىمباتتى قازىنا 2010 جىلى «ۇلتتار» باسپاسىنان قايتالاي باسىلۋمەن قاتار، 2014-جىلى قازاقستاننىڭ ونەر باسپاسىنان مەملەكەتتىك باعدارلاما اياسىندا باسىلعان.

كاكەش قايىرجانۇلى تەرمينولوگيا، اۋدارما، ادەبي ءتىل، ادەپ جۇيەسى سەكىلدى تاقىرىپتاردا قىرۋار قۇندى ماقالالار جازدى. «اقپاراتتىق ادەبي ءتىل –  ۇلتتىق ءتىل مادەنيەتىمىزدىڭ ايناسى»،  «سوزدىك قۇرىلىسىمىزعا ۇڭىلسەك» قاتارلى ماقالالارى مەملەكەتتىك جانە ولكەلىك 1 دارەجەلى سىيلىقتى ەنشىلەدى. قالامگەرگە مەملەكەتتىك كەڭەس ۇكىمەتتىك ەرەكشە ستيپەنديات يەگەرى اتاعىن بەرگەن.

مارقۇمنىڭ جاتقان جەرى جايلى، توپىراعى تورقا بولسىن!

“The Qazaq Times”