الەكسەي تسوي: استانا مەن شىمكەنتتە، تاعى ءۇش وبلىستا ناۋقاستارعا ورىن جەتپەۋى مۇمكىن

قازاقستانداعى كوۆيدتىك رەانيماتسيا جۇكتەمەسى 43%-عا جانە اۋرۋحاناداعى توسەك-ورىندار 53%-عا تولعان. بىلتىرعا قاراعاندا الماتى، شىمكەنت قالالارى جانە اقتوبە، قىزىلوردا وبلىستارىندا دەنساۋلىق ساقتاۋ سالاسىنىڭ جۇكتەمەسى اۋىرلاعان.

سارسەنبى كۇنى ورتكوم الاڭىندا وتكەن دەنساۋلىق ساقتاۋ مينيسترلىگىنىڭ ءداستۇرلى بريفينگىندە مينيستر الەكسەي تسوي رەسمي بايانداماسىندا كەيىنگى ەكى اپتادا (COVID بويىنشا) اۋرۋشاڭدىق كوبەيىپ، 80 مىڭ سىرقات تىركەلگەنىن مالىمدەدى.

قازىر ەلدە وتاندىق مەديتسينا جۇكتەمەسى ەكى ەسەگە ارتىپ، 90 مىڭعا جۋىق ادام ەمدەلىپ جاتىر، ونىڭ مىڭ شاقتىسى وكپەنى جاساندى جەلدەتۋ اپپاراتىمەن (يۆل) تىنىستاپ جاتىر. شىلدە ايىنىڭ باسىمەن سالىستىرعاندا ءحالى اۋىر ناۋقاستار قاتارى 2,1 ەسەگە وسكەن.

مينيستر الەكسەي تسويدىڭ ايتۋىنشا، كەيبىر ايماقتاردا اۋرۋحانالاردا توسەك-ورىن جەتىسپەۋى مۇمكىن. مۇنداي وڭىرلەر قاتارىندا اقتوبە، اقمولا، قىزىلوردا وبلىستارى مەن شىمكەنت قالاسى بار.

«بىرقاتار وڭىرلەردە ينفەكتسيالىق جانە رەانيماتسيالىق توسەك-ورىن تاپشىلىعى بولۋى مۇمكىن. قاتەر ايماعىندا ەلوردا، شىمكەنت قالالارى جانە اقتوبە، اقمولا، قىزىلوردا وبلىستارى بار. وسى وڭىرلەردە دەنساۋلىق ساقتاۋ جۇيەسىنىڭ جۇكتەمەسى ارتىپ وتىر»، – دەپ ناقتىلادى.

ول قازىرگى كەزدە اۋرۋشاڭدىق پەن ءولىم-ءجىتىمنىڭ 65%-ى استانا، الماتى، شىمكەنت، اتىراۋ جانە قاراعاندى وڭىرلەرىنە تيەسىلى ەكەنىن اتادى.

بىلتىر 13 ناۋرىزدان بەرى COVID-19 ينفەكتسياسىن جۇقتىرعاندار قاتارى 550 مىڭعا جۋىقتادى، 1 تامىزدان بىلايعى كوروناۆيرۋس پنەۆمونياسى 60 مىڭنان استى. ددسۇ دەرەكقورى مەن ۇلتتىق ستاتيستيكادا قازاقستاندا اۋىرعاندار سانى 610 مىڭعا تايادى. دەگەنمەن ۇكىمەت كوروناۆيرۋس پەن ونىڭ پنەۆمونياسىن ەكى بولەك ەسەپتەيدى. پاندەميا باستالعالى جالپى ۆيرۋس جۇققانداردان 11,6 مىڭنان اسا ادام (كۆي+ / U07.1 – 5619, كۆي- / U07.2 – 3660, ىلەسپە اۋرۋلاردان – 2367) قايتىس بولعان. الايدا قازاقستان بيلىگى بويىنان كوروناۆيرۋس تابىلسا دا، باسقا اۋرۋلاردىڭ سەبەبىنەن قايتىس بولدى دەلىنگەندەردى جالپى ستاتيستيكاعا ەنگىزبەيدى.

“The Qazaq Times”