Türkiyanıñ Kabul äuejayındağı qarulı küşteri. Foto: Eurasia Review

«Taliban» qozğalısı Türkiyağa qarata eskertu jasadı. Tälipter türik äskerleri elde qaluın jalğastırsa olarğa qarsı «basqınşı» retinde «jihad» bastaytının mälimedi.

AQŞ pen NATO küşteri Auğanstannan şegingennen keyin Kabul halıqaralıq äuejaydıñ qauipsizdigin qamtamasız etu üşin türik äskerleriniñ elde qaluın Qwrama Ştattar tarabı ötiniş etken bolatın. Al, ötken aptada Türkiya prezidenti Rejep Tayıp Erdoğan Kabul äuejayın qorğau jäne basqaru boyınşa Uaşingtonmen ortaq kelisimge kelgenin mälimdegen edi.

«Taliban» tarabı atalğan şeşimdi ayıptap, Türkiyadan kelisimdi qayta qaraudı ötiniş etken. «Eger bizdiñ elimizde qanday da bir şeteldik küşter bolatın bolsa, onıñ qanday maqsatta elde bolğanına qaramastan biz onı basqınşı retinde sanayımız», – degen tälipter Türkiyağa qaratqan mälimdemesinde.

Kabuldağı Hamid Karzay atındağı halıqaralıq äuejaydıñ qauipsizdigi men jwmısı istep twruı osı eldegi barlıq şeteldik qarım-qatınastar men diplomatiya ökilderiniñ, halıqaralıq wyımdardıñ jwmısı üşin asa mañızdı. Türkiya qorğanıs ministri düysenbidegi sözinde atalğan äuejaydıñ jwmısı toqtaytın bolsa, onda şet memleketter Auğanstandağı diplomattarın keri qaytarıp aludan basqa amalı qalmaytının aytqan. Seysenbi küni Kabuldağı jarılısta kem degende tört adam mert boldı. Al, twtas el köleminde qaqtığıstar joğarı şekte twr.

Kabuldağı halıqaralıq äuejay şeteldik diplomatiya ökilderi üşin asa mañızdı. Foto: TRT World.

«Taliban» wyımı Türkiyağa qarata eskertu berumen qatar eldegi baqılau aymağın keñeytu maqsatındağı şabuıldarın jalğastırıp jatır. Sarapşılardıñ basım köpşiligi tälipterdiñ qazirgi äreketi olardıñ twtas el köleminde azamattıq soğıs bastağalı otır dep sanaydı. Auğanstannıñ ükimet küşteri köp jağdayda tälipterdiñ qauipinen saqtanu üşin keri şeginip jatır, arasında bülikşilerge bağınıp ketip jatqandarı da bar. Tälipter bolsa köptegen provinciyalardıñ ortalıqtarın qorşauğa alıp twr. Arasında tälipterdiñ baqılauına ötkenderi de, Auğanstan ükimet küşteri keri qaytarıp alıp jatqandarı da bar. Qalay da Kabul biligi eldegi jağdaydı tolıq baqılauğa aluğa bar küşin salıp jatır.

Kabuldağı Hamid Karzay atındağı halıqaralıq äuejay. Foto: äl-Montori. 

Qwrama Ştattarmen kelissöz kezinde tälipter beybitşilikti saqtau, elde terrorlıq toptardıñ qimılına jol bermeu boyınşa uäde etken bolatın. Iran, Resey jäne Katar sekildi arab elderiniñ ara ağayın boluımen ötip jatqan kelissözderde qanday nätijeler barı belgisiz.

“The Qazaq Times”