«تاليبان» تۇرىك اسكەرلەرىنە قارسى جيھاد باستايتىنىن مالىمدەدى

«تاليبان» قوزعالىسى تۇركياعا قاراتا ەسكەرتۋ جاسادى. تالىپتەر تۇرىك اسكەرلەرى ەلدە قالۋىن جالعاستىرسا ولارعا قارسى «باسقىنشى» رەتىندە «جيھاد» باستايتىنىن مالىمەدى.

اقش پەن ناتو كۇشتەرى اۋعانستاننان شەگىنگەننەن كەيىن كابۋل حالىقارالىق اۋەجايدىڭ قاۋىپسىزدىگىن قامتاماسىز ەتۋ ءۇشىن تۇرىك اسكەرلەرىنىڭ ەلدە قالۋىن قۇراما شتاتتار تارابى ءوتىنىش ەتكەن بولاتىن. ال، وتكەن اپتادا تۇركيا پرەزيدەنتى رەجەپ تايىپ ەردوعان كابۋل اۋەجايىن قورعاۋ جانە باسقارۋ بويىنشا ۋاشينگتونمەن ورتاق كەلىسىمگە كەلگەنىن مالىمدەگەن ەدى.

«تاليبان» تارابى اتالعان شەشىمدى ايىپتاپ، تۇركيادان كەلىسىمدى قايتا قاراۋدى ءوتىنىش ەتكەن. «ەگەر ءبىزدىڭ ەلىمىزدە قانداي دا ءبىر شەتەلدىك كۇشتەر بولاتىن بولسا، ونىڭ قانداي ماقساتتا ەلدە بولعانىنا قاراماستان ءبىز ونى باسقىنشى رەتىندە سانايىمىز»، – دەگەن تالىپتەر تۇركياعا قاراتقان مالىمدەمەسىندە.

كابۋلداعى حاميد كارزاي اتىنداعى حالىقارالىق اۋەجايدىڭ قاۋىپسىزدىگى مەن جۇمىسى ىستەپ تۇرۋى وسى ەلدەگى بارلىق شەتەلدىك قارىم-قاتىناستار مەن ديپلوماتيا وكىلدەرىنىڭ، حالىقارالىق ۇيىمداردىڭ جۇمىسى ءۇشىن اسا ماڭىزدى. تۇركيا قورعانىس ءمينيسترى دۇيسەنبىدەگى سوزىندە اتالعان اۋەجايدىڭ جۇمىسى توقتايتىن بولسا، وندا شەت مەملەكەتتەر اۋعانستانداعى ديپلوماتتارىن كەرى قايتارىپ الۋدان باسقا امالى قالمايتىنىن ايتقان. سەيسەنبى كۇنى كابۋلداعى جارىلىستا كەم دەگەندە ءتورت ادام مەرت بولدى. ال، تۇتاس ەل كولەمىندە قاقتىعىستار جوعارى شەكتە تۇر.

كابۋلداعى حالىقارالىق اۋەجاي شەتەلدىك ديپلوماتيا وكىلدەرى ءۇشىن اسا ماڭىزدى. فوتو: TRT World.

«تاليبان» ۇيىمى تۇركياعا قاراتا ەسكەرتۋ بەرۋمەن قاتار ەلدەگى باقىلاۋ ايماعىن كەڭەيتۋ ماقساتىنداعى شابۋىلدارىن جالعاستىرىپ جاتىر. ساراپشىلاردىڭ باسىم كوپشىلىگى تالىپتەردىڭ قازىرگى ارەكەتى ولاردىڭ تۇتاس ەل كولەمىندە ازاماتتىق سوعىس باستاعالى وتىر دەپ سانايدى. اۋعانستاننىڭ ۇكىمەت كۇشتەرى كوپ جاعدايدا تالىپتەردىڭ قاۋىپىنەن ساقتانۋ ءۇشىن كەرى شەگىنىپ جاتىر، اراسىندا بۇلىكشىلەرگە باعىنىپ كەتىپ جاتقاندارى دا بار. تالىپتەر بولسا كوپتەگەن پروۆينتسيالاردىڭ ورتالىقتارىن قورشاۋعا الىپ تۇر. اراسىندا تالىپتەردىڭ باقىلاۋىنا وتكەندەرى دە، اۋعانستان ۇكىمەت كۇشتەرى كەرى قايتارىپ الىپ جاتقاندارى دا بار. قالاي دا كابۋل بيلىگى ەلدەگى جاعدايدى تولىق باقىلاۋعا الۋعا بار كۇشىن سالىپ جاتىر.

كابۋلداعى حاميد كارزاي اتىنداعى حالىقارالىق اۋەجاي. فوتو: ءال-مونتوري. 

قۇراما شتاتتارمەن كەلىسسوز كەزىندە تالىپتەر بەيبىتشىلىكتى ساقتاۋ، ەلدە تەررورلىق توپتاردىڭ قيمىلىنا جول بەرمەۋ بويىنشا ۋادە ەتكەن بولاتىن. يران، رەسەي جانە كاتار سەكىلدى اراب ەلدەرىنىڭ ارا اعايىن بولۋىمەن ءوتىپ جاتقان كەلىسسوزدەردە قانداي ناتيجەلەر بارى بەلگىسىز.

“The Qazaq Times”