دەنساۋلىق ساقتاۋ سالاسىنىڭ ەكس-ءمينيسترى ەلجان ءبىرتانوۆ پەن ونىڭ ورىنباسارى بولعان ولجاس ابىشەۆكە قاتىستى قوزعالعان سوتقا دەيىنگى تەرگەۋ پروتسەسى اياقتالدى. بۇل جونىندە پرەزيدەنتتىككە تىكەلەي باعىنىستى قارجىلىق مونيتورينگ اگەنتتىگى مالىمدەدى.
تەرگەۋ ورگاندارىنىڭ رەسمي حابارلاماسىنا قاراعاندا، كۇدىكتىلەردىڭ سەبەبىنەن مەملەكەتكە 1,5 ملرد تەڭگە (4,1 ملن دوللار) كولەمىندە شىعىن كەلگەن. بۇعان دەيىن ءبىرتانوۆ ۇستالعان بويدا تامىز ايىندا ۆيتسە-مينيستر ولجاس ابىشەۆكە اقپاراتتىق جۇيە قۇرۋعا بولىنگەن جارتى ميلليارد تەڭگە قاراجاتتى جىمقىردى دەگەن ايىپ تاعىلعان.
قارجىلىق مونيتورينگ اگەنتتىگى ءبىرتانوۆ پەن ابىشەۆ قىزمەتتىك وكىلەتىن اسىرا پايدالانا وتىرىپ «ىسكە جارامسىز» اقپاراتتىق رەسۋرستى قابىلداپ-پايدالانۋعا بەرگەنى ءۇشىن ايىپتالعانىن حابارلادى.
«بۇل پلاتفورما دەنساۋلىق ساقتاۋ جۇيەسىندەگى پروبلەمالاردى دەر كەزىندە شەشۋگە ارنالعان. وندا ناۋقاستار، ءدارى-دارمەكتەر جانە مەديتسينالىق بۇيىمدار تۋرالى بارلىق اقپارات جيناقتالىپ-وڭدەلۋى ءتيىس ەدى. قازىرگى كەزدە پلاتفورما جۇمىس ىستەپ تۇرعان جوق جانە مەديتسينالىق مەكەمەلەردىڭ پايدالانا الماي وتىر. قولعا تۇسكەن ايعاقتار سونى دالەلدەيدى»، – دەلىنگەن اگەنتتىك ءباسپاسوز قىزمەتىنىڭ رەسمي حابارىندا.
وسىعان قوسا، ءبىرتانوۆتىڭ بىلتىر ماۋسىم ايىندا «سانيتارلىق اۆياتسيانى جەكە ماقساتقا پايدالاندى» دەگەن كۇدىككە ءىلىنىپ وتىرعانىن دا حابارلاندى. قازىرگى تاڭدا تاراپتار قىلمىستىق ءىس ماتەريالدارىمەن تانىسىپ جاتىر.
2020 جىلعى «ماۋسىم-شىلدە قىرعىنى» كەزىندە ۇستالىپ, وسى كۇنگە دەيىن ۇيقاماقتا وتىرعان ءبىرتانوۆ وزىنە تاعىلعان ايىپتاردى مويىندامايدى.
جۋىردا جاۋاپكەر ەكس-شەنەۋنىكتىڭ قورعاۋشىسى مەدپلاتفورمانىڭ ىستەپ تۇرعانىن، ونىڭ جارامسىزدىعىنا رەسۋرستى جاساعان Ericsson Nikola Tesla وكىلدەرى، نە مەردىگەر، نە قابىلداۋ كوميسسيا مۇشەلەرى ىسكە تارتىلماۋ سەبەبىن سۇراعان. ءىس بارىسىن بۇگە-شۇگەسىنە دەيىن باقىلاپ جۇرگەن ازاتتىق راديوسىنىڭ دەرەگىنشە، ادۆوكات دميتري كۋرياچەنكو «تەرگەۋ ورگاندارىنىڭ ارەكەتى ءىستى وبەكتيۆتى جۇرگىزۋگە ەمەس، ءبىرتانوۆتى قۋدالاۋعا باعىتتالىپ وتىرعانىن» مالىمدەگەن.
3,5 جىل (2017 جىلعى قاڭتار مەن 2020 جىلعى ماۋسىم ايلارىنىڭ ارالىعىندا) دەنساۋلىق ساقتاۋ ءمينيسترى بولعان ەلجان ءبىرتانوۆتىڭ ورنىنا بىلتىر 30 ماۋسىم كەلە سالا كومانداسىن قايتا جاساقتاعان الەكسەي تسوي تاعايىندالدى. كەيبىر ساراپشىلار ءبىرتانوۆتى بيلىك پەن ۇكىمەتتىڭ بىلىكسىزدىگىنەن كۇرت ورشىگەن «ماۋسىم-شىلدە قىرعىنىنىڭ» جاۋاپكەرشىلىگىن موينىنا الۋعا شالىنعان قۇرباندىق» رەتىندە ەسەپتەيدى.
شەرزاتتىڭ ءولىمى ىسىنە قاتىستى قۇپيا ۆيدەونى جاريالاۋ كىمگە كەرەك بولدى؟ – ساراپشىلار مەديا سىنى
24 قازان – كىتاپحاناشىلار مەرەكەسى قۇتتى بولسىن!
«ۋچاسكەدەن ارۋاققا كوك حات»: الماتىدا مارقۇمعا كەلگەن شاقىرتۋ
كوميسسيا مەن باقىلاۋشى ەسەبىندەگى ايىرماشىلىق: الماتىدا رەفەرەندۋم قالاي ءوتىپ جاتىر؟
ء"ادىل قازاقستان، ەستيتىن مەملەكەت" ەندى ادۆوكاتتارعا قىسىم جاساي باستادى ما؟
«پسەۆدو-بايقاۋشى» الدە كاسىبي باقىلاۋشى: رەفەرەندۋمدى كىم باقىلايدى؟