Köktemgi tolqın – 2021. Dälizdegi därigerler. I.S.Jekenova atındağı qalalıq klinikalıq jwqpalı aurular auruhanasınıñ Türksib audanındağı filialı. 25 naurız 2021 jıl. Almatı qalası. Foto: QT / Kültegin Aspanwlı

Elde indetke şaldıqqandar qatarı 2826 adamğa köbeyip, tağı 34 nauqas köz jwmdı. Saldarınan Qazaqstannıñ jartısınan astam böligi qızıl aymaqqa ötti,jağday tek ŞQO men Türkistan oblıstarında ğana äzirge twraqtı. Ökpeni jasandı jeldetu apparatına tañılğan nauqastar men jansaqtau bölimindegi sırqattardıñ sanı arttı.  Astana, Almatı qalaları men Qarağandı oblısında, äsirese Batıs aymağında epidahual edäuir naşarladı.

Densaulıq saqtau ministrliginiñ resmi mälimetinşe, elde 7 şildede koronavirus (KVI+) jwqqan 2800 adam, al 6-sı koronavirus pnevmoniyasına (KVI-) şaldıqqan 26 adam tirkeldi. Qazir elde 35,5 mıñnan asa adam (KVI+ boyınşa 34 265, KVI- boyınşa 1289) auırıp jatır.

#COVID PTR testi arqılı koronavirus jwqqanı rastalğan nauqastardıñ basım böligi ädettegidey astana (794),  Qarağandı oblısı (349) jäne Almatı qalasında (340) tirkeldi. Bwdan özge BQO (179), Mañğıstau (154), Atırau (149), Aqmola (129), Pavlodar (126) oblıstarında jäne Şımkentte (133) dert üdep baradı. Ötken täulikte 1383 adam ayığıp şığıp, üyine jiberilgen. Osı seysenbide jiını 28 adam qaytıs bolğan.

#COVID_pnevmoniyası 6 şildede aqparatı bir täulikke keşigip beriletin koronavirus pnevmoniyasına şaldıqqan 26 nauqas esepke alındı. Demalıs küni bolğandıqtan, mehhanikalıq täsilmen jinalıp-öñdeletin pnevmoniya deregi edäuir kemigen. Vedomstvo dereginşe, olar Qostanay (9), Aqmola, Qostanay oblıstarı jäne astanada (ärqaysında üş-üşten) köptep anıqtalğan. Sonımen qosa, 44 adam ayığıp şıqqan, tağı 6 adam köz jwmğan.

DenMin habarınşa, 1 şildede PTR skriningi negizinde 414 sınama jürgizilgen. Säykesinşe, barlıq ülginiñ 48,3%-ınan Qazaqstannıñ tügel aymağınan ündistandıq «Del'ta» ştamı anıqtalğan.

#Jalpı  DenMin deregine qarağanda, emdelip jatqan 35 554 nauqastıñ 11 mıñğa juığı auruhanada, 24,5 mıñı ambulatorlıq baqılauda. Ahualı naşar 709 nauqastıñ jağdayı naşar, ondağı 161 adamnıñ häli öte auır. Bwdan özge 91 sırqat ökpeni jasandı jeldetu apparatımen tınıstap jatır.

Ötken küngi derek boyınşa, virustıñ taralu qateri jağınan astana, Almatı, Şımkent qalaları men Aqmola, Atırau, BQO, Qarağandı, Mañğıstau, Pavlodar oblıstarı «qızıl aymaqqa» endi. Almatı, Aqtöbe, Jambıl, Qostanay, Qızılorda, Soltüstik Qazaqstan öñirleri «sarı aymaqta» twr. Qazaqstan twstas qızıl reñge boyaldı.

Ükimet mälimetinşe, biıl köktem-jazda genomdıq zertteu nätijesinde eldiñ basım böliginen virustıñ braziliyalıq, britandıq, oñtüstikafrikalıq jäne ündistandıq ştamdarı anıqtalğan.

Bıltır 13 naurızdan beri COVID-19 infekciyasın jwqtırğandar qatarı 445 mıñğa, 1 tamızdan bılayğı koronavirus pnevmoniyası 57,5 mıñğa jetken. DDSW derekqorı men Wlttıq statistikada Qazaqstanda auırğandar sanı 502 mıñnan asqan. Degenmen Ükimet koronavirus pen onıñ pnevmoniyasın eki bölek esepteydi.

Pandemiya bastalğalı jalpı virus jwqqandardıñ 10 mıñdayı (KVI+ / U07.1 – 4544, KVI- / U07.2 – 3476, ilespe aurulardan – 1962) qaytıs bolğan. Alayda Qazaqstan biligi boyınan koronavirus tabılsa da, basqa aurulardıñ sebebinen qaytıs boldı delingenderdi jalpı statistikağa engizbeydi. Bwğan qarsı sarapşılardıñ sözine qarağanda, koronavirustıñ janama äserinen qaytqandardıñ jartısınan astamınıñ sebebi qan aynalımı jüyesiniñ auruları bolğandıqtan, oğan infekciya dert qozdıruşı faktor retinde ölimge äkep soqtırğan.

Qazaqstan virus taraluı boyınşa älemde Worldometers derekqorı, Djons Hopkins universiteti jäne DDSW tizimindegi 221 el men aymaqtıñ arasında 44-orında twr.

Ükimettiñ soñğı deregine qarağanda, Qazaqstanda 2 mln 283 mıñ adam koronavirusqa qarsı vakcinanı tolıq alğan.

"The Qazaq Times"