كوكتەمگى تولقىن – 2021. دالىزدەگى دارىگەرلەر. ي.س.جەكەنوۆا اتىنداعى قالالىق كلينيكالىق جۇقپالى اۋرۋلار اۋرۋحاناسىنىڭ تۇركسىب اۋدانىنداعى فيليالى. 25 ناۋرىز 2021 جىل. الماتى قالاسى. فوتو: QT / كۇلتەگىن اسپانۇلى

ەلدە ىندەتكە شالدىققاندار قاتارى 2826 ادامعا كوبەيىپ، تاعى 34 ناۋقاس كوز جۇمدى. سالدارىنان قازاقستاننىڭ جارتىسىنان استام بولىگى قىزىل ايماققا ءوتتى،جاعداي تەك شقو مەن تۇركىستان وبلىستارىندا عانا ازىرگە تۇراقتى. وكپەنى جاساندى جەلدەتۋ اپپاراتىنا تاڭىلعان ناۋقاستار مەن جانساقتاۋ بولىمىندەگى سىرقاتتاردىڭ سانى ارتتى.  استانا، الماتى قالالارى مەن قاراعاندى وبلىسىندا، اسىرەسە باتىس ايماعىندا ەپيداحۋال ەداۋىر ناشارلادى.

دەنساۋلىق ساقتاۋ مينيسترلىگىنىڭ رەسمي مالىمەتىنشە، ەلدە 7 شىلدەدە كوروناۆيرۋس (كۆي+) جۇققان 2800 ادام، ال 6-سى كوروناۆيرۋس پنەۆمونياسىنا (كۆي-) شالدىققان 26 ادام تىركەلدى. قازىر ەلدە 35,5 مىڭنان اسا ادام (كۆي+ بويىنشا 34 265, كۆي- بويىنشا 1289) اۋىرىپ جاتىر.

#COVID پتر تەستى ارقىلى كوروناۆيرۋس جۇققانى راستالعان ناۋقاستاردىڭ باسىم بولىگى ادەتتەگىدەي استانا (794),  قاراعاندى وبلىسى (349) جانە الماتى قالاسىندا (340) تىركەلدى. بۇدان وزگە بقو (179), ماڭعىستاۋ (154), اتىراۋ (149), اقمولا (129), پاۆلودار (126) وبلىستارىندا جانە شىمكەنتتە (133) دەرت ۇدەپ بارادى. وتكەن تاۋلىكتە 1383 ادام ايىعىپ شىعىپ، ۇيىنە جىبەرىلگەن. وسى سەيسەنبىدە جيىنى 28 ادام قايتىس بولعان.

#COVID_پنەۆمونياسى 6 شىلدەدە اقپاراتى ءبىر تاۋلىككە كەشىگىپ بەرىلەتىن كوروناۆيرۋس پنەۆمونياسىنا شالدىققان 26 ناۋقاس ەسەپكە الىندى. دەمالىس كۇنى بولعاندىقتان، مەححانيكالىق تاسىلمەن جينالىپ-وڭدەلەتىن پنەۆمونيا دەرەگى ەداۋىر كەمىگەن. ۆەدومستۆو دەرەگىنشە، ولار قوستاناي (9), اقمولا، قوستاناي وبلىستارى جانە استانادا (ارقايسىندا ءۇش-ۇشتەن) كوپتەپ انىقتالعان. سونىمەن قوسا، 44 ادام ايىعىپ شىققان، تاعى 6 ادام كوز جۇمعان.

دەنمين حابارىنشا, 1 شىلدەدە پتر سكرينينگى نەگىزىندە 414 سىناما جۇرگىزىلگەن. سايكەسىنشە، بارلىق ۇلگىنىڭ 48,3%-ىنان قازاقستاننىڭ تۇگەل ايماعىنان ۇندىستاندىق «دەلتا» شتامى انىقتالعان.

#جالپى  دەنمين دەرەگىنە قاراعاندا، ەمدەلىپ جاتقان 35 554 ناۋقاستىڭ 11 مىڭعا جۋىعى اۋرۋحانادا، 24,5 مىڭى امبۋلاتورلىق باقىلاۋدا. احۋالى ناشار 709 ناۋقاستىڭ جاعدايى ناشار، ونداعى 161 ادامنىڭ ءحالى وتە اۋىر. بۇدان وزگە 91 سىرقات وكپەنى جاساندى جەلدەتۋ اپپاراتىمەن تىنىستاپ جاتىر.

وتكەن كۇنگى دەرەك بويىنشا، ۆيرۋستىڭ تارالۋ قاتەرى جاعىنان استانا، الماتى، شىمكەنت قالالارى مەن اقمولا، اتىراۋ، بقو، قاراعاندى، ماڭعىستاۋ، پاۆلودار وبلىستارى «قىزىل ايماققا» ەندى. الماتى، اقتوبە، جامبىل، قوستاناي، قىزىلوردا، سولتۇستىك قازاقستان وڭىرلەرى «سارى ايماقتا» تۇر. قازاقستان تۇستاس قىزىل رەڭگە بويالدى.

ۇكىمەت مالىمەتىنشە، بيىل كوكتەم-جازدا گەنومدىق زەرتتەۋ ناتيجەسىندە ەلدىڭ باسىم بولىگىنەن ۆيرۋستىڭ برازيليالىق، بريتاندىق، وڭتۇستىكافريكالىق جانە ۇندىستاندىق شتامدارى انىقتالعان.

بىلتىر 13 ناۋرىزدان بەرى COVID-19 ينفەكتسياسىن جۇقتىرعاندار قاتارى 445 مىڭعا، 1 تامىزدان بىلايعى كوروناۆيرۋس پنەۆمونياسى 57,5 مىڭعا جەتكەن. ددسۇ دەرەكقورى مەن ۇلتتىق ستاتيستيكادا قازاقستاندا اۋىرعاندار سانى 502 مىڭنان اسقان. دەگەنمەن ۇكىمەت كوروناۆيرۋس پەن ونىڭ پنەۆمونياسىن ەكى بولەك ەسەپتەيدى.

پاندەميا باستالعالى جالپى ۆيرۋس جۇققانداردىڭ 10 مىڭدايى (كۆي+ / U07.1 – 4544, كۆي- / U07.2 – 3476, ىلەسپە اۋرۋلاردان – 1962) قايتىس بولعان. الايدا قازاقستان بيلىگى بويىنان كوروناۆيرۋس تابىلسا دا، باسقا اۋرۋلاردىڭ سەبەبىنەن قايتىس بولدى دەلىنگەندەردى جالپى ستاتيستيكاعا ەنگىزبەيدى. بۇعان قارسى ساراپشىلاردىڭ سوزىنە قاراعاندا، كوروناۆيرۋستىڭ جاناما اسەرىنەن قايتقانداردىڭ جارتىسىنان استامىنىڭ سەبەبى قان اينالىمى جۇيەسىنىڭ اۋرۋلارى بولعاندىقتان، وعان ينفەكتسيا دەرت قوزدىرۋشى فاكتور رەتىندە ولىمگە اكەپ سوقتىرعان.

قازاقستان ۆيرۋس تارالۋى بويىنشا الەمدە Worldometers دەرەكقورى، دجونس حوپكينس ۋنيۆەرسيتەتى جانە ددسۇ تىزىمىندەگى 221 ەل مەن ايماقتىڭ اراسىندا 44-ورىندا تۇر.

ۇكىمەتتىڭ سوڭعى دەرەگىنە قاراعاندا، قازاقستاندا 2 ملن 283 مىڭ ادام كوروناۆيرۋسقا قارسى ۆاكتسينانى تولىق العان.

"The Qazaq Times"