Qazaqstanda vakcina saldırğan studentter oqu kezinde jäne jataqhana aqşasın tölegen kezde jeñildikke ie boladı. Bwl  turalı bilim jäne ğılım ministrligi habarladı.

Vedomstvo taratqan aqparatqa qarağanda, ükimettiñ materialdıq ıntılandıruına tek studentter ğana emes, wstazdar da ie boladı.

Aqparatqa qarağanda, koronavirusqa qarsı vakcina saldırğan studentter oqu, jataqhanağa twru kezinde jeñildikterge ie bolıp, türli sıylıqtar ala aladı. Sauıqtıru şipajaylarına tegin joldama, tegin tamaqtanu men qoğamdıq kölikti paydalanu talondarına ie boladı. Birqatar oqu orındarında atalğan akciya bastalıp ta ketken.

"Sonımen birge joğarı oqu orındarı vakcina saldırğan studentter üşin şet tilderi, komp'yuterlik sauattılıq jäne käsipkerlik dağdılardı damıtatın tegin kurstar wyımdastırudı josparlap otır. Sonımen qatar ekpe saldırğan keybir universitetterdiñ studentteri fitnes zaldarına, basseynge, teatrğa, kinoteatrğa jäne koncertterge tegin bara aladı" delingen ministrlik habarlamasında.

Vedomstvo  vakcina saldırğan oqıtuşılarğa qosımşa aqı nemese aqılı demalıs aluğa mümkindik qarastırılğanın habarladı.

Qazaqstanda ötken aptadan bastap koronavirusqa qarsı vakcinağa halıq ıntasın oyatu üşin iri vakcina punkterinde kölik, päter oynatıla bastağan. Osı aptada astanada ekpe punkterinde 20 ayfon telefonı oynatıla bastağanı belgili boldı.

Densaulıq saqtau ministrligi seysenbi küni elde vakcinalau qarqını küşeydi dep mälimdedi. Soñğı mälimet boyınşa, elde 3 mln 246 mıñ adam (halıqtıñ 16,7%) vakcinanıñ birinşi dozasın alğan. 1 mln 954 mıñ adamğa vakcinanıñ eki dozası salınğan. Jalpı 5,2 mln doza paydalanılğan.

 

"The Qazaq Times"