ۇكىمەت ۆاكتسينا سالدىرعان ستۋدەنتتەر مەن ۇستازدارعا ماتەريالدىق جەڭىلدىك جاساماقشى

قازاقستاندا ۆاكتسينا سالدىرعان ستۋدەنتتەر وقۋ كەزىندە جانە جاتاقحانا اقشاسىن تولەگەن كەزدە جەڭىلدىككە يە بولادى. بۇل  تۋرالى ءبىلىم جانە عىلىم مينيسترلىگى حابارلادى.

ۆەدومستۆو تاراتقان اقپاراتقا قاراعاندا، ۇكىمەتتىڭ ماتەريالدىق ىنتىلاندىرۋىنا تەك ستۋدەنتتەر عانا ەمەس، ۇستازدار دا يە بولادى.

اقپاراتقا قاراعاندا، كوروناۆيرۋسقا قارسى ۆاكتسينا سالدىرعان ستۋدەنتتەر وقۋ، جاتاقحاناعا تۇرۋ كەزىندە جەڭىلدىكتەرگە يە بولىپ، ءتۇرلى سىيلىقتار الا الادى. ساۋىقتىرۋ شيپاجايلارىنا تەگىن جولداما، تەگىن تاماقتانۋ مەن قوعامدىق كولىكتى پايدالانۋ تالوندارىنا يە بولادى. بىرقاتار وقۋ ورىندارىندا اتالعان اكتسيا باستالىپ تا كەتكەن.

"سونىمەن بىرگە جوعارى وقۋ ورىندارى ۆاكتسينا سالدىرعان ستۋدەنتتەر ءۇشىن شەت تىلدەرى، كومپيۋتەرلىك ساۋاتتىلىق جانە كاسىپكەرلىك داعدىلاردى دامىتاتىن تەگىن كۋرستار ۇيىمداستىرۋدى جوسپارلاپ وتىر. سونىمەن قاتار ەكپە سالدىرعان كەيبىر ۋنيۆەرسيتەتتەردىڭ ستۋدەنتتەرى فيتنەس زالدارىنا، باسسەينگە، تەاترعا، كينوتەاترعا جانە كونتسەرتتەرگە تەگىن بارا الادى" دەلىنگەن مينيسترلىك حابارلاماسىندا.

ۆەدومستۆو  ۆاكتسينا سالدىرعان وقىتۋشىلارعا قوسىمشا اقى نەمەسە اقىلى دەمالىس الۋعا مۇمكىندىك قاراستىرىلعانىن حابارلادى.

قازاقستاندا وتكەن اپتادان باستاپ كوروناۆيرۋسقا قارسى ۆاكتسيناعا حالىق ىنتاسىن وياتۋ ءۇشىن ءىرى ۆاكتسينا پۋنكتەرىندە كولىك، پاتەر ويناتىلا باستاعان. وسى اپتادا استانادا ەكپە پۋنكتەرىندە 20 ايفون تەلەفونى ويناتىلا باستاعانى بەلگىلى بولدى.

دەنساۋلىق ساقتاۋ مينيسترلىگى سەيسەنبى كۇنى ەلدە ۆاكتسينالاۋ قارقىنى كۇشەيدى دەپ مالىمدەدى. سوڭعى مالىمەت بويىنشا، ەلدە 3 ملن 246 مىڭ ادام (حالىقتىڭ 16,7%) ۆاكتسينانىڭ ءبىرىنشى دوزاسىن العان. 1 ملن 954 مىڭ ادامعا ۆاكتسينانىڭ ەكى دوزاسى سالىنعان. جالپى 5,2 ملن دوزا پايدالانىلعان.

"The Qazaq Times"