Fotokollaj: QT

Bauırjan Baybek belsendi Janbolat Mamaydıñ ayıptauların «jala» dep, onı sotqa beretinin ayttı. Tikeley efirde swhbat bergen Baybek «Mamay demokratiyanıñ jauapkerşilik ekenin tüsinui kerek» dep eskertti. Al öz kezeginde belsendi Janbolat Mamay şeneunikti debatqa şaqırdı.

Bwğan deyin Janbolat Mamay jurnalistik zertteuinde Almatı qalasınıñ bwrınğı äkimin qaladağı birqatar «jemqorlıq isterge» qatısı bar dep ayıptağan bolatın. Keyinnen bloger Täñirbergen Berdioñğarovtıñ Youtube arnasında qonaq bolğan Bauırjan Baybek bwl mälimdemege jauap berdi.

Swhbatta Qazaqstannıñ birinşi prezidenti Nazarbaevtıñ «naqıl sözin» keltirgen Baybek: «Elbası ärdayım aytatın, «eger arıñ taza bolsa, oğan senimdi bolsañ, ädil sotta ar-namısıñdı  qorğa» dep. Biz demokratiyalıq memleket qwrıp jatırmız. Biraq demokratiya anarhiya emes, zañsızdıq emes. Bwl – zañnıñ üstemdigi. Är adamnıñ öz atın, abıroyın qorğauğa konstituciyalıq qwqığı bar.

 

...Ol öziniñ sayasi kar'erasın qwrttı. Jiktep aytatın bolsaq, endigi «sayasi ölik» deuge boladı. Partiyanıñ kodeksi men jarğısına say bügin onı azamattıq, äkimşilik is jürgizu şeñberinde sotqa beretinimdi resmi mälimdeymin. Bwlay bolmauı kerek dep esepteymin. Men bwl äreketti bolaşaqta Mamay siyaqtı adamdar kinäsiz adamdardı ayıptamas üşin jasaymın», – dedi.

Sonımen qatar şeneunik özine – jüz emes, on şaqtı kompaniya ğana tiesili ekenin, bäriniñ deklaraciyağa engenin atap ötip, sol üşin salıq töleytinin de aytqan.

Nur Otan partiyası törağasınıñ birinşi orınbasarı Baybek Mamaydıñ mälimdemesine pikir bildirgende tağı bir märte Nazarbaevtı tilge tiek etken. «2015 jılı Elbası bes institucionaldıq reformağa bastama boldı, instituttar turalı ayttı. Qasım-Jomart Kemelwlı bwl ideyanı damıtıp, halıq ünine qwlaq asatın memlekettiñ twjırımdamasın jasadı. Estitin memleket – bwl jay ğana estu emes, sonımen qatar jauap beru. Men memlekettik qızmetker emespin, şın mäninde men onı isteuge mindetti emespin», – dedi ol. Osılayşa, Almatı qalasınıñ bwrınğı äkimi belsendini sotqa beretinin ayttı.

Al şeneunikti debatqa şaqırğan Janbolat Mamay öziniñ Facebook paraqşasında: «Ol meni sotqa beremin dep otır ğoy. Biraq Qazaqstanda ädiletti sot joq. Qazaqstandıq sottardıñ barlığı Nur Otan basşılığı qolında. Atqaruşı bilik ne aytadı, tura sonday şeşim şığaradı. Sondıqtan Baybekke aytqım keledi: eger jasıratın eşteñesi bolmasa, eger osı Nur Otan partiyasınıñ jasap jatqan isteriniñ barlığın dwrıs dep sanasa, onda ol menimen tikeley efirde debatqa şıqsın. Nur Otan-ğa qatıstı, eldiñ damuına qatıstı, öziniñ jemqorlıq isterine qatıstı, jer dauına qatıstı osı mäselelerdiñ barlığın tikeley efirde halıq aldında aşıq talqılayıq», – dedi.

"The Qazaq Times"