Särsenbi eks-nwrotandıq deputat Nwrjan Ältaevtıñ bastamasımen özi jäne qoldauşıları «oppoziciyanıñ wlttıq üylestiru keñesi» dep atağan jiın ötti. Keñes otırısına birqatar belsendiler men sayasatkerler qatıstı. Bilik sınşılarınıñ keybiri eş kedergisiz ötken keñeske kümänmen qaraydı.

Aymaqtardağı belsendiler jiınğa ZOOM jelisi arqılı onlayn qosılıp, pikir bildirdi. Sonday qayratkerlerdiñ biri Rısbek Särsenbaywlı keñestiñ şınayılığına küidktenip, wyımdastırudağı key kemşilikti sınadı. Ol keñes eks-prezident Nwrswltan Nazarbaevtıñ ortanşı küyeubalası Timur Qwlıbaevtıñ bilikke talas jolındağı bolaşaq partiyasınıñ negizin qalau, jarnamalau dep sanaydı. «Nwr Otan» partiyasınan quılğan äri bügingi şarağa mwrındıq bolğan sayasatker Nwrjan Ältaevtıñ «şın küresker» bolarına kümandanadı. Onıñ aytuınşa, eldiñ basın biriktiru – öte qajetti äri kürdeli mäsele, degenmen mwnı azğantay toptıñ qalauımen jüzege asıra qoyu mümkin emes.

«Kez kelgen uaqıtta eldiñ basın ortaq maqsat qana biriktire aladı. Partiya, Wlttıq keñes ne basqası biriktire almaydı. Men osında wyımdastırıp jürgen azamattardıñ tügel derligin bilemin. Niet barda onı iske asıru bar. Soğan kelgen kezde men öte kümändimin. Öytkeni özderiñiz aytatınday wlttıq müddeni qorğau üşin sol wltqa adal-şınayı qızmet etetin azamattar kerek. Jalğan belsendiler men bilik mañayındağı «jobalardıñ» äreketinen erteñ nätije ketip, «nöl» boladı. Osıdan bwrın Nwrjan Ältaev mağan habarlasıp, şetelge ketip bara jatqanın aytıp, oralğan soñ kezdesuge qolqaladı. Biraq sol küyi söylesken de, habarlasqan da joq. Al mwnday öz sözinde twrmaytın adammen qalay birlesuge boladı? Nege Ältaevqa baylanıp otırsızdar? Kimniñ aqparat mümkindigi men qarajatı bolsa, sonıñ ığına jığılatın Wlttıq keñes eşqaşan şınayı bolmaydı. Wlttıq keñes atı bolğanımen, orısşa jürip jatır.  Osı jiınnıñ qwrılımı, bağdarlamasın swrattıq. Eşkim eşteñe bermedi. Dittegeni – äyteuir nieti bir, halıqtı soñına erte alatın azamattardı Ältaevtıñ qorasına kirgizu me? Men bwğan ülken küdikpen qaraymın. Eger ol şın mänindegi küresker bolatın bolsa, onda bwl betalısı deputattıqtan ketkeli bergi pikir-swhbattarında körinis tabar edi. Ol azamattıñ şınayı nieti qanday jäne josparın qalay iske asırmaq? «El men jer» qozğalısı qwrıldı. Wlttıq mäseleni nege sonda-aq şeşpeymiz», – dey bergende Särsenbaywlınıñ sözin moderator Qayırlı Omar böldi.

Oyın tolıq aytuğa böget bolmaudı eskertken sayasatker osı uaqıtqa deyin qwrılğan qozğalıstar aynalasına nege toptaspağanın, jaña alañnıñ nelikten däl Ältaev tirketkisi kelip jürgen «El tiregi» partiyasınıñ janınan aşılğanın swradı.

«Ärqanday närseni qwru oñay, al şındap jwmıs istep, nätije şığaru qiın dünie. Toqeteri, men mına keñeske eşqanday senim artıp otırğanım joq. Tım düdämal körinedi. Bwl Timur Qwlıbaevtıñ erteñ bilikke talas kezindegi bolaşaq partiyasınıñ negizin qalap,  sonı tanımal etu üşin sonıñ töñiregine añğal azamattardı tartu üşin kerek siyaqtı körinedi de twradı. Biraq qatelesuim de mümkin. ...Kezinde Qosanovtıñ satqındığı qoğamdı qanday jağdayğa wşırattı. Mümkin Nwrjan satqın emes şığar, biraq onı da osığan aparuı ıqtimal. Senim bolğan kezde ğana birlesuge boladı. Arada senimge küdik tuğızatın, maqsatı belgisiz adamdarmen birlese küresuge de, barlauğa da bolmaydı», – dep qarsılığın aşıq ayttı.

«El Tiregi» partiyasın qwrudı közdeytin Nwrjan Ältaev Rısbek Särsenbaywlınıñ sınına jauap bere kele, oppoziciyalıq toptar äli künge deyin qırıqpışaq bolıp jürgenin söz etti.

««Rısbek ağamızdı tüsinemin. Bwl meniñ ne «El tiregi» partiyasınıñ keñesi emes, barlığıñızdiki. Men kömektesuge, jwmıstanuğa dayınmın. Meniñ oppoziciyağa kelgenime köp bolğan joq. Biraq, sol eki-üş aydıñ işinde bayqağanım, köptegen oppoziciyalıq partiya ökilderimen kezdesip, söylestim, barlığı ananı swrasañ «oy, ol KNB-nıñ agenti», mınanı swrasañ, «oy, ol Aqordanıñ jobası» dep birin-biri jamandaydı. Bwl kimge jaqsı? Bwdan bilikke ğana jaqsı. Oppoziciya äli künge deyin qırıqpışaq bolıp jür», – dedi Ältaev.

Söz arasında arnayı keñes üşin ğimarattı jalğa alıp bergenin rastadı. Tipti ol keñesti  «soñğı mümkindik» dep atadı.

«Erteñ Reseydiñ ne Qıtaydıñ qwlı bolıp jüremiz. Qaytkende de birigu kerek. Ağalarğa aytatınım – oppoziciyamen aynalısıp jürgenderge öte qiın, tüsinem, osı bastamanı bärimiz qoldayıq», – bilik partiyasın quıldım degen eks-nwrotandıq.

Keñes jwmısı jäne «oppoziciyanı biriktiru» mäselesine qatıstı qatısuşılar türli pikir ayttı. Qazir Ukrainada twrıp jatqan sayasatker Ermek Narımbay «kün tärtibine iri mäsele şığarmay, änşeyin birigu üşin birigu» – bekerşilik dedi. Belsendi Bolatbek Bilälov äueli keñestiñ maqsatın ayqındap alğan dwrıs, odan keyin säykesinşe naqtı mäselelerdi şeşuge tırısu kerek degen wsınıs ayttı.

Jiınnan keyin Rısbek Särsenbaywlına habarlasıp, keñeske qatıstı pikirin bilgen edik. Ol Toqaevtıñ «Wlttıq keñesiniñ» azamattıq qoğam arasındağı «köleñkesine» balaytın 17 naurızda bas qosqan keñesti Nazarbaev «ketken jılğı» prezident saylauı qarsañında qwrılğan «Jaña Qazaqstan» wyımına wqsatadı.

 «Wlttıq keñes men qauiptengendey, bilik jağınan bolğan närse. Solardıñ wyımdastıruımen bolğan dünie. Bwl Toqaevtıñ «Wlttıq keñesi» siyaqtı halıq işinen jasauğa tırısqan köleñkeli nwsqası. Mäsele – şınayılıqta. Mwnıñ barlığın uaqıt aşıp körsetedi ğoy. «Nege birikpeydi, qalay biriktiremiz?» degen şın janaşır azamattar bar ğoy, bwl sonday azamattardı özderiniñ uısına tüsiru siyaqtı mağan. «Jaña Qazaqstan» saylauğa deyin bir jarım, eki jıl bwrın qwrıldı ğoy. Bwl da sol siyaqtı närse. Aldağı uaqıttardağı jäne bügingi küngi kökeytesti mäselelerde halıqtı bölu üşin, barlığı bir maqsatqa qosılıp ketpeui üşin jasap otır bwnı. Şın mäninde, alğaşqı jiınnan-aq nağız küreskerliktiñ ruhı körinbedi. Nwrjan sauattı, bilimdi, jaqsı jigit şığar, biraq men odan şınayı küreskerlik pen sayasatkerlikti körip twrğanım joq. Ol Qwlıbaevtıñ qarauındağı käsipkerler palatasında biraz istedi, şıqqan jeri – sol. Tapsırmamen kelgen adam ğoy. Eñ alğaşqı sayasi ötkir közqarası – bıltır pandemiyağa baylanıstı Mamin esep bersin dep talap qoyğanı bolmasa, bılayğı oppoziciyalıq beynesi ilandırmadı. Mwnday adamdarğa senu – öte qiın, al senip aldanıp qalsa – odan da qiın. Qosanovtan keyin san soğıp qalğan halıq bwl jolı tağı da aldansa, onda küres mäni joğaladı. Zalalı osı. Jalpı keñes Ältaevsız, basqaday täuelsiz adamdarmen qwrılsa, jeke basım qoldar edim. Qazaqstanda qanşa partiya, qanşa qozğalıs bolsa da köptik etpeydi. Kerisinşe olardıñ sanı köp bolğanı jaqsı, sannan sapa şığar edi», – deydi Särsenbaywlı.

«Oppoziciyanıñ wlttıq üylestiru keñesiniñ» otırısına qazir şetelde twrıp jatqan sayasatker Äkejan Qajıgeldin, tirkelmegen Demokratiyalıq partiya bastamaşıl tobınıñ jetekşisi Janbolat Mamay jäne t.b şaqırılğan. Biraq olar jiınğa kelmegen.

Bıltır qaraşa ayınıñ ayağına qaray Mäjilis saylauınıñ qarsañında «Nwr Otan» frakciyasınıñ qwramınan  şıqpay jatıp jaña täuelsiz partiya qwratının mälimdegen Nwrjan Ältaev Timur Qwlıbaev basqaratın «Atameken» Wlttıq käsipkerler palatasında türli deñgeyde basşılıq lauazımda qızmet etken. Keyinnen birer jıl auılşaruaşılıq jäne eñbek vice-ministri orındarında bolğan. 2019 jılğı aqpan ayınan bastap 2020 jılğı qaraşa ayına deyingi şeni – Parlament Mäjilisindegi «Nwr Otan» partiyasınıñ deputatı.

Osılayşa wzaq jıldar memlekettik qızmette bolğan Ältaev endigi jolın oppoziciyağa jalğarına sendirmekke tırısuda. Ol biıl 21 qañtarda azamattıq qoğamğa resmi ükimetke «balama ükimet» qwru jaylı wsınıs jasağan. 30 künde «halıqtıq kabinet» jasaqtaudı josparlağan bastamadan äzirge habar joq.

"The Qazaq Times"