äl-Farabi atındağı QazWU. Foto: aşıq derekköz

Almatı qalasınıñ Jer qatınastarı basqarmasınıñ basşılığı redakciya swrağına oray QazWU jeriniñ jekeniñ qolına ötkeni jönindegi dauğa nükte qoyılğanın habarladı.

Basqarma basşısı Ardaq Samambetov 2021 jıldıñ alğaşqı jartıjıldığında atqarğan jwmısı turalı eki aydan keyin ötkizgen baspasöz jiınında:

«2017 jılı QazWU-dıñ kelisimimen 75 sottıq jer OMIREX kompaniyasına berilgen bolatın. Sodan beri tiisti sottar ötti. Sottıñ şeşimine säykes, jerdiñ barlığı zañdı berilgen. Bwl mäsele jabılğan. Sebebi jer QazWU-dıñ kelisimimen berilgen. 2017, 2018 jıldarı QazWU-dıñ kelisimen tiisti qaulı qabıldanğan. ...Sot nükte qoydı. Sottıñ şeşimi orındaluı kerek. Biıl mamır ayında sot şeşim şığardı. Bwl boyınşa jerdiñ beriluiniñ zañdılığı naqtılandı», – dedi.

Biıl qısta BAQ ökilderi Almatı qalasında ornalasqan äl-Farabi atındağı QazWU qalaşığınıñ aumağındağı jerdiñ bir böligi bastapqıda uaqıtşa jalğa alınıp, keyinnen jekeniñ qolına ötip ketkeni turalı jazıp-habarlağan edi. Jerdi paydalanuğa alğan kompaniya da, universitet te alğaşında mwnı joqqa şığarğan. Keyinnen kompaniya aqparat qwraldarındağı zertteulerden keyin naurız ayında aqparattı rastağan. Kompaniya atalğan aumaqta biznes ortalığı salınatının jäne abattandıru jwmısı jüretinin mälimdegen.

Bwl derekti bilim ministri Ashat Aymağambetov JOO-ğa tiesili jer uçaskesiniñ şamamen 0,8 gektarğa azayğanın rastadı. Ministrliktiñ jwmıs tobı cıbaylas jemqorlıqqa qarsı is-qimıl agenttigimen birlesken tekserisi ayaqsız qalğan. Mwnı azamattıq qoğam belsendileri jerdiñ qazirgi qağaz jüzindegi ieleriniñ biri ıqpal etken boluı mümkin dep topşılaydı.

Dau örşigen aqpan ayında qala äkimi Baqıtjan Sağıntaev oqu ornınıñ jeri jekemenşikke berilmeytinin aytıp, «qazir universitet qaramağındağı jer teliminiñ bäri universitettiñ öz qwziretinde» degen edi. Alayda mausımda sot şeşimdi özgerissiz qaldırğan.

Qoldanıstağı tärtip boyınşa, oqu ornı jerin basqağa bergisi kelse, äkimdikke wsınıs jasauı kerek. Qalaşıqtıñ şwraylı jeri jalğa, artınan jekemenşikke ötken kezde de universitettiñ 11 jıl basqarğan rektor Ğalımqayır Mwtanov bolğan. Ol qoğamdıq rezonans tudırğan şu kezinde ornınan ketken. Tört jıl bwrın sol kezdegi rektor, äkim men äkimdik jalğa berilgen jerdi menşikke qalay zañdastırğanı qazirge deyin belgisiz.

Osığan deyin aqparat qwraldarı bwl jer teliminiñ eks-prezident Nazarbaevtıñ küyeu balası, eldegi eñ bay oligarhtardıñ biri Timur Qwlıbaevqa qaraytın kompaniyağa ötkenin habarlağan.

The Qazaq Times