«Abıroy» qoğamdıq birlestigi müşeleriniñ azamattardan Qazaqstandağı Resey poligondarı jöninde saualnama alıp jürgen säti. Foto: «Oral aptalığı» basılımı

Qwjattarınıñ qwnın qısqa uaqıtta joqqa şığaruğa ädettengen salıq organdarı bwl jolı da birden rayınan qayttı. Batıs qazaqstan oblısınıñ memlekettik kirister departamenti «Abıroy» qoğamdıq wyımına şığarğan şeşimniñ küşin joydı. Bwl jaylı wyım jetekşisi, täuelsiz jurnalist äri  «Oral aptalığı» basılımınıñ bas redaktorı Lwqpan Ahmedyarov Facebook jelisindegi paraqşasında jazdı.

«Jaqsı jañalığım bar. Batıs Qazaqstan oblıstıq memlekettik kiris departamenti Oral qalasındağı äriptesteriniñ «Abıroy» qoğamdıq birlestigine negizsiz kesken ayıppwlı men qızmetin toqtatu qaulısın jaramsız dep tanıdı. Äkimşilik is te toqtadı. Qalalıq basqarma qızmetkerleri tärtiptik jauapkerşilikke tartıladı», – dep habarladı belsendi Ahmediyarov.

Ol osığan deyin 3 naurız küni özi jetekşilik etetin «Abıroy» wyımına 583 mıñ teñge köleminde ayıppwl salınıp, wyım jwmısı üş ayğa şektelgenin mälimdegen.

«Täuelsiz baqılauşılar ortalığın qwruğa alğan grantımız salıq organdarın qattı mazalap jürgen tärizdi» degen täuelsiz jurnalistiñ sözinşe, qaulı wyım basşısınıñ ne advokattıñ qatısuınsız şığarılğan. Sonday-aq, qazir sot jönsiz soqtıqqan basqarma qızmetkerleriniñ äreketine baylanıstı tüsirilgen şağımdı qarap jatır.

«Abıroy» qoğamdıq birlestigi 2004 jılı qwrılğan. Wyım bıltır jıl soñında saylau kezinde täuelsiz baqılauşılardı dayındau üşin halıqaralıq qordan grant alğan.

10 qañtardağı saylau qarsañında jäne ötkennen keyin, küz-qıs mezgilderinde Qazaqstannıñ salıq organdarı saylaudı baqılau men qwqıq qorğaumen aynalısatın birqatar ükimettik emes wyımnıñ üstinen äkimşilik is qozğağan. Olardıñ eñ belsendilerine iri kölemde ayıppwl kesip, qızmetin birneşe ayğa toqtatqan. Bwğan azamattıq qoğam men halıqaralıq wyımdar qarsılıq tanıtıp, qattı sınadı. Qısım üdegennen keyin köp wzamay qabıldanğan şeşimder men äkimşilik ister jabıldı.

"The Qazaq Times"