«ابىروي» قوعامدىق بىرلەستىگى مۇشەلەرىنىڭ ازاماتتاردان قازاقستانداعى رەسەي پوليگوندارى جونىندە ساۋالناما الىپ جۇرگەن ءساتى. فوتو: «ورال اپتالىعى» باسىلىمى

قۇجاتتارىنىڭ قۇنىن قىسقا ۋاقىتتا جوققا شىعارۋعا ادەتتەنگەن سالىق ورگاندارى بۇل جولى دا بىردەن رايىنان قايتتى. باتىس قازاقستان وبلىسىنىڭ مەملەكەتتىك كىرىستەر دەپارتامەنتى «ابىروي» قوعامدىق ۇيىمىنا شىعارعان شەشىمنىڭ كۇشىن جويدى. بۇل جايلى ۇيىم جەتەكشىسى، تاۋەلسىز جۋرناليست ءارى  «ورال اپتالىعى» باسىلىمىنىڭ باس رەداكتورى لۇقپان احمەدياروۆ Facebook جەلىسىندەگى پاراقشاسىندا جازدى.

«جاقسى جاڭالىعىم بار. باتىس قازاقستان وبلىستىق مەملەكەتتىك كىرىس دەپارتامەنتى ورال قالاسىنداعى ارىپتەستەرىنىڭ «ابىروي» قوعامدىق بىرلەستىگىنە نەگىزسىز كەسكەن ايىپپۇلى مەن قىزمەتىن توقتاتۋ قاۋلىسىن جارامسىز دەپ تانىدى. اكىمشىلىك ءىس تە توقتادى. قالالىق باسقارما قىزمەتكەرلەرى تارتىپتىك جاۋاپكەرشىلىككە تارتىلادى»، – دەپ حابارلادى بەلسەندى احمەدياروۆ.

ول وسىعان دەيىن 3 ناۋرىز كۇنى ءوزى جەتەكشىلىك ەتەتىن «ابىروي» ۇيىمىنا 583 مىڭ تەڭگە كولەمىندە ايىپپۇل سالىنىپ، ۇيىم جۇمىسى ءۇش ايعا شەكتەلگەنىن مالىمدەگەن.

«تاۋەلسىز باقىلاۋشىلار ورتالىعىن قۇرۋعا العان گرانتىمىز سالىق ورگاندارىن قاتتى مازالاپ جۇرگەن ءتارىزدى» دەگەن تاۋەلسىز ءجۋرناليستىڭ سوزىنشە، قاۋلى ۇيىم باسشىسىنىڭ نە ادۆوكاتتىڭ قاتىسۋىنسىز شىعارىلعان. سونداي-اق، قازىر سوت ءجونسىز سوقتىققان باسقارما قىزمەتكەرلەرىنىڭ ارەكەتىنە بايلانىستى تۇسىرىلگەن شاعىمدى قاراپ جاتىر.

«ابىروي» قوعامدىق بىرلەستىگى 2004 جىلى قۇرىلعان. ۇيىم بىلتىر جىل سوڭىندا سايلاۋ كەزىندە تاۋەلسىز باقىلاۋشىلاردى دايىنداۋ ءۇشىن حالىقارالىق قوردان گرانت العان.

10 قاڭتارداعى سايلاۋ قارساڭىندا جانە وتكەننەن كەيىن، كۇز-قىس مەزگىلدەرىندە قازاقستاننىڭ سالىق ورگاندارى سايلاۋدى باقىلاۋ مەن قۇقىق قورعاۋمەن اينالىساتىن بىرقاتار ۇكىمەتتىك ەمەس ۇيىمنىڭ ۇستىنەن اكىمشىلىك ءىس قوزعاعان. ولاردىڭ ەڭ بەلسەندىلەرىنە ءىرى كولەمدە ايىپپۇل كەسىپ، قىزمەتىن بىرنەشە ايعا توقتاتقان. بۇعان ازاماتتىق قوعام مەن حالىقارالىق ۇيىمدار قارسىلىق تانىتىپ، قاتتى سىنادى. قىسىم ۇدەگەننەن كەيىن كوپ ۇزاماي قابىلدانعان شەشىمدەر مەن اكىمشىلىك ىستەر جابىلدى.

"The Qazaq Times"