Lwqpan Ahmediyarov 28 aqpan küni ötken sankciyalanğan mitingte. 28 aqpan 2021 jıl. BQO, Oral qalası. Foto: "Oral aptalığı" basılımınıñ videosınan skrin-qiındı

Salıq organdarı täuelsiz jurnalist Lwqpan Ahmediyarov jetekşilik etetin «Abıroy» qoğamdıq birlestigine 583 mıñ teñge köleminde ayıppwl salıp, wyım jwmısın üş ayğa toqtattı.

Wyım basşısı Ahmediyarov Facebook jelisindegi paraqşasında memlekettik kirister jönindegi basqarmanıñ şeşimin 3 naurız küni tañerteñ alğanın jazdı. Qwjatta wyım basşılarınıñ «Äkimşilik kodekstiñ 460-1, 2-böligin bwzğanı» jazılğan. Bwl bapta «şetel qarjısı turalı jalğan aqparat bergeni üşin» jauapkerşilik qarastırılğan. Qaulıda amerikalıq NED (National Endowment for Democracy, «Demokratiya jönindegi wlttıq qor») qorınıñ aqşasın alu üşin qwjat tapsırğan kezde «zañbwzuşılıq» bolğanı jazılğan.

– Äu basta-aq qarajat alğanı jöninde habarlamadan qatelikter ketken, «Abıroy» ökilderi onı tüzegisi kelgen. Biraq tüzetulerdi habarlamağa emes, deklaraciyağa engizuge boladı. Osı dwrıs emes derek zañbwzuşılıq retinde tanılıp otır, – degen oblıstıq memlekettik kirister departamentiniñ tüsindiru jwmıstarı jönindegi basqarma jetekşisi Ayman Quanova Azattıq tilşisine.

Lwqpan Ahmediyarovtıñ tüsindiruinşe, is birlestik ökilderiniñ qatısuınsız qaralğan. Ol bwl şeşimdi jaqında Oralda ötken sankciyalanğan mitingimen baylanıstıradı.

– Sebebi bwl is bwrın memlekettik kirister basqarmasında qaralğan jäne qalalıq basqarma jetekşisi iste äkimşilik qwqıqbwzuşılıq belgileri joq ekenin aytqan. Olar ünsizdik tanıtıp, endi mitingiden keyin mağan ayıppwl turalı habarlamama kelip twr, – deydi Ahmediyarov.

«Abıroy» qoğamdıq birlestigi 2004 jılı qwrılğan. Wyım bıltır jıl soñında saylau kezinde täuelsiz baqılauşılardı dayındau üşin halıqaralıq qordan grant alğan.

10 qañtardağı saylau qarsañında jäne ötkennen keyin, küz-qıs mezgilderinde Qazaqstannıñ salıq organdarı saylaudı baqılau men qwqıq qorğaumen aynalısatın birqatar ükimettik emes wyımnıñ üstinen äkimşilik is qozğağan. Olardıñ eñ belsendilerine iri kölemde ayıppwl kesip, qızmetin birneşe ayğa toqtatqan. Bwğan azamattıq qoğam men halıqaralıq wyımdar qarsılıq tanıtıp, qattı sınadı. Qısım üdegennen keyin köp wzamay qabıldanğan şeşimder men äkimşilik ister jabıldı.

"The Qazaq Times"