«بيلىك ادەتىنە باستى»: تاۋەلسىز جۋرناليست احمەدياروۆتىڭ ۇيىمىنا ايىپپۇل سالىنىپ، جۇمىسى توقتاتىلدى

سالىق ورگاندارى تاۋەلسىز جۋرناليست لۇقپان احمەدياروۆ جەتەكشىلىك ەتەتىن «ابىروي» قوعامدىق بىرلەستىگىنە 583 مىڭ تەڭگە كولەمىندە ايىپپۇل سالىپ، ۇيىم جۇمىسىن ءۇش ايعا توقتاتتى.

ۇيىم باسشىسى احمەدياروۆ Facebook جەلىسىندەگى پاراقشاسىندا مەملەكەتتىك كىرىستەر جونىندەگى باسقارمانىڭ شەشىمىن 3 ناۋرىز كۇنى تاڭەرتەڭ العانىن جازدى. قۇجاتتا ۇيىم باسشىلارىنىڭ «اكىمشىلىك كودەكستىڭ 460-1, 2-بولىگىن بۇزعانى» جازىلعان. بۇل باپتا «شەتەل قارجىسى تۋرالى جالعان اقپارات بەرگەنى ءۇشىن» جاۋاپكەرشىلىك قاراستىرىلعان. قاۋلىدا امەريكالىق NED (National Endowment for Democracy, «دەموكراتيا جونىندەگى ۇلتتىق قور») قورىنىڭ اقشاسىن الۋ ءۇشىن قۇجات تاپسىرعان كەزدە «زاڭبۇزۋشىلىق» بولعانى جازىلعان.

– ءاۋ باستا-اق قاراجات العانى جونىندە حابارلامادان قاتەلىكتەر كەتكەن، «ابىروي» وكىلدەرى ونى تۇزەگىسى كەلگەن. بىراق تۇزەتۋلەردى حابارلاماعا ەمەس، دەكلاراتسياعا ەنگىزۋگە بولادى. وسى دۇرىس ەمەس دەرەك زاڭبۇزۋشىلىق رەتىندە تانىلىپ وتىر، – دەگەن وبلىستىق مەملەكەتتىك كىرىستەر دەپارتامەنتىنىڭ ءتۇسىندىرۋ جۇمىستارى جونىندەگى باسقارما جەتەكشىسى ايمان قۋانوۆا ازاتتىق تىلشىسىنە.

لۇقپان احمەدياروۆتىڭ تۇسىندىرۋىنشە، ءىس بىرلەستىك وكىلدەرىنىڭ قاتىسۋىنسىز قارالعان. ول بۇل شەشىمدى جاقىندا ورالدا وتكەن سانكتسيالانعان ميتينگىمەن بايلانىستىرادى.

– سەبەبى بۇل ءىس بۇرىن مەملەكەتتىك كىرىستەر باسقارماسىندا قارالعان جانە قالالىق باسقارما جەتەكشىسى ىستە اكىمشىلىك قۇقىقبۇزۋشىلىق بەلگىلەرى جوق ەكەنىن ايتقان. ولار ۇنسىزدىك تانىتىپ، ەندى ميتينگىدەن كەيىن ماعان ايىپپۇل تۋرالى حابارلاماما كەلىپ تۇر، – دەيدى احمەدياروۆ.

«ابىروي» قوعامدىق بىرلەستىگى 2004 جىلى قۇرىلعان. ۇيىم بىلتىر جىل سوڭىندا سايلاۋ كەزىندە تاۋەلسىز باقىلاۋشىلاردى دايىنداۋ ءۇشىن حالىقارالىق قوردان گرانت العان.

10 قاڭتارداعى سايلاۋ قارساڭىندا جانە وتكەننەن كەيىن، كۇز-قىس مەزگىلدەرىندە قازاقستاننىڭ سالىق ورگاندارى سايلاۋدى باقىلاۋ مەن قۇقىق قورعاۋمەن اينالىساتىن بىرقاتار ۇكىمەتتىك ەمەس ۇيىمنىڭ ۇستىنەن اكىمشىلىك ءىس قوزعاعان. ولاردىڭ ەڭ بەلسەندىلەرىنە ءىرى كولەمدە ايىپپۇل كەسىپ، قىزمەتىن بىرنەشە ايعا توقتاتقان. بۇعان ازاماتتىق قوعام مەن حالىقارالىق ۇيىمدار قارسىلىق تانىتىپ، قاتتى سىنادى. قىسىم ۇدەگەننەن كەيىن كوپ ۇزاماي قابىلدانعان شەشىمدەر مەن اكىمشىلىك ىستەر جابىلدى.

"The Qazaq Times"