Kölginovtiñ keñsesinde segiz künnen beri "şaqırılmağan qonaq" keypinde jürgen narazı analarğa men olarğa birneşe ret eskertu jasağan policeyler. Foto: Facebook jelisindegi tikeley efirden skrin-qiındı

Jetinşi täulik tünep jatqan analarğa jeksenbi tüni sağat 22.00 şamasında bir top policey kelip, karantin şaraların alğa tarta otırıp tarauın eskertken. Alayda äyelder talabı orındalmayınşa, eşqayda ketpeytinin aytıp, ğimarattan şığudan bas tartqan.

«Äkim keñesşisiniñ sözinşe, bügin Kölginov qabıldap qaluı mümkin» deydi redakciya tilşisi tildesken analardıñ biri Nazira Mukuşeva.

«Äkim mäseleni tolıq şeşe almasa da, joğarığa jetkizu qolındağı dünie. Dialogqa keletindey döñgelek üstel wyımdastıramız degendey sıñay tanıtqan. Segizinşi kün bolıp jatır, mämile bolatın şığar degen oydamız. Qalay degenmen de aspandağı aydı swrap otırğamız joq. Qwqığımız taptalğanına baylanıstı İİM, Europarlament, Qauipsizdik keñesine t.b. hat joldadıq. Tamara Düysenovağa tikeley efirde beynejazba arqılı da, jazbaşa türde de hat joldadıq. Özi tügili kömekşisi de kelgen joq», – deydi Mukuşeva aşınıp.

Bügingi tañğa deyin Ükimet ne Parlamentten lauazımdı şeneunikterdiñ birde-biri analardıñ aldına şıqpağan. Düysenbi-jwma künderi aralığında äkim keñesşileri men atqaruşı mamandar mämilege keluge tırısqan. Alayda  «qwrğaq uäde qajıtqanın» aytıp, qağaz jüzinde ötiniş jazudan «eş qayır joğına» közi jetken analar mäselege Aqorda-Kitaphananıñ, zañ şığaruşı organ men ükimet qwramınıñ nazarın audartudı közdeydi.

Äleumettik jağdaydı jaqsartudı jäne balağa beriletin järdemaqını köbeytudi talap etken bir top äyel 22 aqpannan beri astana äkimdiginde tünep keledi. Köp balalı, mügedek balası bar, jalğızbastı, twrmısı naşar, belsendi analar apta boyı elorda äkimi Kölginov pen Mäjilistiñ VII şaqırılım deputattarı aldına şıqpağan soñ Qazaqstannıñ bwrınğı jäne qazirgi prezidentteri Nazarbaev jäne Toqaevqa ündeu jasağan. Äkimdikti uaqıtşa twraq etkender negizgi üş talabı barın aytadı. Olar:  «Ana men bala kapitalı» retinde otbasına tabısına qaramay är balağa 42,5 mıñ teñge tağayındau, Konstituciya boyınşa (25-bap) äleumettik osal top otbasıların baspana-twrğın üymen qamtu jäne «halıq ızasın tudırğan dästürli-wlttıq mädenietke qayşı» bala qwqığı turalı zañ jobasın («Otbasılıq-twrmıstıq zorlıq-zombılıqqa qarsı is-qimıl turalı» zañ jobası – QT) qaralımnan alıp tastau.

«Bärimizge ortaq Qazaqstan jeriniñ igiligin halıq ta körui kerek şığar. Tek bilik pen mañayındağı üyelmen top qana emes, osı dalanıñ zañdı mirasqorı jwrtımız, äsirese elimizdiñ bolaşağı – balalarımız da jaqsı ömir sürui tiis, oğan qwqılı. Eşkim baspananı teginge swrap otırğan joq, tek tiimdi bağamen halıq jağdayına ıñğaylap beruin talap etemiz», – degen äyelder «Estitin ükimettiñ» kereñ-soqır küyge tüskenine» aşulı.

Narazı toptıñ aytuınşa, as-su qamı, kerek-jarağın jeke qaltasınan satıp alıp, jetpegenin basqa qoldauşı analar sırttan äkep beredi. Olar tünde däliz-foye edenine töseniş tösep, keybiri orındıqtarda jatuğa mäjbür.

“The Qazaq Times”