Qazaqstan megapolisteriniñ äkimderi: Almatı qalasınıñ basşısı Baqıtjan Sağıntaev (sol jaqta) jäne astana äkimi Altay Kölginov (oñ jaqta). Fotokollaj: aşıq derekköz

Tabiğat köktep jatsa da, analardıñ köñilinde aqtütek boran. Balasınıñ bolaşağına alañdatqan uayım wyıtqısı. 5 naurız küni tüske qaray Almatıda köp balalı jäne mügedek bala tärbielep otırğan äyelderdiñ bir tobı äkimdikke barıp, baspana mäselesin şeşudi talap etti. Jinalğandar wzaq uaqıt boyı «jıljıp bolmaytın üy kezeginde twrıp keledi», biraq nätije joq. El auzındağı «Äkim bol, halqıña jaqın bol» degen uäli sözdiñ şipası bitkendey.

«2018 jıldan beri äkimdik tabaldırığın tozdırıp kelemiz. Biraq kezegimiz de jıljığan joq, mäselemiz de şeşilgen joq. Sağıntaevtıñ özine de hat jiberdik. Äkim hattağı talaptı orındamaq tügili jauap ta jazğan joq», – deydi köp balalı ananıñ biri Baljan Jwmağwlova Azattıq tilşisine bergen pikirinde.

Äleumettik sayasatqa köñili tolmağan narazılar qala äkimi Baqıtjan Sağıntaevtıñ şığuın talap etip, «Sağıntaev, şıq!» dep ayqayladı. Degenmen Sağıntaev el aldına şığudan män tappağan tärizdi, ädettegidey narazılar aldına kelmedi. Päter auıstırudan äbden qajığan analar mügedek balası bar jäne köp balalı otbasılardı baspana kezegine eki bölek qoyudı swradı.

Jinalğandar tağı bir şetin mäsele – mügedektikti resmi türde rastaudıñ älegi, bwrqırağan byurokaratiyanı sınadı. Erekşe kütimge mwqtaj balalarğa memlekettik qoldaudıñ jetispeuşiligi, mügedek ekeni jaylı märtebege qol jetkizudiñ qiındığı jwrttıñ tabanın tozdırğan.

Oqiğa ornında taraptardı tıñdağan Azattıq tilşisiniñ habarlauınşa, äkimdikten narazılar aldına äleumettik äl-auqat basqarmasınıñ basşısı Näzira Toğızbaeva jäne twrğın üy sayasatı basqarması basşısınıñ orınbasarı Ermek Ämirov şığıp, swraqtarğa jauap berdi. Şeneunikterdiñ täpsirine sensek, eki sanattağı toptarğa arnalğan twrğın üy kezegin jeke tizim türinde jürgizu zañdastırılmağan. Olar «äleumettik twrğıda az qamtılğan top ökilderine arnalğan jeke bağdarlamalar barın» alğa tartadı.

«Mısalı, «Şañıraq» bağdarlaması bıltırdan beri jwmıs istep twr. Ol boyınşa kezekte twrğan mıñ şaqtı adamğa üy berdik», – degen Ermek Ämirov.

Däl osınday talaptarmen astanalıq analar eki aptadan beri äkimdikte tünep jür. Aqpannıñ aqırğı aptasında bastalğan analardıñ narazılığı köktemge jalğastı. Sağıntaev siyaqtı elorda äkimi Kölginov te on eki kün tabaldırğında jürgen narazılardı körgisi, körse de söylesip-mäseleni tıñdağısı joq. Astana anaları da memlekettik järdemaqını künköris deñgeyine jetkizudi, baspana qoljetimdiligin talap etip keledi. Kölginovtiñ komandası mäseleni şeşuge bağıttalğan baysaldı dialog jürgizudiñ ornına resmi saytta narazı analardı jeke basın küyttedi degen ayıptau mäninde aqparat taratıp otır. Äyelder mwnı «qaralau», «arandatu», «analardı qoğamğa jamanattı qılu» äreketi dep sanaydı.

"The Qazaq Times"