جەتىنشى تاۋلىك تۇنەپ جاتقان انالارعا جەكسەنبى ءتۇنى ساعات 22.00 شاماسىندا ءبىر توپ پوليتسەي كەلىپ، كارانتين شارالارىن العا تارتا وتىرىپ تاراۋىن ەسكەرتكەن. الايدا ايەلدەر تالابى ورىندالمايىنشا، ەشقايدا كەتپەيتىنىن ايتىپ، عيماراتتان شىعۋدان باس تارتقان.

«اكىم كەڭەسشىسىنىڭ سوزىنشە، بۇگىن كولگىنوۆ قابىلداپ قالۋى مۇمكىن» دەيدى رەداكتسيا ءتىلشىسى تىلدەسكەن انالاردىڭ ءبىرى نازيرا مۋكۋشەۆا.

«اكىم ماسەلەنى تولىق شەشە الماسا دا، جوعارىعا جەتكىزۋ قولىنداعى دۇنيە. ديالوگقا كەلەتىندەي دوڭگەلەك ۇستەل ۇيىمداستىرامىز دەگەندەي سىڭاي تانىتقان. سەگىزىنشى كۇن بولىپ جاتىر، مامىلە بولاتىن شىعار دەگەن ويدامىز. قالاي دەگەنمەن دە اسپانداعى ايدى سۇراپ وتىرعامىز جوق. قۇقىعىمىز تاپتالعانىنا بايلانىستى ءىىم، ەۋروپارلامەنت، قاۋىپسىزدىك كەڭەسىنە ت.ب. حات جولدادىق. تامارا دۇيسەنوۆاعا تىكەلەي ەفيردە بەينەجازبا ارقىلى دا، جازباشا تۇردە دە حات جولدادىق. ءوزى تۇگىلى كومەكشىسى دە كەلگەن جوق»، – دەيدى مۋكۋشەۆا اشىنىپ.

بۇگىنگى تاڭعا دەيىن ۇكىمەت نە پارلامەنتتەن لاۋازىمدى شەنەۋنىكتەردىڭ بىردە-ءبىرى انالاردىڭ الدىنا شىقپاعان. دۇيسەنبى-جۇما كۇندەرى ارالىعىندا اكىم كەڭەسشىلەرى مەن اتقارۋشى ماماندار مامىلەگە كەلۋگە تىرىسقان. الايدا  «قۇرعاق ۋادە قاجىتقانىن» ايتىپ، قاعاز جۇزىندە ءوتىنىش جازۋدان «ەش قايىر جوعىنا» كوزى جەتكەن انالار ماسەلەگە اقوردا-كىتاپحانانىڭ، زاڭ شىعارۋشى ورگان مەن ۇكىمەت قۇرامىنىڭ نازارىن اۋدارتۋدى كوزدەيدى.

الەۋمەتتىك جاعدايدى جاقسارتۋدى جانە بالاعا بەرىلەتىن جاردەماقىنى كوبەيتۋدى تالاپ ەتكەن ءبىر توپ ايەل 22 اقپاننان بەرى استانا اكىمدىگىندە تۇنەپ كەلەدى. كوپ بالالى، مۇگەدەك بالاسى بار، جالعىزباستى، تۇرمىسى ناشار، بەلسەندى انالار اپتا بويى ەلوردا اكىمى كولگىنوۆ پەن ءماجىلىستىڭ VII شاقىرىلىم دەپۋتاتتارى الدىنا شىقپاعان سوڭ قازاقستاننىڭ بۇرىنعى جانە قازىرگى پرەزيدەنتتەرى نازارباەۆ جانە توقاەۆقا ۇندەۋ جاساعان. اكىمدىكتى ۋاقىتشا تۇراق ەتكەندەر نەگىزگى ءۇش تالابى بارىن ايتادى. ولار:  «انا مەن بالا كاپيتالى» رەتىندە وتباسىنا تابىسىنا قاراماي ءار بالاعا 42,5 مىڭ تەڭگە تاعايىنداۋ، كونستيتۋتسيا بويىنشا (25-باپ) الەۋمەتتىك وسال توپ وتباسىلارىن باسپانا-تۇرعىن ۇيمەن قامتۋ جانە «حالىق ىزاسىن تۋدىرعان ءداستۇرلى-ۇلتتىق مادەنيەتكە قايشى» بالا قۇقىعى تۋرالى زاڭ جوباسىن («وتباسىلىق-تۇرمىستىق زورلىق-زومبىلىققا قارسى ءىس-قيمىل تۋرالى» زاڭ جوباسى – QT) قارالىمنان الىپ تاستاۋ.

«بارىمىزگە ورتاق قازاقستان جەرىنىڭ يگىلىگىن حالىق تا كورۋى كەرەك شىعار. تەك بيلىك پەن ماڭايىنداعى ۇيەلمەن توپ قانا ەمەس، وسى دالانىڭ زاڭدى ميراسقورى جۇرتىمىز، اسىرەسە ەلىمىزدىڭ بولاشاعى – بالالارىمىز دا جاقسى ءومىر ءسۇرۋى ءتيىس، وعان قۇقىلى. ەشكىم باسپانانى تەگىنگە سۇراپ وتىرعان جوق، تەك ءتيىمدى باعامەن حالىق جاعدايىنا ىڭعايلاپ بەرۋىن تالاپ ەتەمىز»، – دەگەن ايەلدەر «ەستيتىن ۇكىمەتتىڭ» كەرەڭ-سوقىر كۇيگە تۇسكەنىنە» اشۋلى.

نارازى توپتىڭ ايتۋىنشا، اس-سۋ قامى، كەرەك-جاراعىن جەكە قالتاسىنان ساتىپ الىپ، جەتپەگەنىن باسقا قولداۋشى انالار سىرتتان اكەپ بەرەدى. ولار تۇندە ءدالىز-فويە ەدەنىنە توسەنىش توسەپ، كەيبىرى ورىندىقتاردا جاتۋعا ءماجبۇر.

“The Qazaq Times”