Gogol' köşesiniñ boyınan ondağan adam avtozakpen policiya bölimderine jetkizildi. 28 aqpan 2021 jıl, Almatı qalası. Foto: QT / Kültegin Aspanwlı

Almatıdağı Baluan Şolaq atındağı Sport sarayınıñ janında «Dempartiya» jaqtastarın arnayı jasaq qorşauğa aldı. Bwl jolı şerude qarası köbeygen, el «arandatuşı» deytin akciyanıñ kontr-qatısuşıları Mamay bastağan toppen söz qağıstırdı. Tipti arnadatuşınıñ biri dempartiyalıqtarğa küş körsetip, saldarınan eki adam zardap şekti. Al miting ötetin ekinşi orın retinde belgilengen Ortalıq sayabaq mañında ondağan adam wstaldı.

Prokuratura qızmetkeri jinalğandardan şerudiñ «zañsız» ekenin eskertip, tarauın talap etti. Keminde 60 adam üşşeñberli kettlingte twrdı. Ortalıq stadion aumağında ädettegidey mobil'di internet jwmıs istemedi.

Bilikşil-ügitşiler narazılarmen aytısuğa tırıstı. 28 aqpan 2021 jıl, Almatı qalası. Foto: QT / Kültegin Aspanwlı

Jasaqtıñ sırtınan bürkenip, qara tüsti közildirik taqqan bir top adam qolına megafon wstap twrıp söz talastırdı. «Nazarbaev, ket!» degen narazılarğa bwlar «Mamay – qarabet» dep ayqayladı. Ädette däl osılay narazılarğa qarımta beretin bilikşil spikerler arasında jüretin Almatı mäslihatınıñ nwrotandıq hatşısı Stanislav Kankurov bwl jolı da akciya işinde jürdi.

16 jeltoqsannan beri bilikke narazılarğa qarsı uäj aytıp jürgen "erekşe belsendiniñ" biri. 28 aqpan 2021 jıl, Almatı qalası. Foto: QT / Kültegin Aspanwlı

Küştik qwrılım ökilderiniñ qarayğan qalıñ qwrsauında qalğan narazılar jedel järdem şaqırtudı talap etti. Fel'dşer kömegine jüginuge mäjbür boldı. Narazılardıñ aytuınşa, kettlingtegi ayqasta eki äyeldiñ qabırğası sınğan, tağı bireui jaraqat alğan.

Toqaev adam qwqıqtarına basımdıq beretinin aytqanımen, Qazaqstanda kettiling ädisi beybit jiın qatısuşılarına birneşe ret qaytalanıp otır. 28 aqpan 2021 jıl, Almatı qalası. Foto: QT / Kültegin Aspanwlı

Bilik halıqaralıq adam qwqıqtarı jönindegi wyım men Europarlament sınağan «kettling» ädisin keyingi üş ayda osımen üşinşi ret qoldanılıp otır.

Dempartiya bastamaşıl tobınıñ jetekşisi Janbolat Mamay. 28 28 aqpan 2021 jıl, Almatı qalası. Foto: QT / Kültegin Aspanwlı

Bügin tüste Almatıda Ortalıq mädeniet jäne demalıs sayabağı mañayı men Jibek jolı köşesiniñ boyınan 50 şaqtı adam wstaldı. Oqiğa ornındağı jurnalisterdiñ mälimetinşe, avtozakqa küştep salınğan azamattardıñ Qazaqstanda qızmetine tıyım salınğan QDT şaqırğan şeruge kelgeni nemese kezdeysoq ötip bara jatqan jayau jürginşi ekeni belgisiz. Wstalğandar Almalı jäne Jetisu t.b. audandıq policiya bölimderine jetkizildi. Jağday barısın kamerağa tüsirip jürgen keybir adamnıñ telefonın tartıp aldı.

Ortalıq mädeniet jäne demalıs sayabaq ta, oğan aparar Gogol' köşesi de jabıldı. 28 aqpan 2021 jıl, Almatı qalası. Foto: QT / Kültegin Aspanwlı

Sayabaq qaqpasına aparar Gogol' köşesi men qiıp ötetin özge köşelerde mobil'di internet bwğattaldı. Panfilov parki twsında jeñil kölik tügili jayau jürgen twrğındardıñ miting belgilengen twsqa ötkizbedi. El arasında «Gor'kiy sayabağı» atalıp ketken ortalıq park te, oğan jetkizetin joldar da jabıq twrdı.

Wstau sätinen. 28 aqpan 2021 jıl, Almatı qalası. Foto: QT / Kültegin Aspanwlı

Wstau kezinde arnayı jasaq jäne azamattıq formada kiingen qwzırlı organ ökilderi jurnalisterdi qayta-qayta tekserip, kamera-fotoapparat aldın kölegeylep kedergi jasap baqtı.

Saqşı aldında jürgen azamattıq formadağı keybir "agentter" tilşiler jwmısına kedergi jasauğa ärekettendi. 28 aqpan 2021 jıl, Almatı qalası. Foto: QT / Kültegin Aspanwlı

Osı jwmada oppoziciyalıq wyımdardıñ 28 aqpanğa josparlanğan mitingileri qarsañında bas prokurordıñ orınbasarı Bolat Dembaev ädetinşe şaranı zañsız dep atap, jwrttı narazılıqqa şıqpauğa şaqırğan.

Jantalas sät. 28 aqpan 2021 jıl, Almatı qalası. Foto: QT / Kültegin Aspanwlı

Ol mitingige qatısatındar zañğa say jauapqa tartılatının aytıp, eskertu jasağan. Sonımen qatar, Almatı qalası äkimdigi miting ornı retinde jariyalanğan  jerlerdegi ayaldamalarda däl osı küni jöndeu jwmıstarı bolatının, sol mañdarda qoğamdıq kölikter jürmeytinin habarlağan.

Nemeresin jetektegen twrğınmen tildesip twrğan policey. 28 aqpan 2021 jıl, Almatı qalası. Foto: QT / Kültegin Aspanwlı

Bwğan deyin qwqıq qorğauşılar «sayasi twtqın» dep tanığan, 2016 jılğı Jer mitingisinen keyin bes jılğa sottalıp, biıl aqpanda qamaudan şıqqan belsendi Maks Boqaev 28 aqpanda mitingige şığatının mälimdegen. Osıdan soñ quğındağı eks-bankir, oppoziciya ökili, sot qızmetine tıyım salğan «Qazaqstannıñ demokratiyalıq tañdauı» qozğalısınıñ basşısı Mwhtar Äblyazov pen «Dempartiya» bastamaşıl tobınıñ jetekşisi Janbolat Mamay jwrttı 28 aqpan mitingige şaqırğan. Eki top ta bilikten sayasi twtqındardı bosatudı, baspana mäselesin şeşudi, Europarlamenttiñ Qazaqstandağı adam qwqığına qatıstı qabıldağan qararındağı talaptardı orındaudı talap etuge ündeydi.

“The Qazaq Times”