بيلىك بەيبىت جيىندا تاعى دا «كەتتلينگ» ءادىسىن قولداندى، نارازىلاردى ۇستادى

الماتىداعى بالۋان شولاق اتىنداعى سپورت سارايىنىڭ جانىندا «دەمپارتيا» جاقتاستارىن ارنايى جاساق قورشاۋعا الدى. بۇل جولى شەرۋدە قاراسى كوبەيگەن، ەل «ارانداتۋشى» دەيتىن اكتسيانىڭ كونتر-قاتىسۋشىلارى ماماي باستاعان توپپەن ءسوز قاعىستىردى. ءتىپتى ارناداتۋشىنىڭ ءبىرى دەمپارتيالىقتارعا كۇش كورسەتىپ، سالدارىنان ەكى ادام زارداپ شەكتى. ال ميتينگ وتەتىن ەكىنشى ورىن رەتىندە بەلگىلەنگەن ورتالىق ساياباق ماڭىندا ونداعان ادام ۇستالدى.

پروكۋراتۋرا قىزمەتكەرى جينالعانداردان شەرۋدىڭ «زاڭسىز» ەكەنىن ەسكەرتىپ، تاراۋىن تالاپ ەتتى. كەمىندە 60 ادام ۇششەڭبەرلى كەتتلينگتە تۇردى. ورتالىق ستاديون اۋماعىندا ادەتتەگىدەي ءموبيلدى ينتەرنەت جۇمىس ىستەمەدى.

بيلىكشىل-ۇگىتشىلەر نارازىلارمەن ايتىسۋعا تىرىستى. 28 اقپان 2021 جىل، الماتى قالاسى. فوتو: QT / كۇلتەگىن اسپانۇلى

جاساقتىڭ سىرتىنان بۇركەنىپ، قارا ءتۇستى كوزىلدىرىك تاققان ءبىر توپ ادام قولىنا مەگافون ۇستاپ تۇرىپ ءسوز تالاستىردى. «نازارباەۆ، كەت!» دەگەن نارازىلارعا بۇلار «ماماي – قارابەت» دەپ ايقايلادى. ادەتتە ءدال وسىلاي نارازىلارعا قارىمتا بەرەتىن بيلىكشىل سپيكەرلەر اراسىندا جۇرەتىن الماتى ءماسليحاتىنىڭ نۇروتاندىق حاتشىسى ستانيسلاۆ كانكۋروۆ بۇل جولى دا اكتسيا ىشىندە ءجۇردى.

16 جەلتوقساننان بەرى بيلىككە نارازىلارعا قارسى ءۋاج ايتىپ جۇرگەن "ەرەكشە بەلسەندىنىڭ" ءبىرى. 28 اقپان 2021 جىل، الماتى قالاسى. فوتو: QT / كۇلتەگىن اسپانۇلى

كۇشتىك قۇرىلىم وكىلدەرىنىڭ قارايعان قالىڭ قۇرساۋىندا قالعان نارازىلار جەدەل جاردەم شاقىرتۋدى تالاپ ەتتى. فەلدشەر كومەگىنە جۇگىنۋگە ءماجبۇر بولدى. نارازىلاردىڭ ايتۋىنشا، كەتتلينگتەگى ايقاستا ەكى ايەلدىڭ قابىرعاسى سىنعان، تاعى بىرەۋى جاراقات العان.

توقاەۆ ادام قۇقىقتارىنا باسىمدىق بەرەتىنىن ايتقانىمەن، قازاقستاندا كەتتيلينگ ءادىسى بەيبىت جيىن قاتىسۋشىلارىنا بىرنەشە رەت قايتالانىپ وتىر. 28 اقپان 2021 جىل، الماتى قالاسى. فوتو: QT / كۇلتەگىن اسپانۇلى

بيلىك حالىقارالىق ادام قۇقىقتارى جونىندەگى ۇيىم مەن ەۋروپارلامەنت سىناعان «كەتتلينگ» ءادىسىن كەيىنگى ءۇش ايدا وسىمەن ءۇشىنشى رەت قولدانىلىپ وتىر.

دەمپارتيا باستاماشىل توبىنىڭ جەتەكشىسى جانبولات ماماي. 28 28 اقپان 2021 جىل، الماتى قالاسى. فوتو: QT / كۇلتەگىن اسپانۇلى

بۇگىن تۇستە الماتىدا ورتالىق مادەنيەت جانە دەمالىس ساياباعى ماڭايى مەن جىبەك جولى كوشەسىنىڭ بويىنان 50 شاقتى ادام ۇستالدى. وقيعا ورنىنداعى جۋرناليستەردىڭ مالىمەتىنشە، اۆتوزاكقا كۇشتەپ سالىنعان ازاماتتاردىڭ قازاقستاندا قىزمەتىنە تىيىم سالىنعان قدت شاقىرعان شەرۋگە كەلگەنى نەمەسە كەزدەيسوق ءوتىپ بارا جاتقان جاياۋ جۇرگىنشى ەكەنى بەلگىسىز. ۇستالعاندار المالى جانە جەتىسۋ ت.ب. اۋداندىق پوليتسيا بولىمدەرىنە جەتكىزىلدى. جاعداي بارىسىن كامەراعا ءتۇسىرىپ جۇرگەن كەيبىر ادامنىڭ تەلەفونىن تارتىپ الدى.

ورتالىق مادەنيەت جانە دەمالىس ساياباق تا، وعان اپارار گوگول كوشەسى دە جابىلدى. 28 اقپان 2021 جىل، الماتى قالاسى. فوتو: QT / كۇلتەگىن اسپانۇلى

ساياباق قاقپاسىنا اپارار گوگول كوشەسى مەن قيىپ وتەتىن وزگە كوشەلەردە ءموبيلدى ينتەرنەت بۇعاتتالدى. پانفيلوۆ پاركى تۇسىندا جەڭىل كولىك تۇگىلى جاياۋ جۇرگەن تۇرعىنداردىڭ ميتينگ بەلگىلەنگەن تۇسقا وتكىزبەدى. ەل اراسىندا «گوركي ساياباعى» اتالىپ كەتكەن ورتالىق پارك تە، وعان جەتكىزەتىن جولدار دا جابىق تۇردى.

ۇستاۋ ساتىنەن. 28 اقپان 2021 جىل، الماتى قالاسى. فوتو: QT / كۇلتەگىن اسپانۇلى

ۇستاۋ كەزىندە ارنايى جاساق جانە ازاماتتىق فورمادا كيىنگەن قۇزىرلى ورگان وكىلدەرى جۋرناليستەردى قايتا-قايتا تەكسەرىپ، كامەرا-فوتواپپارات الدىن كولەگەيلەپ كەدەرگى جاساپ باقتى.

ساقشى الدىندا جۇرگەن ازاماتتىق فورماداعى كەيبىر "اگەنتتەر" تىلشىلەر جۇمىسىنا كەدەرگى جاساۋعا ارەكەتتەندى. 28 اقپان 2021 جىل، الماتى قالاسى. فوتو: QT / كۇلتەگىن اسپانۇلى

وسى جۇمادا وپپوزيتسيالىق ۇيىمداردىڭ 28 اقپانعا جوسپارلانعان ميتينگىلەرى قارساڭىندا باس پروكۋروردىڭ ورىنباسارى بولات دەمباەۆ ادەتىنشە شارانى زاڭسىز دەپ اتاپ، جۇرتتى نارازىلىققا شىقپاۋعا شاقىرعان.

جانتالاس ءسات. 28 اقپان 2021 جىل، الماتى قالاسى. فوتو: QT / كۇلتەگىن اسپانۇلى

ول ميتينگىگە قاتىساتىندار زاڭعا ساي جاۋاپقا تارتىلاتىنىن ايتىپ، ەسكەرتۋ جاساعان. سونىمەن قاتار، الماتى قالاسى اكىمدىگى ميتينگ ورنى رەتىندە جاريالانعان  جەرلەردەگى ايالدامالاردا ءدال وسى كۇنى جوندەۋ جۇمىستارى بولاتىنىن، سول ماڭداردا قوعامدىق كولىكتەر جۇرمەيتىنىن حابارلاعان.

نەمەرەسىن جەتەكتەگەن تۇرعىنمەن تىلدەسىپ تۇرعان پوليتسەي. 28 اقپان 2021 جىل، الماتى قالاسى. فوتو: QT / كۇلتەگىن اسپانۇلى

بۇعان دەيىن قۇقىق قورعاۋشىلار «ساياسي تۇتقىن» دەپ تانىعان، 2016 جىلعى جەر ميتينگىسىنەن كەيىن بەس جىلعا سوتتالىپ، بيىل اقپاندا قاماۋدان شىققان بەلسەندى ماكس بوقاەۆ 28 اقپاندا ميتينگىگە شىعاتىنىن مالىمدەگەن. وسىدان سوڭ قۋعىنداعى ەكس-بانكير، وپپوزيتسيا وكىلى، سوت قىزمەتىنە تىيىم سالعان «قازاقستاننىڭ دەموكراتيالىق تاڭداۋى» قوزعالىسىنىڭ باسشىسى مۇحتار ءابليازوۆ پەن «دەمپارتيا» باستاماشىل توبىنىڭ جەتەكشىسى جانبولات ماماي جۇرتتى 28 اقپان ميتينگىگە شاقىرعان. ەكى توپ تا بيلىكتەن ساياسي تۇتقىنداردى بوساتۋدى، باسپانا ماسەلەسىن شەشۋدى، ەۋروپارلامەنتتىڭ قازاقستانداعى ادام قۇقىعىنا قاتىستى قابىلداعان قارارىنداعى تالاپتاردى ورىنداۋدى تالاپ ەتۋگە ۇندەيدى.

“The Qazaq Times”