Qazaqstan bilim jüyesiniñ bılığın aşqan dau: 125 mekteptegi jağday qalay örbip jatır?

Birneşe jıl zañbwzuşılıqtar oşağı bolıp kelgen Şımkent qalasındağı atışulı 125 mekteptegi eks-direktor men mañayındağılar jäne mwğalimderdiñ arasındağı dau äli şeşilmegen. Qazaqstandıq triada – mwğalimder men bwrınğı direktor arasındağı tartıs basqarma basşılığımen sottasu deñgeyine auıstı. Arızdanuşı wjım isti jürgizuge jauaptı qwzırlı organdardıñ sılbırlığına köñili tolmaydı. Al Äset Satıbaldiev özin basşılıqtan bosatqan bilim basqarmasımen sottasıp jatır. Mwğalimder «berekesi qaşqan wjımdağı ahual endi jaqsarıp kele jatqanda eks-direktor bar resursın paydalanıp, ornına qaytıp kele me» dep alañdaulı. 

Sıbaylas jemqorlıqqa qarsı is-qimıl agenttiginiñ Şımkenttegi departamentiniñ ağa tergeuşi Nwrdäulet Särsenbek Qılmıstıq kodeks boyınşa tergeu jürip jatqanın jäne elde qoğamdıq rezonans tudırğan istiñ qaşan sotqa joldanarın bilmeytinin habarladı. Äsili, tergeuşi bwl isti osıdan jetpis kün bwrın, 10 jeltoqsan küni qolğa alğan.

«Zañ boyınşa eki ay merzimde tergep-tekseru jüredi. Aldağı uaqıtta däleldemeler jinau jüredi, taraptardıñ barlığı şaqırıladı. Audit siyaqtı mekemelerdiñ qorıtındısı kelgen soñ, is retinde endi tirkeldi. Tolıqtay tekseris jürdi», – degen tergeuşi 18 jeltoqsanda redakciya tilşisine.

Basşılıqtıñ jinalısqa ketkenin aytqan departament qızmetkeri redakciya tilşisin qabıldauğa jazılsın depti. Ashat Jwmağali birneşe aydan beri resmi swrau joldap kele jatqan aqparat qwralına istiñ jariyalauğa jatatın jay-japsarı men tergeudiñ ayaqtalatın boljaldı merzimi turalı mälimet bergisi joq.

Şımkent qalalıq bilim basqarmasınıñ bastığı Janat Täjieva redakciyağa ädildik üşin bärine dayın ekenin ayttı.

– Satıbaldiev Bilim basqarmasın sotqa berdi. Sot şeşimin kütiñiz, boldı. Men de jeñilmeymin. Bilim prcesin wyımdastıra almağan, öz därejesine keltire almağan adamdı bilim wyımdarına qayta jaqındatudıñ keregi joq. Biraq bwl kisige qatıstı prokuratura men finpol tarapınan tekseris jürip jatır. Tekseru qorıtındısı äli qolıma tüsken joq. Öziniñ qızmet ornın qalpına keltiruge jazıptı. Men oğan qarsılıq bildirip otırmın. Konkurs jariyalanıp, jaña direktor saylanıp qoydı, – deydi basqarma basşısı.

Ol sot eks-direktordıñ qızmetten bosatıluın negizsiz dep tapqan künniñ özinde basqarma «qwzırlı organdar tarapınan bwrınğı direktordıñ tarapınan zañ bwzılğanı anıqtalsa, ornınan bosatuğa qwqılı» ekenin mälimdedi. Sonımen qosa, Täjieva Satıbaldievke eşqanday qısım bolmağanın, bosatu jönindegi arızdı densaulıq jağdayına baylanıstı öz erkimen jazğanın alğa tartadı.

Sot ükimi Satıbaldievtiñ paydasına şeşilse, onda appelyaciyalıq şağım tüsirmek. Basqarma bastığınıñ aytuınşa, qaraşa ayında joldanğan hattar boyınşa qwzırlı mekemelerden äli künge deyin qorıtındı jauap kelmegen.

125 mektepte ne bolıp edi?

Bıltır küzde Şımkent qalasındağı 125 jalpı orta mektebinde birneşe jılğa jalğasqan bılıqtıñ beti aşılıp, äkimşilik pen wjımnıñ arasında dau tuğan edi. 3,5 jıl bwrın esigin aşqan oqu ordasında mwğalimder «jemqorlıq, qarjı-mülik jımqıru jäne qızmetin asıra paydalana otırıp zañbwzuşılıqtarğa jol bergen» alğaşqı direktor men mañayındağı orınbasarların ayıptap şağım tüsirgen.

Arızdanuşı wjımnıñ redakciyağa wsınğan derek-däyekteri boyınşa, üş jıldan beri mektepte qarjı jinau, auızbastırıq alu, käsipodaqtıñ birjaqtığı (direktorğa täueldiligi), gazet-basılımdarğa mäjbürli türde jazğızu, ot jağuşını jwmısqa ornalastırudan bastap dekretten oralğan qızmetkerdi jemqorlıqqa itermeleu, kanikulda remontqa, körnekilik qwraldarğa, äkimşilikke salınğan ayıppwldı öteuge jäne tuğan kün-merekelerge jönsiz aqşa jinau siyaqtı türli zañsızdıqtar orın alğan.

Antikor jalpı arızdı naqtı jağdaylar boyınşa tolıqtırudı swrağanda är maman tap bolğan  zañbwzuşılıq turalı jekeley qosımşa arız tüsirgen. Arızğa 194 maman qol qoyğan.

Mwğalimder jıldar boyı zañsızdıq ordasına aynalğan bilim oşağındağı kemşilikterdi aşıp ayttı:

• Kabinet swray barğan logoped Dina Adenova jäne pedagog-defektolog Gülbanu Spataevağa direktor Satıbaldiev öz qaltalarınan keñ-dälizde kabinet jasaudı tapsırğan. Säykesinşe är maman jeke qarajatınan 75 mıñ teñge şığındap, plastikten kabinet jasatqan. Saldarınan eñbek jağdayı men mekemeniñ tehnikalıq josparı bwzılğan. Satıbaldievpen baylanısı küşti delinetin wyımdastıruşı- pedagog Jarqınay Köşikbaeva turalı «direktor toqalı» degen qaueset bar. Köşikbaeva dekretke şıqqan soñ ornına kelgen maman qatardağı kabinetke auıstırılğan.

«Oğan mekteptiñ törinen barlıq jağdayı jasalğan, direktor orınbasarında joq  jaña kabinet berildi. Ol kabinetti jihazdarmen  (jwmsaq divan, şkaf, komp'yuter, mwzdatqış t.b) qamtıdı» deydi mwğalimder.

• Himiya-biologiya päni mwğalimderi A.Narmwratova, B.Qaltaeva, T.Qambarova, Z.Tañjarova siyaqtı mwğalimderdiñ tolıq sağat jüktemesine qosımşa jartı stavka zerthanaşılıq jwmıs jazılğan. Mwğalimder  «qağaz jüzindegi» artıq aqşanı qolma-qol pedagog wyımdastıruşı Jarqınay Köşikbaevanıñ talap etuimen jinauğa mäjbür bolğan. Bwl «paydanı» qızmetker T.Qambarova direktor orınbasarı Saliha Maylıbaydıñ kaspiy kartasına 27 mıñ teñge kölemine audarğan. Sonday-aq, keybir mwğalimderge sağat jüktemesi jetispey jatqanda däl osı sala mamanı artıq jüktememen jürgen.

• Mektep direktorınıñ tapsırmasımen Saliha Maylıbay bastauış sınıp mwğalimderi  Düysenova Jadıra, Abibullaeva Gul'nar, Maqwlbekova Ğazizalarğa 18 sağat jüktemeden artıq sağat jazıp, olarğa eskertpesten sol artıq aqşanı tübirteginen eseptep qolma-qol alıp otırğan.

• Bıltır qırküyek-qazan aylarında kezekşi sınıpqa orısşa oqıtatın bastauıştağı eki sınıptıñ jetekşisi Rano Ahmedova de-fakto jetekşilik etkenimen, de-yure jalaqısı özge bastauış sınıp mwğalimi El'mira Amangel'dievağa jazılıp kelgen.

• 2020 jılğı 8 qazan küni NAR TB telearnası mektep jaylı beynefil'm tüsirgen. Satıbaldievtiñ bwyrığımen «telearnağa» kezekşi sınıptardıñ 10  oqıtuşısı ärqaysı 6,5-7 mıñ teñgeden direktor orınbasarı Saliha Maylıbayğa jinap beruge mäjbür bolğan.

• 2017-2020 j.j. oqu jıldarında bastauış käsipodaq wyımınıñ törağası bolıp Talğat Asanbekovtiñ rastauınşa, käsipodaq qarjısın ay sayın direktor Äset Satıbaldiev jäne wyımdastıruşı pedagog J.Köşikbaevağa äkelip berip otırğan. Käsipodaq wyımın basqaruda «atım ğana boldı, barlıq esep-qisaptı direktordıñ özi jürgizip otırdı, tek ortada jürgen şabarman boldım» deydi ol arızdanuşı tarapqa bergen tüsinik hatında.

2017 jılı mektep aşılğanda alğaşqı ped-jiında Satıbaldiev öz qalauımen Asanbaevti wsınıp, birden törağalıqa «saylap alğan».» Mektep wjımı amal joqtan kelisken». «Käsipodaq sodan beri direktordıñ nwsqaulığımen jwmıs istedi, aytqanınan şığa almadı». Törağa üş jılğı jarnanıñ qayda jwmsalğanı jöninde wjımğa birde-bir märte esep bermegen, mwğalimder igiligen körmegen.

• Karantin şarası küşeygen twsta, yağni bıltırğı 29 şildede direktor sanitarlıq talaptı eskermesten bastauış sınıp mwğalimderin «aula tazalap, şöp jwluğa» mindettegen. Bwl bwyrıqtı bwrınğışa orınbasarı Saliha Maylıbay iske asırıp, mwğalimderdi şaqırtqan. Däl osığan wqsas wjımdıq jinalıs 30 mamırda da ötken.

• Zañdağı «demografiya sayasatı bizde kerisinşe iske astı» degen mwğalimder dekretten oralğan maman jwmısın jalğastıru üşin de aqşa beruge mäjbür bolğanına şağınadı. «Jolaşarğa» qaltası kötermegender himiya päniniñ mwğalimi Äliya Nwrlıbaydıñ küyin keşip, öz ornına kele almaydı desedi. Sondıqtan birneşe jıl boyı jwmısqa himik 5 mwğalim (Dina Qamısbaeva, Nwrjan Bijigitov, Dänegül Kärimbaeva, Aydana Twrdieva, Madina Qaraköseeva)  qabıldansa da, ol jwmısına orala almay keledi. Al «bastıqtıñ täbetin basqandar» bir jılda-aq qızmetine qaytıp keletin «norma» qalıptasqan. Bwğan bastauış sınıp mwğalimi Ayımbike Älmerdenovanıñ jağdayı dälel bola aladı. Ayımbikeden direktor 11.11.2019 j-02.11.2020 j. aralığındağı dekrettik demalısınan keyin qayta jwmısqa twruı üşin 200 mıñ teñge swrağan. Mwğalim bwl qadamğa şarasızdıqtan barğanın aytıp-aşınadı. Satıbaldiev aqşanı ädettegidey Maylıbayğa arqılı alğan. Qarapayım maman osılayşa onıñ «kaspiy şotına 140 mıñ, qolına 60 mıñ teñgeni» bölip bergen. Tağı bir keys – Saparkül Aprejova dekretten keyingi qızmetimen qayta qauışuğa 150 mıñ teñge auızbastırıq beruge mäjbür bolğan.

• Üyde otırıp bilim alatın oquşılarğa baylanıstı sağat sanı da «aşıq bäske» tüsudi qajetsinedi. Bwğan qol jetkizu üşin de aqşa beruge mäjbür. Maylıbaydıñ densaulıq jağdayı sebepti üyde otırğan M.Mwsabektiñ anası A.Jalğasbaevağa jasağan äreketi dälel bola aladı.

• Negizgi jüktemeden tıs är sağat 2-5 mıñ teñge aralığında saudalanğan. Bastı kassirşi – direktor, Köşikbaeva, Maylıbay.

• Direktor, basşılıq tuğan künderi «salıqtıñ sazı» äueleydi. Bwrın 500 teñgeden edi. 28 qazan küngi direktordıñ tuğan künine är mwğalim 1,5 mıñ, al birlestik meñgeruşisi 5 mıñ teñgeden «salıq» ötkizgen.

• Jazğı eñbek demalısına şığarda är mwğalimge kabinetin aqtap-sırlau, jöndeu, oğan kerek materialdardı jeke qarjısına alu mindeti jüktelip kelgen. Kabinetke 2 mıñ, sport zalğa 5 mıñ teñge mölşerinde aqşa jinap, qwrılıs zattarın satıp alatın. Jöndeu isi de mwğalimderdiñ moynına artılğan. Däliz ben foye qabırğalarına ilinetin körneki stendterge bıltır mamır-mausım aylarında bastauış sınıp mwğalimderiniñ ärqaysınan 5  mıñ teñgeden jinalğan.

• Kabineti bar mwğalimder men jetekşiler şaruaşılıq meñgeruşisine kerek-jaraqqa (şelek, eden sürtkiş, apteçka, antiseptik, qağaz sülgiler t.b.) dep 2 mıñ teñgeden ötkizuge mäjbür bolğan. Bwdan basqa terezege japqış-perde (jalyuzi) aluğa küzde 5 mıñ teñge alım bergen.

• Sanitarlıq epidemiologiyalıq qızmettiñ salğan ayıppwlı da mwğalimderden öndirilip kelgen. 2019 jılı mamır ayında kelgen ayıppwlğa 3 mıñ teñgeden jinağan. Bılıqtıñ beti aşıluına türtki bolğan küzgi ayıppwl soması kezekşi sınıp mwğalimderine 3 mıñ, al qaşıqtan sabaq beretin mwğalimderge 2,5 mıñ teñge şamasında ülestirilgen. Bir qızığı, jüz eluden artıq mwğalimi bar wjımğa bwl jolı nebäri 37 mıñ teñge ayıppwl kesilgen, biraq basşılıq şaşqan aqşanıñ jiını ondağan ese köp.

Kezekşi sınıp sanatında oflayn oqığan 1 sınıptıñ mwğalimderine birinşi jartıjıldıqtıñ är ayına 15 mıñ teñgeden «salıq salındı». Äkimşilik mwnı «sınıptar jabılmauı üşin» dep tüsindirgen.

• Mektep pedagogteri käsibi biligin arttıru üşin, yağni «Jañartılğan bilim mazmwnı», «Örleu» siyaqtı bağdarlamalarına qatısuğa är mwğalim jalaqısınan 5-20 mıñ teñge aralığında «jolaşar» berip otırğan. Bastauış sınıp mwğalimi Orınkül Üysinbaeva mwnı ayğaqtarmen däleldey aladı.

• Bastauış sınıp mwğalimi atanu da «aqşa twrğan». Mektep aldı dayındıq tobında sabaq berip jürgen Roza Kamalova biılğı oqu jılına 1 sınıp qabıldau üşin Saliha Maylıbayğa 175 mıñ teñge beruge tiistelgen. Lajsız bergen.

• Biliktilik pen sanat köteru üşin test tapsırıp, qwjat ötkizetin mwğalimder (moderator-pedagog, sarapşı-pedagog, zertteuşi-pedagog, şeber-pedagog biliktiligi boyınşa) jay ğana modetrator degen statusqa layıq bola twra, qağaz jüzinde rastauğa aqşa beruge mäjbür bolıp kelgen. Oğan dälel retinde bastauış sınıp mwğalimi Aqsäule Qasımbekova jäne defektolog Dina Adenova 2020 jılı mausım ayında moderatorlıqtan ötu üşin 50  mıñ teñgeni qazaq tili päniniñ mwğalimi Meruert Twrdalieva qolma-qol bergen. Twrdalieva oqu isi jönindegi orınbasar Jamal Imantaevadan qağazğa oralğan aqşanı direktorğa beruin ötingen. Al Imantaeva mwnday «sälemdemelerdi» direktorğa alıp barıp, berip otırğanın rastaydı.

• Keyingi 3 jıldağı kitaphana isi boyınşa käsipodaq müşeleri tekseris jürgizip, mınaday jayttardı anıqtağan. Basılımğa jazılu maqsatında är mwğalimnen 2017-2018 oqu jılınıñ İ jartı jıldığına küştep 3,5 mıñ, İİ jartı jıldığına 4 mıñ teñgeden jinalıp otırğan. Kelesi oqu jılına 4-4,5 mıñ teñge ötkizgen. Al  2019-2020 jıldıñ İ jartı jıldığına 5 mıñ teñgeden jinağan. Alayda eki jüzden asa kadrı bar wjımnan qomaqtı qarajat jinalıp otırğanımen, «Ekspress poçta» JŞS-dan mekteptiñ 2019-2020 jıldıñ İ jäne İİ jartıjıldıqtarına jazılğan gazet-jurnaldardıñ tölemaqısına qarızdığı jöninde direktorğa hat kelgen. Qarız 562 mıñ teñge kölemindegi bereşek somanı kitaphana isiniñ meñgeruşisi Ayjan Tilegenniñ moynına ilgen. Direktor qarızdan qwtıludıñ amalı retinde «mwğalimderden artıq aqşa jinauğa» keñes bergen.

• Keleñsiz jağdaylar qoğamğa jariyalanğannan keyin bıltırğı qaraşa ayınıñ 8-inen 9-ına qarağan tüni sağat 1.30-dan asarda direktor Satıbaldievtiñ inisi äri mekteptiñ şaruaşılıq isi jönindegi orınbasarınıñ meñgeruşisi Ruslan Äbdinäbiev jwmıs uaqıtınan tıs mektepke kelgen. Kölikten tüse salısımen barlıq baqılau kameraların söndirip, direktor kabinetinen eki sömke qağaz alıp ketken. Osı oqiğağa kuä bolğan küzetşi Birjan Daduov jäne Qanat Bijanov kuälik berip, äleumettik jelide mälimdeme de jasadı.

• Mektep mülikteri aşılğan jıldan keyin birşama kemigen. Alğaşında, mektep qoldanılısqa berilgen 2017-2018  oqu jılı prektorlar, jwmsaq orındıqtar jetkilikti jäne är kabinette su jılıtu qwrılğısı bolğan.

(Mwğalimder bastapqı-negizgi arızğa qosa joğarıda atalğan är tarmaqqa säykes qwzırlı mekmelerge arız-tüsinikteme ötkizgen. Derekköz: wjımdıq arız) 

Wjım 3 qaraşa basqarmağa dereu tiyanaqtı tekseris jürgizudi swrap arız tapsırğan.

Osı twsta alğaş Azattıq radiosı aymaqtağı tilşisi Dilara Isa mwğalimderdiñ janayqayın elep-nazar audarıp, birneşe habar jariyaladı.

Sodan keyin bilim basqarmasınıñ basşısı Janat Täjieva birden mwğalimderdiñ şağımı boyınşa 10-12 qaraşa künderi jürgizilgen arnayı komissiyanıñ tekserisi kezinde «arızdağı faktilerdiñ keybiri rastalğanın» mälimdedi.

Komissiya qwramına basqarma apparatınan 6, özge mektepterden 3 müşe kirgen, alayda arızdanuşı wjımnan eşkim enbegen. Zerdeleu jwmısınıñ barısına köñili tolmağan arızdanuşı tarap tekseris kezinde kemşilikter jiberilgenin aytıp şağındı. Bwl jöninde basqarma «arızdanuşılar ötinişter men talap-tilekter bermegendikten komissiya müşeligine qosılmağanın» jäne talapker taraptıñ qatısuımen «zerdeleu jwmısı aşıq ötti», «qalalıq bilim salasın sapamen qamtamasız etu departamentimen birge wjımğa wdayı qwqıqtıq keñester men ädistemelik kömek körsetip jatır» dedi.

Zerdeleu jwmısınıñ qorıtındısına säykes:

• mektep äkimşiligi men pedagogter arasında aşıqtıq pen jariyalılıq qalıptaspağanı;
• basşılıqqa jüktelgen lauazımdıq mindetter men talaptar tiisti därejede orındalmağan, sı­bay­las jemqorlıqtıñ sebepteri men al­ğışarttarın anıqtap-joymağanı;
• sağat jüktemelerin bölu procesi aşıq bolmağanı, äleumettik pedogog M.Äkimbaevağa artıq 12 sağat berilgeni anıqtalğan.

Basqarma bastığınıñ orınbasarı Aygül Tekebaeva resmi jauap hatında Äset Satıbaldiev «öz ötinişi negizinde» basqarmanıñ bıltırğı 11 qaraşadağı №762 bwyrığımen jwmıstan bosatılğanın habarladı. Biraq bwğan deyin redakciya tilşisi tildesken Täjieva «şudan keyin ornınan bosatqanın» jäne «sol üşin Satıbaldiev öşigip, advokat jaldap, sottasqalı jürgenin» mälimdegen. Basqarma basşılığı kezdesu ötkizip, mwğalimderdi alañdatqan bwrınğı direktor Ä.Satıbaldiev arızdanuşı taraptı moraldıq şığın öndiru maqsatında  sotqa beredi degen qauesetke negiz joqtığın, «sottassa tek basqarmamen sottasuı mümkin» ekenin tüsindirgen. Alayda arada birer ay ötisimen eks-direktordıñ basqarma basşılığın özin negizsiz bosattı degen talappen sotqa bergeni belgili boldı.

Atı Satıbaldievtiñ bastı sıbaylası retinde atalatın bastauış sınıptar boyınşa direktorınıñ orınbasarı Saliha Maylıbay lauazımınan alındı. Biraq qazir qaladağı basqa mektepke auıstı. Sonday-aq, käsipodaq törağası T.Asanbaevtıñ ornına wjımnıñ saylauımen  D.Tüytenova saylandı. Bwrınğı direktor orınbasarları B.Bertan men Q.Süleymenovke tärtiptik şara qoldanıldı.

Basqarma wjımdıq arızdı dau şıqqan boyda, al komissiya qorıtındısın qosımşa 19 qaraşa Sıbaylas jemqorlıqqa qarsı is-qimıl agenttiginiñ Şımkenttegi departamentine joldağan. Departament basşısınıñ orınbasarı B.Wzınjas redakciyanıñ swrau hatına 22 jeltoqsanda bergen jauabında «Satıbaldievke qatıstı Qılmıstıq kodekstiñ 366-babı 2-böligimen №207900131000185 sotqa deyingi tergep-tekseru tirkelip, qazirgi tañda tergeu amaldarı jürip jatqanın» bayandadı.

Qaraşa ayınıñ soñına qaray mwğalimderdiñ arızı boyınşa qalalıq memlekettik eñbek inspekciyası basqarması tekseris jürgize bastağan.

Mwğalimderdiñ sabırın tausığan «soñğı noqta» – Sanitarlıq epidemiologiyalıq qızmettiñ salğan ayıppwlı. Mektep basşılığı sanitarlıq normanı saqtamağanı üşin 37 mıñ teñge ayıppwl tölegen. Biraq mwğalimderden 3 mıñ teñgeden, jalpı 630 mıñ teñge şamasında qarajat jinağan. Wjımdıq arızğa tiisti organdar dereu äreket etpegendikten, kümandanğan wjım öz betinşe zertteu-herdeleu jwmısın jürgizgen.

«Özimiz – zertteuşi, özimiz – tergeuşi, özimiz – baqılau bolıp jürmiz. Äkim orınbasarı Şıñğıs Mwqan kömek beretin bolar dep kirgenbiz. Jılı şıraymen qabıldağan. Täuelsiz komissiya qwrıp beremiz dep uäde etken edi. Bwl söz jüzinde qalıp qoydı. Biz sonı tostıq. Täuelsiz zertteudi özimiz jürgizdik. Antikor o basta eşqanday zañbwzuşılıq anıqtalmadı degen jauap hat berdi. Endi qayda baramız?..» – degen Läzzat Äjibekova, Dilbar Tüytenova, Meruert Qayırova, Rano Abdihanova arızdanuşı wjımnıñ pikirin jetkizip.

4 qaraşada tüsken wjımdıq arızğa Sıbaylas jemqorlıqqa qarsı is-qimıl agenttiginiñ Şımkent qalası boyınşa departamentiniñ basşısınıñ orınbasarı B.Wzınjas arada apta ötpey jatıp «zañnamanı bwzuşılıqtar anıqtalmadı» dep jauap bergen. Aymaqtağı mekemeniñ küdikti jauabınan soñ bwğan narazı wjımnıñ mäselesi turalı jeltoqsan ayınıñ basında redakciya atınan ortalıq apparat basşısı Alik Şpekbaevqa resmi swrau joldadıq.  Swraq – jergilikti departament «Arızdı qarau barısında sotqa deyingi tergep-tekserudiñ birıñğay tizilimine tirkeuge negiz bolıp tabılatın män-jaylar anıqtalmadı» degen qorıtındığa qalay keldi?

Qoğamda rezonans tudırğan mäsele jönindegi ministrlikke joldağan  redakciyanıñ swrau hatına vice-ministr Şolpan Karin jeltoqsan ayında basqarma jauabınıñ köşirmesin säl ğana türlendirip qayta joldadı. Ministrliktiñ jağdaydı jiti nazarğa almauınan bolsa kerek, birneşe qwzırlı mekeme şaş etekten kemşilik anıqtağanına qaramastan, basqarmağa qarsı bwrınğı direktordıñ bas köterip jatqanı.

«Zañmen däleldensin dep jwmıstan şığarmasam da bolar edi. Biraq men mwğalimder jağındamın. Jel twrmasa şöptiñ bası qimıldamas dep bosatqan edim. Bwl şeşimmen ekiniñ biri kelise bermeydi. Aman twrsañ, estirssiñ – olar (Satıbaldiev tarapı) bwl üşin bizben de sottasadı», – degen edi 4 jeltoqsandağı swhbatında.

Täjieva aytqanday, qazirgi tañda Satıbaldiev basqarmamen sottasıp jatır.

4 jeltoqsan küni qala äkimi Mwrat Äytenov redakciya tilşisine bergen jauabında jauaptı mekemeler tekserip jatqanın mälimdegen.

«Tergeu jürip jatqanına qaramastan biz uaqıtşa bosattıq. Qwzırlı organdar tekserip-däleldegen soñ sotqa joldanadı», – degen äkim astanada ötken brifingte.

Mwğalimderdiñ bar talabı – «arız şağımda atalğan jayt-däleldemeler boyınşa ädil tekseris jürgizu jäne jıldar boyı zañsızdıqqa jol bergen basşılıq ökilderin zañdı şeşimmen jwmıstan bosatu». Olardıñ aytuınşa, är jağday boyınşa tübirtekter tügel saqtaulı, ayğaq jeterlik. Degenmen üş aydan beri redakciya habarlasıp, män-jaydı swrastırğan jäne mwğalimder wjımdıq arız tüsirgen mekemeler –  Sıbaylas jemqorlıqqa qarsı is-qimıl agenttigi, Bilim ministrligi, Eñbek inspekciyası, İşki memlekettik audit departamenti, Qaratau audandıq prokuraturası  mardımdı jauap qatpay keledi. Antikor men prokuraturanıñ sılbırlığı köñilge köp küdik wyalatadı deydi narazı tarap. Äytpegende, tap osı jağday töñireginde äkim, onıñ orınbasarı, basqarma bastığı, qwzırlı organdar basşılığı istiñ ädil äri aşıq jüruine jariya türde uäde etken.

Qazaqstan, äsirese qay salası bolmasın jemqorlıq şırmauına ilikken küngey aymaq pen üşinşi megapolis Şımkenttegi bılıqqa qatısı bar memlekettik mekemelerdiñ simvolına aynalğan 125 mekteptegi jağdaydı redakciya jiti nazarda wstaytın boladı.

(!) Jeltoqsan ayınan beri redakciya barlıq tarapqa habarlasıp, pikir swrauğa tırıstı. Degenmen eks-direktor Äset Satıbaldiev pen sonda jwmıs istegen jaqındarı, orınbasarı Saliha Maylıbay twtqanı kötermedi. Aldağı uaqıtta qoñırauımızğa jauap bergen mamandardıñ mektep aşılğalı kuä bolğan zañbwzuşılıqtarı jöninde swhbatın taratıp jariyalaytın bolamız.

"The Qazaq Times"