"Erkindik qanatı" wyımınıñ jetekşisi Elena Şvecova, advokat Ol'ga Enns, zañger Roman Raymer (soldan oñğa qaray) Esil audanı kiris basqarması basşısınıñ orınbasarı Erlik Mwqanov kabinetine hattamamen tanısuğa kelip otır. Astana, 18 qañtar 2021 jıl. Foto: Azattıq radiosı / Säniya Toyken

Astananıñ memlekettik kirister departamenti «Erkindik qanatı» qoğamdıq qorına baylanıstı iste qwqıq bwzuşılıq qwramınıñ bolmauı sebepti osığan deyin salınğan ayıppwl jazasınıñ küşin joydı. 

Qor zañgeri Roman Reymer Vlast.kz redakciyasına bergen pikirinde wyım atınan eki şağım tüsirgenin habarlağan.

«Biz ayıppwldıñ nege jaramsız dep tanılğanın bilmeymiz. Tipti qwjattıñ özin, yağni ayıppwldıñ küşin joyu turalı qaulını äli körgemiz joq. Elordalıq MKD törağasınıñ orınbasarı qwqıq bwzuşılıqtıñ qwramı joq ekenin ayttı. Wyım tarapınan eki şağım berdik – äkimşilik jauapqa  tartu turalı hattama men qaulığa qarsı. Hattama jaylı alğaşqı şağımımız dwrıs jasalğanına qaramastan qabıldanbadı. Qaulığa baylanıstı arızımız qanağattandırıldı. Qwqıq bwzuşılıq qwramınıñ bolmauına baylanıstı äkimşilik ayıppwl alınıp tastaldı», –  dedi Reymer.

Ol ayıppwldıñ alınıp tastaluın qwqıqtıq mäselege emes, sayasi astarına, qordıñ aqparattıq kampaniyasına baylanıstı dep esepteydi.

Bwğan deyin saylau barısın baqılağan «Erkindik qanatı» wyımına Norwegian Helsinki Committee tarapınan tehnikalıq qateden jiberilgen qarjını rastaytın jäne qaytaratın salıq qwjattarın wsınsa da, bilik jazanıñ auır türin qoldandı, 100 AEK (277 800 teñge) köleminde ayıppwl kesken.

Qañtar ayınıñ soñında adam qwqıqtarın qorğaumen jäne azamattıq ispen aynalısatın jeti birdey qoğamdıq wyım salıq qızmetiniñ tarapınan qısım jasalğanın jariyalağan. Saylau qarsañı men jıl basında wyımdarğa keyingi birneşe jıldağı salıq esebiniñ 17 jäne 18 formaların toltıru kezinde bwzuşılıqtar bolğanı jaylı habarlama jiberilgen. Saldarınan ükimettik emes wyımdarğa, sonıñ qatarında «Eho» men «Halıqaralıq qwqıqtıq bastama» wyımınıñ ärqaysına 400 AEK (1 166 800 teñge) köleminde ayıppwl salınıp, üş ayğa qızmeti toqtatılğan. Tağı biri Qazaqstandağı Adam qwqığı jäne zañdılıqtı saqtau halıqaralıq byurosına 800 AEK (2 333 600 teñge) mölşerinde ayıppwl kesilip, qızmeti 3 ayğa toqtağan edi.

"The Qazaq Times"