باقىلاۋشىلار دايىندايتىن «ەركىندىك قاناتى» ۇيىمىنا كەسىلگەن ايىپپۇل الىنىپ تاستالدى

استانانىڭ مەملەكەتتىك كىرىستەر دەپارتامەنتى «ەركىندىك قاناتى» قوعامدىق قورىنا بايلانىستى ىستە قۇقىق بۇزۋشىلىق قۇرامىنىڭ بولماۋى سەبەپتى وسىعان دەيىن سالىنعان ايىپپۇل جازاسىنىڭ كۇشىن جويدى. 

قور زاڭگەرى رومان رەيمەر Vlast.kz رەداكتسياسىنا بەرگەن پىكىرىندە ۇيىم اتىنان ەكى شاعىم تۇسىرگەنىن حابارلاعان.

«ءبىز ايىپپۇلدىڭ نەگە جارامسىز دەپ تانىلعانىن بىلمەيمىز. ءتىپتى قۇجاتتىڭ ءوزىن، ياعني ايىپپۇلدىڭ كۇشىن جويۋ تۋرالى قاۋلىنى ءالى كورگەمىز جوق. ەلوردالىق مكد توراعاسىنىڭ ورىنباسارى قۇقىق بۇزۋشىلىقتىڭ قۇرامى جوق ەكەنىن ايتتى. ۇيىم تاراپىنان ەكى شاعىم بەردىك – اكىمشىلىك جاۋاپقا  تارتۋ تۋرالى حاتتاما مەن قاۋلىعا قارسى. حاتتاما جايلى العاشقى شاعىمىمىز دۇرىس جاسالعانىنا قاراماستان قابىلدانبادى. قاۋلىعا بايلانىستى ارىزىمىز قاناعاتتاندىرىلدى. قۇقىق بۇزۋشىلىق قۇرامىنىڭ بولماۋىنا بايلانىستى اكىمشىلىك ايىپپۇل الىنىپ تاستالدى»، –  دەدى رەيمەر.

ول ايىپپۇلدىڭ الىنىپ تاستالۋىن قۇقىقتىق ماسەلەگە ەمەس، ساياسي استارىنا، قوردىڭ اقپاراتتىق كامپانياسىنا بايلانىستى دەپ ەسەپتەيدى.

بۇعان دەيىن سايلاۋ بارىسىن باقىلاعان «ەركىندىك قاناتى» ۇيىمىنا Norwegian Helsinki Committee تاراپىنان تەحنيكالىق قاتەدەن جىبەرىلگەن قارجىنى راستايتىن جانە قايتاراتىن سالىق قۇجاتتارىن ۇسىنسا دا، بيلىك جازانىڭ اۋىر ءتۇرىن قولداندى، 100 اەك (277 800 تەڭگە) كولەمىندە ايىپپۇل كەسكەن.

قاڭتار ايىنىڭ سوڭىندا ادام قۇقىقتارىن قورعاۋمەن جانە ازاماتتىق ىسپەن اينالىساتىن جەتى بىردەي قوعامدىق ۇيىم سالىق قىزمەتىنىڭ تاراپىنان قىسىم جاسالعانىن جاريالاعان. سايلاۋ قارساڭى مەن جىل باسىندا ۇيىمدارعا كەيىنگى بىرنەشە جىلداعى سالىق ەسەبىنىڭ 17 جانە 18 فورمالارىن تولتىرۋ كەزىندە بۇزۋشىلىقتار بولعانى جايلى حابارلاما جىبەرىلگەن. سالدارىنان ۇكىمەتتىك ەمەس ۇيىمدارعا، سونىڭ قاتارىندا «ەحو» مەن «حالىقارالىق قۇقىقتىق باستاما» ۇيىمىنىڭ ارقايسىنا 400 اەك (1 166 800 تەڭگە) كولەمىندە ايىپپۇل سالىنىپ، ءۇش ايعا قىزمەتى توقتاتىلعان. تاعى ءبىرى قازاقستانداعى ادام قۇقىعى جانە زاڭدىلىقتى ساقتاۋ حالىقارالىق بيۋروسىنا 800 اەك (2 333 600 تەڭگە) مولشەرىندە ايىپپۇل كەسىلىپ، قىزمەتى 3 ايعا توقتاعان ەدى.

"The Qazaq Times"