Maqsat Tolıqbay: Dauıstı daulayın desek, oğan qoğam dayın emes

Biılğı saylauğa «körik» bergen Adal sayasi partiyasınıñ atınan sayısqa tüsken telejürgizuşi Maqsat Tolıqbay dausın daulap, piket-şeruge  şıqpaytının mälimdedi. Memlekettik aqparat sayasatın jüzege asıratın Qazaqstan telearnasınıñ bas prodyuseri bwğan deyin «saylau ädiletsiz ötken jağdayda, mitingige şığatının» aytqan.

Sayasi nauqanğa aralasıp körgen jurnalist facebook äleumettik jelisinde saylau aldındağı oyınan aynığanın mälimdedi. Beyneündeudegi sözine qarağanda, sayasatta täjirbiesi bar belgisiz bir «ülken sayasatker» toqtau aytıp, rayınan qaytararday «suıq aqıl» bergen eken.

«Maqsat, dauıs daulap mitingige şığasıñ ba dep swrap jatqandar bar. Onday oy bolmadı emes boldı. Sayasatta jürgen bir ülken ağamız telefon şalıp eki sağat söylestik. Mağan sözi äser etti. Sizderde qosılasızdar dep oylaymın. “Maqsat,- dedi – seniñ sayasattıñ şetin körip jatqanıña bar-joğı bir ay boldı ğoy. Bwl bası ğana. Äli talay närseni köresiñ. Sender özderiñe senimdi bolsañdar, birdeñeni däleldegileriñ kelse, nağız partiyanıñ jwmısın körsetiñder. Aldağı jıldarı ana üş partiyadan jaqsı jwmıs isteñder. Erteñ rezonanstıq jağday bolatın bolsa, baspasöz mäslihatın ötkizip, mälimdeme jasañdar. Qanday da bir oqiğalar bolğanda halıqtıñ ortasınan tabılıñdar. Öziñ aytıp jüretin tegin granttı jwmıs bastağısı keletin azamattarğa taratıñdar. JOO rektorlarımen memarandumğa otır. Auılda tünşığıp jatqan qanşama talanttı jastar bar oquğa tüse almay jatqan. Tım bolmasa solardı oquğa tüsiriñder tegin grant berip. Mine, eñ ülken sauaptı is solay boladı. Qolınan eş närse kelmeytin şarasız küyge tüskende ğana adam mitingige şığadı” – dep ayttı mağan. Osınıñ özi qattı äser etti. Öytkeni, ağayın aşı bolsa da aytayın bizdiñ qoğamnıñ özi dayın emes. Men atoylap alañğa şıqqanmen artımnan bir eki mıñ adam şığar. Odan ne özgerer. Söytip tarqaymız», – dedi mäjilis deputattığınan dämeli  bolğan jurnalist Tolıqbay.

Ol saylau barısında birşama täjirbie jinağanın, jwmıstı jalğastıra beretinin aytadı. Keltirgen dereginşe, ayğa jeter-jetpes uaqıtta partiyağa 360 mıñ adam müşelikke ötken.

«Bir aydıñ işinde qolımızdan ne keletnin körsete aldıq. Bwdan keyin bizben de sanasadı. Jiırma jeti künniñ işinde eşbir partiyanıñ tarihında bolmağan 360 mıñ adamdı müşelikke ötkizdik. Bes jıldan keyin de saylau boladı. Oğan deyin sanımızdı million eki millionğa jetkizeyik. Talay joba, jospardı birigip atqarayıq. Biz partiyanıñ atınan sizder jasağan wsınıstan mälimdeme jasayıq. Ärbirden soñ Adaldı qoldaysız ba, qoldamaysız ba mäsele oda emes, ağayın. Biz küşke aynalu üşin ärbir belsendi ramkadan şıqqısı keletin, özgergisti qalaytın ärbir azamattı qoldap üyreneyikşi. Sen jaman, men jaman otıra bergenenen eşkim eşteñesi ketpeydi, kerisinşe jaqsı. Qauipti ğoy, erteñ bizdiñ basımız birigip ketse. Sondıqtan osını oylañız», – dep sözin qorıttı Maqsat Tolıqbay.

Alayda partiyanıñ baspasöz hatşısı Nazım Janğazinovanıñ redakciya tilşisine bergen mälimetine sensek, ayda astam uaqıtta 250 mıñ adamğa artqan. Partiyanıñ resmi ökili Janğazinova «rebrendingke deyin partiyada 53 mıñ adam bolğan, 12 qañtardağı tizim boyınşa 311 mıñnan asadı» deydi.

Saylau qortındısı şıqqanda jurnalist Tolıqbay «Nur Otan» partiyasınan keyin «Adal» ekinşi orın alğanın mälimdegen. Alayda «Adal» partiyasınıñ törağası Serik Swltanğali jeñilgenin moyındap, eks-prezident Nazarbaev basqaratın bilik partiyasın birinşi bolıp qwttıqtadı.

Ortalıq saylau komissiyasınıñ dereginşe  «Nur Otan» partiyası 71,09 % dauıs ielense, «Aqjol» 10,95 % dauıs, QHP 9,10%, «Auıl» partiyası 5,29 % , «Adal» bar-joğı 3,57% dauıs qana jinay alğan.

Degenmen täuelsiz sarapşılar şınayı oppoziciyasız ötken saylau «ädil ötpedi» degen pikir aytadı. Mäselen «Jas saylauşılar ligasınıñ» baqılauşıları mäjilis saylauına barlıq partiyalar ötti deydi. Olardıñ esebi boyınşa «Adal» üşin saylauşılardıñ 12,8% dauıs berse, «Aq jolğa»  20,1%, al «Auıl» partiyası  8,33% dauısqa ielense, «Nur Otan»  48,30%, Qazaqstan halıq partiyası 8,90% dauıs alğan körinedi.

Qazaqstan halqına reprezentativti bola alatın kölemdi saualnama jürgizgen Sandj zertteu ortalığınıñ mälimetinşe, «Nwr Otandı» qoldau 71% emes 56% bolğan. «Aq jol», «Adal», «Auıl» partiyaları mindetti mejeden joğarı dauıs alğan. Kerisinşe, QHP (bwrınğı kommunister) jeti payızdıq mejege jetpey qalğan. Saylau qorıtındısı boyınşa ädettegidey «üşem partiya» mäjiliske ötken.

"The Qazaq Times"