Бақылау институтының қызметін шектеген ОСК құрамы сайлау алдындағы соңғы жиында. 8 қаңтар 2021 жыл. Фото: ҚР ОСК

Дүйсенбі, сағат 15.00-дегі Орталық сайлау комиссиясының (ОСК) алдын ала ұсынған мәліметіне қарағанда, парламентке «ескі» үш саяси партия қайта өткен.

Олар – «Нұр Отан», «Ақ жол» және «Қазақстанның халық партиясы».

Сайлаудың алдын ала қорытындысы бойынша:

  • «Нұр Отан» – 71,09%
  • «Ақ жол» – 10,95%
  • «Қазақстанның халық партиясы»– 9,1%
  • «Ауыл»– 5,29%
  • «Адал»– 3,57% дауыс алған.

Қазақстанда заң бойынша, парламентке 7% дауыс алған партиялар өтеді. ОСК сайлаудың түпкілікті нәтижесі хаттамалардың түпнұсқасы келгеннен кейін жарияланатынын хабарлады. Билік партиясы және мәжіліс кандидатымен туыстық байланысы бар төраға басқаратын ОСК есебі үкімет қолайына «жағатын» ұйымдар жүргізген экзит-полл нәтижесін қуаттады.

10 қаңтар күнгі мәжіліс және мәслихаттар сайлауына Қазақстанның экс-президенті Назарбаев «өмір бойғы төраға» ретінде басқаратын «Нұр Отан» партиясы мен билікшіл төрт партия қатысты. Тәуелсіз бақылаушылар мен байқаушылар, сондай-ақ ақпарат құралдарына әртүрлі қысым жасалып, бейбіт жиынға шыққан наразылар ұсталды, кейбір оппозициялық топтар (Демпартия бастамашыл тобы мен Oyan, Qazaqstan белсенділері) күні бойы полиция қоршауында болды. Сайлау учаскелерінде журналистер мен бақылаушылар бірқатар өрескел заңбұзушылықтарды байқап, комиссия және сенімді өкілдердің немғұрайлығына куә болған. Дегенмен Бас прокуратура мен ІІМ сайлау тыныш өткенін айтып, жоғарыда аталған кемшіліктер болмашы құқықбұзушылық деп санайды.

"The Qazaq Times"