Körneki suret. Foto: Depositphotos

Resmi derek boyınşa, Qazaqstanda 12 qazan küni 70 adamnan koronavirus, 4 adamnan koronavirus pnevmoniyası anıqtaldı. Üş künde koronavirus pnevmoniyası 64 esege azayğan, bwl tehnikalıq qate boluı mümkin. 

#Koronavirus  11 qazan küni koronvirus jwqtırğan 162 adam ayığıp şıqsa, 3 adam ömirden ötken. Al jañadan tirkelgen nauqastardıñ eñ köbi – SQO (12) jäne ŞQO (11). Al Aqtöbe, Almatı, Mañğıstau jäne Qızılorda oblıstarında birde-bir nauqas anıqtalmağan.

DenMinniñ resmi mälimetinşe, emdelip jatqan 2927 adamnıñ 2103-i auruhanada. Al qalğan 824 nauqas ambulatorlıq terapiyada. Olardıñ arasında 77 öskinşek bala bar. Ahualı naşar 85 nauqastıñ arasında 12 adamnıñ jağdayı qattı qiındağan. Jäne 13 nauqas ökpeni jasandı jeldetu apparatımen tınıstap jatır.

Respublika boyınşa barlığı 108 901 adam koronavirus infekciyasın jwqtırsa, emdelip jazılğandarı – 104 203 adam. Bwl jalpı nauqastardıñ 95%-dan astamı. Ötken aptanıñ särsenbisinen beri Qazaqstanda koronavirus köbeygen edi.

#Koronavirus_pnevmoniyası Sonımen qosa, düysenbi küni koronavirus pnevmoniyasına şaldıqqan 4 adam, 2 ölim jağdayı tirkelgen. Tağı 10 adam ayığıp şıqqan. Biraq olardıñ qanşası qay aymaqtan ekeni belgisiz. Düysenbi küngi derek delingen aqpar şın mäninde jeksenbiniki bolsa kerek. Jeksenbide DenMin jäne auruhanalar demalısqa baylanıstı kürt kemitindikten, sonşalıqtı şınayı deuge kelmeydi. Bwl birneşe ay boyı bayqalğan trend. Vedomstvo senbi, qazannıñ 10-ı 258 keys anıqtalğanın habarlağan.

«Ötken täulikte koronavirustıq infekciya belgileri bar pnevmoniyanıñ 4 jağdayı jäne 2 ölim jağdayı tirkeldi», – dep jazdı Ükimettiñ www.coronavirus2020.kz saytı.

Kündelikti erteñgilik «ötken küngi» mälimetti beretin ministrlik mwnda 12 qazandı meñzep twr. Demek eldiñ bäri auruhanağa emin-erkin baratın jwmıs küni nebäri 4 jağday, al senbi küni 250-den astam jağday tirkelui aqılğa sıyımsız. Osını eskersek, Ükimet resmi habarda jazatınday bir künge emes, şıntuaytında eki künge keşigip jariyalaydı dep topşılauğa bolatınday.

PTR testi teris qorıtındı körsetkenimen, koronavirus saldarınan qabınğan aqökpe auruınıñ aymaqtarğa taralu deregin twraqtı türde jariyalauğa uäde etken ministr Aleksey Coy da, onıñ kömekşisi, vedomstvonıñ resmi ökili Bağdat Qojahmetov te sözin bwrmalap, är on kün sayın jariyalauğa köşken. Koronavirus pnevmoniyasınıñ öñirlerdegi kündelikti dinamikası belgisiz. Qoğamda biılğı 256 mıñ pnevmoniya jağdayın esepke qospay, jalpı statistikanı şildedegi qırğınnan keyin jürgize bastağan Ükimettiñ esebine kümänmen qaraytındar köbeygen.

#Söytse... Qazaqstanda koronavirus ölimi azaymay twr. Resmi derekke säykes, qazan ayınıñ on eki  täuliginde koronavirus jwqtırğan 922 adam anıqtalıp, 37 adam qaytıs bolğan. Däl osı uaqıtta koronavirus pnevmoniyasına 1935 adamnıñ şaldığıp, 15 adam qaytqan. Pnevmoniyadan auırğandardıñ sanı koronavirusqa qarğanda eki ese köp bolğanımen, – qaytıs bolğandar PTR arqılı rastalğan kovidten 2,6 ese az.

Ötken tamız jäne qırküyek aylarında Qazaqstanda koronavirus jwqtırğandar 17 mıñnan, al koronavirus pnevmoniyasına şaldıqqandar 34 mıñnan asqan. Ekeuin qosa eseptegende, keyingi eki ayda indetten 600-dey qazaqstandıq ömirden ötken. Sonımen birge, osı aralıqta (tamız-qırküyek) JRVI aurularımen 418 mıñnan, pnevmoniyanıñ basqa türlerimen 82 mıñnan astam jağday tirkelgen.

7 qazan densaulıq saqtau ministri Aleksey Coydıñ koronavirus epidemiyası turalı boljaldı scenariydiñ üş nwsqasın tanıstırğan. Onıñ  aytuınşa, boljamğa apta sayın tüzetuler engizilip otıradı. Aleksey Coy wsınğan pessimistik scenariy boyınşa, eger jwrttıñ 60 payızı ğana maska taqsa, 2020 jıldıñ qazan-jeltoqsanında 190 mıñ adam virus jwqtırıp, 65 mıñ adamdı auruhanağa jatqızuğa «tura keledi». Mwnday jağdayda «jeltoqsannıñ ortasında lokdaun engizilui ıqtimal».

Tağı bir nwsqa realistik scenarige säykes, jwrt araqaşıqtıq saqtap, 70 payızı maska taqsa, qazan-jeltoqsanda 90 mıñday adam virus jwqtırıp, 30 mıñın auruhanağa jatqızuğa «tura keledi». Bwl jağdayda «qañtarda lokdaun engizilui mümkin».

Coy eger jwrttıñ 100 payızı maska tağıp jürse, qatañ karantin bolmaytının, qazan-jeltoqsanda şamamen 40 mıñ adamğa virus jwğıp, 15 mıñ adam auruhanağa tüsetinin aytadı.

Pandemiya kezindegi moderator vedomstvonıñ basşısı karantinniñ bastı indikatorı retinde eldegi auruhanalardıñ 70 payızı tolsa, qatañ lokdaun jariyalau kerektigin mälimdedi.

Pnevmoniyanıñ koronavirustıq türinen basqa aurularımen auırğandar sanı 337 mıñnan astı. Taratıp aytsaq, 13 naurızdan beri COVID-19 infekciyasın jwqtırğandar qatarı 109 mıñğa, 1 tamızdan bergi koronavirus pnevmoniyası 35 mıñğa juıqtağan. DDSW mälimetinşe, Qazaqstanda auırğandardıñ sanı 143 mıñnan asqan. Degenmen Ükimet koronavirus pen onıñ pnevmoniyasın eki bölek esepteydi.   Pandemiya bastalğalı jalpı jiını virus jwqqandardıñ 2717-si (KVI+ / U07.1 – 1 771, KVI- / U07.2 – 370, ilespe aurulardan – 576) qaytıs bolğan. Alayda Qazaqstan biligi boyınan koronavirus tabılsa da, basqa aurulardıñ sebebinen qaytıs boldı delingen 576 adamdı jalpı statistikağa qosıp eseptemeydi. Sarapşılar bwğan qarsı. Olardıñ aytuınşa, koronavirustıñ janama äserinen qaytqandardıñ jartısınan astamınıñ sebebi qan aynalımı jüyesiniñ auruları bolğandıqtan, oğan infekciya dert qozdıruşı faktor retinde ölimge äkep soqtırğan.

"The Qazaq Times"